Daannolhnak 34 - Zanniat Bible

Moses Thihnak

¹ Moses tu Jericho khua an nisuah lam, Moab ram zawllai in Nebo Mual, Pisgah Mual phundir ah kai ai ciata ah Bawipa in ram pumpuhluk khiah hmuh i: Gilead ram Dan khua tian,

² Naphtali ram a veksen, Epharaim le Manasseh ramte, Judah ram, nitlak lamah Mediterranean Tifingriat tian:

³ Judah ram hlang lam, Negev phairawn le Tuumkung khuapui tiin kohnak Jericho zawllai le Zoar tian hmuh sio i.

⁴ Cen Bawipa in Moses hnenah, “Ning tefate hnenah ning pe tuh ing tiin Abraham, Isaac le Jacob hnenah cukcam in i thukhamhnak ram tu he ram ihang. Nang tu a hmu lek na hmuruai ing; a hleng tu hleng tuh lo isi,” tiin ti i.

⁵ Ciatihin Bawipa ai cengpa Moses tu, Bawipa ai a rel cia bangin Moab ramah thi i.

⁶ Bawipa in Moses tu Bethpeor khua ralden, Moab ram phairawn ah vui i; ikhalselai tunnia tian a hlanmual heh a konteng rori ah um i, ti a lingtu aisu khai um lo i.

⁷ Moses tu a thi fangin kum za le kum kul khim i. A thi fangin a tha khai duai lo, a mit khai mal lai lo i.

⁸ Israel mite in Moab phairawn ah ni sawmthum song Moses thi manin kahhnak le ngaihnak bawn tlang i. Cen amahte mithi ngai nia bo i.

⁹ Cen Nun ai fapa Joshua tu fimhnak rauhla in dim i, zaimantifangin Moses in a vumah a kut suan manin i. Israel mite in Joshua thu ngai tlang ai Moses hnenai Bawipa thupehnak heh hlun tlang i.

¹⁰ Israel mite lakah Moses bang prophet um awng lo i, zaimantifangin hmaiton rori in Bawipa thawn thu ruah dun i.

¹¹ Bawipa in Moses hlat ai Egypt kumpibawi, a kuthnia ai tlangsuakte le a ram pumpuhluk vumah ngaihsunurkul le khuaruahharkul a bawn bang heh aisu prophet inkhai bawn awng lo i.

¹² Israel mizapui mithmuh ah Moses in thil maksak le kihkul tampui a bawn bangin prophet dang aisu inkhai bawn awng lo i.