Daannolhnak 30 - Zanniat Bible

Tungdinglehhnak Le Hmuifu

¹ “Ning ril tuhhnak ah thilte pahnih: hmuifu le cukcamhnak ning pe ing. Hemite ning vumah a hleng fangin le Bawipa ning Pathian in ning piakruaihnak ramai ning um fangin he i relhnak tu hih tuh i si.

² Cen ningmah le ning tefate tu Bawipa hnenah let tuhai ning thinlung le ning nunhnak a veksen in tunnia ai i pehnak Bawipa ai thukhamte heh hlun tuh i si.

³ Ciafang ian in Bawipa tu ning vumah ninghiohnak thinlung nai tuh i. Ning piakhnak ram an ning tlungruai leh tuhai mi nainung in um leh tuh i si.

⁴ Laivum a rong le a tong ai piakhnak ning ita inkhai Bawipa ning Pathian in ning funkhawm leh tuh i.

⁵ Ning pupate um awng hmun ramah um leh tuh i si. Cen ning pupate tahin ning lian tuh deuh ai ning tam deuh tuh fawn i.

⁶ Ning thinlung veksen le ning nunhnak veksen in ning it thil tuhin le ning nung thil tuhin Bawipa ning Pathian in ningmah le ning tefate ai thinlung zarhtanhnak bawn tuhai amah thu ngainuamhnak thinlung ning pe tuh i.

⁷ Hemi cukcam mite tu ningmah ning hotu le ning naunehtu ning ralte vumah Bawipa in hlengruai tuh sio ai,

⁸ tunnia i pehnak dan le a thupehnak tu ngai tuhai hlun leh tuh i si.

⁹ Ning naperhnak cangcang ah Bawipa in hlawhtlinghnak ning pe tuhai tefa le sumhnam tampui nai tuhai ning lo in rong tampui suak tuh i. Ning pu le ning pate nainung ngai ai a bawn fangin a lungawi bangin ningmah nainung ngai ai ning bawn tuhhnak ahkhai a lungawi ngai tuh i.

¹⁰ Ikhalselai a thuzirhhnakte nganhnak he laibu songai dan hmuahhmuah hlun ai a thu ngai kul tuh i si. Ning thinlung le ning nunhnak tu a veksen in amah hnenah pe tu ih.

¹¹ “Tunnia ai i pehnak dan heh a har ze ilo i; ning hlun ben tuh lohnak khai ilo i.

¹² A sang ze ai van ban khai ilo i. ‘Kin bil in za ai kin hlunthilhnak tuhin aisu in van kai ai kin ca kin tlut tuh ini?’ ning ti tuhhnak um lo i.

¹³ Tipuithuanthum ralkhat ai umhnak khai ilo i. ‘Kin bil in za ai kin hlunthilhnak tuhin aisu in tipuithuanthum ralkhat ah feh in kin ca kin tlut tuh ini?” ning ti tuhhnak um lo i.

¹⁴ A nong niu ah um i: ning ka song le ning thinlung songah um i. Ning hlun tuh ian sam i.

¹⁵ “Tunnia ah a hnawm le a pha, nunhnak le thihhnak ril tuh ning hnenah ning pe ing.

¹⁶ Bawipa ning Pathian ai thukham, tunnia i pehnak heh hlun ai amah it i si, a thu ngai ai a dan bawn le i sikhaw ning khangso tuhai miphun lianpui ning cang tuh i. Bawipa ning Pathian in ning khur tuhhnak ramah heh hmuifu ning pe tuh i.

¹⁷ Ikhalselai a thu ngai loin ning thinlung hmundang hoi in khuavang dangdang khai bia le i sikhaw,

¹⁸ tunnia ah fel ngai in ning rel ing: ci ning hmit tuh sio i. Ning khur tuhhnak ram Jordan runpui ralkhat ah can sau ning nung tuh lo i.

¹⁹ Tunah ning ril tuhhnak nunhnak le thihhnak, ihlahle Pathian ai hmuifu le cukcamhnak ning pe ai ning rilhnak ning lingpuitu ah lai le van ko ing. Nunhnak ril tu ih. Ciatihin ningmah le ning tesinfate ning nung tuh i.

²⁰ Bawipa ning Pathian it tu ilai a thu ngai in ani tu kho ngai in pom tu ih. Pathian tu ning nunhnak i ai ning pupate Abraham, Isaac le Jacob hnenah a thukhamhnak ramah kum raipui ningmah le ning tefate nunkhua sau in um tuh i si,” tiin ti i.