Daannolhnak 31 - Zanniat Bible

Jos In Moses Aiawh I

¹ Moses in a thurel pehzom ai anite hnenah,

² “Kai tu kum za le kum kul i khim zo ai i daih bangin zaikhai ti ben nawn lo ing. Ciahlaiah Bawipa in Jordan runpui tan tuh lo ihang si, iti zo i.

³ Bawipa ning Pathian tu ning hmaiah feh tuhai ciami ram heh a siatsuah hnuaah ning in khur tuh i si. Cen Bawipa ai a rel cia bangin Joshua tu ning hotu tuh ihang.

⁴ Bawipa in Amor kumpibawi Sihon le Og neh ai amahte ram khai a siatsuah sek bangin he miphunte tu neh tuhai siatsuah tuh sek i.

⁵ Bawipa in anite vumah nehhnak ning pe tuhai i rel cia bangin a vumah bawn tuh i si.

⁶ Hat ngai le ralpha ngai in um tu ih. Hemi miphunte heh kih mah ih. Ning Pathian Bawipa amah rori ningmah thawn feh tuh i. Ning zam tuh lo ai ning hnawl tuh lo i,” tiin ti i.

⁷ Cen Moses in Joshua heh ko ai Israel mizapui hmaiah heh a hnenah, “Hat ngai le ralpha ngai in um tu. Bawipa in ning pu le ning pa hnenah thu a kham zo bangin khia ram khurthilhnak tuhin he mizapui konghoitu tuh khiah nangmah tuh ihang si.

⁸ Bawipa ani tu na hnenah um tuhai kong na hoi tuh i. Na zam tuh lo ai na hnawl tuh lo i; ciamanin na thinnau maseh, na thin khai lau mah,” tiin ti i.

Kum Sarih Vel khat Siar Tuh

⁹ Cen Moses in Pathian ai dan heh ngan sio ai Bawipa ai Thutiam Kuang kilkhawltu Levi mi suangbawite le Israel hotute hnenah pe i.

¹⁰ Anite hnenah, “Kumsarih ah vel khat, Laiba Map Kum a hleng cang fangin hemi dan heh Ponhlam Puai can ah cawm roh in siar tu ih.

¹¹ Israel mite biahnak hmunah Bawipa bia tuhin kawi fangin amahte hmaiah siar tu ih.

¹² Aisu inkhai za sio ai Bawipa ning Pathian cawimawi thiamhnak tuhin le a thu ning ngaihnak tuhin pasal, nupang, naupang le ning lakai a ummi ramdang mi amahte veksen in kokhawm tu sio ih.

¹³ Bawipa ning Pathian ai dan a za awng lai lote ning tefate inkhai za tlang tuh i. Ciatihin Jordan runral ram khur ai a um song hmuahhmuah ah Bawipa kihzah thiam tlang tuh i,” tiin thupe i.

Moses Hnenin Hnuataber Thucah

¹⁴ Cen Bawipa in Moses hnenah, “A rai na nung tuh lo ihang. Joshua ko tulai Ponhlam ah koihpui tu, a relkulhnak rel tuh ing,” ti i. Moses le Joshua tu Ponhlam ah feh kawm ai,

¹⁵ Bawipa tu amahte hnenah mairo tom songin lar ai mairo tom heh Ponhlam dawngkham ah ding i.

¹⁶ Ciafangin Bawipa in Moses hnenah, “Nang tu na thi cing tuh ihang; na thi hnuaah he Israel mite in amahte thawn thutiam i bawnhnak heh bal tuhai hlotlau phun ah cang tuh i. Amahte khur tuhhnak ramai khuavangte bia tuhai kai tu i hnawl tuh i.

¹⁷ Ciabang thil a hleng fangin amahte vumah thin i raw tuh i, zam tuhai siatsuah tuh sek ing. Ursia a phunphun amahte vumah hleng tuhai ciafangin, ‘Pathian kaimah hnenah um lo manin ilo im hetlukin kin tuar?’ tiin ti tlang tuh i.

¹⁸ Ciatihin thilpha lo bawn ai a dang khuavangte bia manin anite hmu thil tuh loin i hmai thup tuh ing.

¹⁹ Ciamanin he la heh ngan tu. Amahte lamah ṭang lo ing ti hnikhnaihhnak ah Israel mite hnenah a thiam thai rori in zirh tulai amahte ka songah dah sah tu.

²⁰ Amahte pupate hnenai i thukham bangin he ram hnawiti le khoitizu luanghnak ramah hlengpui tuh ing. Cia ramah amahte duhzah aih tuh nai tuhai kham ngai le nuam ngai in um tlang tuh i. Ciafangin kai tu i zangtak tuhai a dang khuavangte bia tlang tuh i. Kai tu i hnawl tuhai i thutiam bal tlang tuh i.

²¹ Cen ursia a phunphun amahte vumah hleng tuh i. Ciafangin he la tu anite i ṭanpui lohnak larruaitu ah cang tuh i; zaimantifangin amahte tefate inkhai sa tlang tuh ṭiohnak la i. Tun inkhai i thukhamhnak ram a hleng hlanah khai amahte thinlung akon lam hoi i, ti ling zo ing,” tiin ti i.

²² Cia nia rori ah Moses in cia la heh ngan ai Israel mite zirh i.

²³ Cen Bawipa in Nun ai fapa Joshua hnenah, “Hat ngai le ralpha ngai in um tu. I thukhamhnak ramah Israel mite fehpui tulai na hnenah um tuh ing,” ti i.

²⁴ Cen Moses in Pathian ai dante tu labu songah ngan i. A panin a tawp tian ngan i.

²⁵ A ngan ben fangin Bawipa ai Thutiam Kuang a kilkhawltu Levi mi suangbawite hnenah,

²⁶ “Hemi Pathian ai dan laibu heh lang tu ilai Israel mite heh Pathian tawngcaitu i, ti larruaitu ah Bawipa ning Pathian ai Thutiam Kuang hiangah dah tu ih.

²⁷ Zaibang milungruh le mitawngcai phun i, ti ling zo ing. I nung laiah Bawipa heh hetluk tawngcai lekhaw i thi hnuaah tawngcai tuh amam i.

²⁸ Na hinte songin hotu le upate hmuah i hmaiah taikhawm tu ilai he thute khiah rel tuh sio ing; amahte hnenah i ṭang lohnak lingpuitu ah lai le van ko tuh ing.

²⁹ Ningmah heh i thi hnuaah mipha lo ngai ning cang tuhai i zirhhnak hmuahhmuah bal tuh sio i si, ti ling ing. Bawipa ai ning khamhnak bawn in a thin ning rawtiar manin hmai lam can ah bawngsiahnak ning vumah hleng tuh i,” ti i.

Moses Ai La

³⁰ Cen Moses in a hnia lamai late tu a tawp tian siar ai Israel mite in phatak ngai in ngai tlang i: