Daannolhnak 7 - Zanniat Bible

Bawipa Pumpak Ai Miphunte

¹ Cen Moses in, “Bawipa ning Pathian in ning khur tuhhnak ramah ning fehpui tuhai miphun tampui hnawt tuh sek i. Ning in ning nor deuhdeuh fangin ning tahin a ham deuh le a hat deuh miphunte pasarih: Hit mi, Girgash mi, Amor mi, Canaan mi, Perez mi, Hiv mi le Jebus mite heh hnawt tuh i.

² Bawipa ning Pathian in he miphunte tu ning kut songah a dah fangin le ning neh fangin amahte veksen in rek tuh sek i si. Amahte thawn kangrualhnak thukham bawm mah ilai ninghiohnak khai nai mah ih.

³ Hoidunhnak bawn mah ilai ning fate khai hoidunhnak bawn maseh;

⁴ zaimantifangin ning fate tu Bawipa bia tuh loin hoi tuhai a dang khuavangte biaruai tuh i. Ciatih ilekhaw Bawipa tu ning vumah a thinraw tuhai cammalak in ning siatsuah tuh sek i.

⁵ Hemi miphunte hnenah hetihin bawn tu sawn ih: Amahte puleng bal sah tusek ih, amahte biahnak lungdawlte khoiruai tusek ih, amahte thing birhnak pawl cekkhoi tusek ilai a milimte mai in tai tusek ih.

⁶ Zaimantifangin ning tu Bawipa ning Pathian ai minung i si ai a hnenah miphun thianghlim i si. Laivum mi zongzong songah amah minung, a minung songlawi cang tuhin a rilmi i si.

⁷ “Midang tahin ning tam deuh man Bawipa in ning daih ai a rilmi ilo i si; thungai in ti fangin laipua vumah miphun cik ber i si.

⁸ Ikhalselai Bawipa in ning it manin ning pupate hnenah thukhamhnak khiah a khimruai nuam manin i. Ciamanin a ban thahat in ning o zo ai Egypt kumpibawi kuthnia ai saltanghnak in ning luatruai zo i.

⁹ Ciamanin Bawipa kin Pathian tu Pathian taktak i ai, rinsantlak Pathian i, ti khiah ling tu ngio ih. A thutiam heh khoruai tuhai amah a ittu le a thupehnak a hluntu hmuahhmuah vumah san thawng tampui tian a cat lomi a ithnak hmuh tuh i.

¹⁰ Ikhalselai a tawngcaitu le a huatu vum ahcen a rang ngai in cawhhnak le siatsuahhnak hlengruai tuhin ṭhukṭhun tuh hrimhrim lo i.

¹¹ Ciamanin a zirhnak hmuahhmuah hlun tu ih; tunnia ai i zirhhnak dan hmuahhmuah hlun tu sio ih.

Thungaitu Ai Hmuifu

¹² “Hemi thupehnakte ngai ai felniu in hlun le i sikhaw ning pupate hnenai a thukham cia bangin Bawipa ning Pathian in a thutiam khoruai tuhai a kho ngai a ithnak heh ning vumah ning hmuh tuh i.

¹³ Ning pungzai tuhai fasuan tampui ning nai thil tuhin ning it tuhai hmuifu ning burh tuh i. Rong le cabit le olive siti ning nai thil tuhin ning lo vum ahkhai hmuifu ning pe tuh i; kawlpaw le tuu tampui ning pe bet tuh i. Ning co tuhin ning pupate hnenah a thukham cia ram songah ning um fangin hemi hmuifute ning pe tuh i.

¹⁴ Ningmah bangin hmuifu hinkhim a comi miphun laipua vumah aisu khai um tuh lo i. Ningmah lakah fa nai thil lo facing um tuh lo ai ning sumhnamte lakah khai fa nai thil lo a cing um tuh lo i.

¹⁵ Urhnak hmuahhmuah songin Bawipa in ning hup tuh i. Egypt ramai ning tawk zohnak ursiate khai ning vumah hlengruai tuh lo i; ikhalselai ning ralte vumah hlengruai tuh sio i.

¹⁶ Bawipa ning Pathian in ning kut songai a dahhnak miphunte hmuahhmuah siatsuah tu sio ilai, ninghio mah ih. Amahte khuavangte khai bia mah ih; bia le i sikhaw ning bo tuh i.

¹⁷ “Hemi miphunte heh kinmah tahin tam ze ai akontih in hnawt ben tuh i ing, tiin ning lakah khai rel mah ih.

¹⁸ Anite heh kih mah ih; Bawipa ning Pathian in Egypt kumpibawi le a minungte vumah a bawnhnak thilte khiah ruat tu sawn ih.

¹⁹ Amahte vumah a hlenghnak, ning mit rori in ning hmuhnak a kihkul ursiate, ngaihsunurkul le khuaruahharkul pawl, Bawipa ning Pathian in a ban thahat le a huham mak roh in ning luatruaihnak pawl khiah ruat leh tu ih. Egypt mite a siatsuah sek bang thotho in he miphunte, ning kih rohhnakte heh siatsuah tuh sek i.

²⁰ Tunngal he bikraw hlat ai thinlauhnak le kihkulhnak amahte vumah hlengruai tuhai a piak siohnak le a relh hnelhnotute khai siatsuah tuh sek i.

²¹ Ciamanin hemite heh kih mah ih; Bawipa ning Pathian ning hnenah um i; ani tu huham lian Pathian i ai amah kih tuh sawn i si.

²² Hmai ning nor deuhdeuh fangin hemite tu nuam niuniu in hnawt tuh cekco i; ikhalselai vaikhat pah incen rek ben tuh lo i si. Vaikhat pah in rek berh fangin tu ramsa karhzai tuh diamdo ai ningmah ca a thincawlkul tuh lala i.

²³ Bawipa in ning ralte tu ning kut songah dah tuhai ning siatsuah sek hlanlo thincawl in umruai tuh i.

²⁴ A kumpibawite khai ning kut songah dah tuh i. Ningmah in rek tuh sek ai a hming khai pairal tuh sek i. Ning kham bentu aisu khai um tuh lo i; amahte veksen in cihmit tuh sek i si.

²⁵ Amahte milim hmuahhmuah khai mai ah tai sah tusek ih; milim vumai sui le ngun khai ir mah ih; ningmah ca lang mah ih. Lang le i sikhaw thang ning awk tuh i; zaimantifangin milim bia heh Bawipa in hua i.

²⁶ Hemi milimte tu ning inn songah hlengruai mah ih; hlengruai le i sikhaw cukcam mi a i bangin ning vumah cukcamhnak hleng tuh i. Milimte tu ning hua tuhhnak le ning ningdul tuhhnak i; zaimantifangin Bawipa in cukcamhnak i.