Daannolhnak 28 - Zanniat Bible

A Hluntu Ca Hmuifuhnak

¹ “Tunnia i pehnak thukhamte heh fel ngai in hlun ai Bawipa ning Pathian ai thu ngai le i sikhaw laivum ai miphun hmuahhmuah tahin lian deuh in ning bawn tuh i.

² Bawipa ning Pathian thu ngai tu ilai hmuifu a phunphun co tuh i si.

³ “Bawipa in ning khua le ning ramte hmuifu ning pe tuh i.

⁴ “Bawipa in fanu fapa, rong a phunphun le kawlpaw le tuurual hmuifu ning pe tuh i.

⁵ “Bawipa in na bawm le na hleng khai hmuifu pe tuh i.

⁶ “Bawipa in naper na sihnak hmuncang ah hmuifu na pe tuh i.

⁷ “Na tawngtu na ralte heh Bawipa in na neh sah tuh i. Hmunkhat in na nor inkhai hmun sarih in tlan leh tuh sek i.

⁸ “Bawipa in na naperhnak hmuifu pe tuhai na rongbente heh rong in dim tuh sio i. A pe tuhhnak ram songah hmuifu ngah tuh i si.

⁹ “Bawipa ning Pathian thu ngai ai a thupehnak hmuahhmuah hlun in a lampui ah feh le i sikhaw a thukham cia bangin amah minung ah ning bawn tuh i.

¹⁰ Ciafangin laivum ai minung hmuahhmuah in Bawipa in amah minung cang tuhin ning ril khiah a hmu fangin ning kih ngai tuh i.

¹¹ Bawipa in na pu na pate a thukhamhnak ram songah hmuifu ning pe tuhai ning purmawng tuh i; tefa tampui, sumhnam tampui, le rong tampui nai tuh i si.

¹² Bawipa in van ai a robawm, van khiah hong in a tikcucan ah ruah siruai tuhai ning naperhnak hmuahhmuah ah hlawhtlinghnak ning pe tuh i. Ciatihin miphun tampui hnenah thilri put tuh i si, ikhalselai ning in tu pu tuh lo i si.

¹³ Bawipa ning Pathian in miphun tampui lakah konghoitu ah ning bawn tuh i; mi hluntu tuh lo i si. Tunnia i pehnak thukhamte heh fel ngai in hlun le i sikhaw ning khangso tuh ngio i; a khupsuk lam i tuh lo i si.

¹⁴ Hemi dante tu zaikom inkhai bal mah ih; khuavang dangdang khai bia in ruaih mah ih.

Thungai Lo Pawl Tuar Tuhhnak

¹⁵ “Ikhalselai tunnia i pehnak dan le thukhamte fel ngai in hlun loin Bawipa ning Pathian thu ngai hlahle i sikhaw he cukcam mite ning hnenah hleng tuh i.

¹⁶ “Bawipa ai cukcamhnak tu ning khua le ning ramah hleng tuh i.

¹⁷ “Bawipa ai cukcamhnak tu ning bawm le ning sangvut cokhnak hlengkhur vumah hleng tuh i.

¹⁸ “Bawipa ai cukcamhnak tu ning songsuak fate vumah ituseh, ning lo rong vumah ituseh, ning kawlpaw le ning tuuniute vumah ituseh hleng tuh i.

¹⁹ “Bawipa ai cukcamhnak tu ning luthnak ah hleng tuhai ning suakhnak ahkhai hleng tuh i.

²⁰ “Thil siava ning bawn ai Bawipa zangtak le i sikhaw ning pairal sek hlanlo Bawipa in ning vumah bawngsiahnak, buaihnak a phunphun le thinpit vansanghnak hlengruai tuh i.

²¹ Ning khur tuhhnak ram songah pakhat khai ning tang nawn lo tianin ning vumah zazul ursia pakhat hnua pakhat hlengruai tuh i.

²² Bawipa in mi fuk thai urhnak, kawlfawi hlawng urhnak, hlengruai tuhai; ning rongkungte heh ro ai, car ai, kaurau tuhai hnawm tuh sio i. Hemi harsahnak tepawl tu ning thi sio hlanlo ning hnenah um tuh ngio i.

²³ Ning vumai van heh dar bangin kho tuhai ning ke hnia ai laipua khai thir bangin hak tuh i.

²⁴ Ning hnawmral sek hlanlo Bawipa in laivut le runsiat heh ruah hrangah siruai tuh i.

²⁵ “Bawipa in ning ralte hnenah ningmah vumah nehhnak pe tuh i. Hmun khat in nor le i sikhaw hmun sarih in tlan tuh i si; cen ram cangcang ah ning vakvai tuhai mi zongzong ca laukul ngai i tuh i si.

²⁶ Ning thi fangin ning luangte tu laivum ai a vakmi ramsa in ituseh, van ai a zuangmi vaniute in ituseh ning ai tuhai a hungtu aisu khai um tuh lo i.

²⁷ Egypt mi hnenah a hlengruai bangin Bawipa in ning hnenah uihlut hlengruai tuh i. Ning taksa vumah a hnai khuar tuh hluahhlo i; ning ruang tu thakpherh hmaihma in dim tuh sio ai ning thak roh tuh i; ikhalselai lawm thil tuh lo i.

²⁸ Bawipa in ning thinlung am thai in ning bawn tuh i; mit ning vai tuhai lungmu taw in ning um tuh bial i.

²⁹ Mitcaw bangin sunlaivar ah vak tlang tuhai ning lampui hmu thil tuh lo i si. Zaibang thil ning bawn ta inkhai hlawh ning tling tuh bul lo i. Naunehmi le thil longhnak tuartu ṭio ning cang tuhai ning osuaktu aisu khai um tuh lo i.

³⁰ Na thawlthanhnak fenu khai midang in sualpui tuh i. Inn sa khalsikhaw a songah um tuh lo i si. Cabit vuandum bawn khal sikhaw a thai ai tuh awng lo i si.

³¹ Na kawlpawte tu na mithmuh in na ro sah tuhai a sa ai ngah tuh awng lo i si. Na laakte khai na mithmuh ah na duk sah tuhai na pe leh tuh lo ihang. Na tuute tu na ralte hnenah pe tuhai aisu inkhai na osuak tuh lo i.

³² Na fanu fapate tu na mithmuh rori ah ramdang mite hnenah pe tuh i. Let leh ni ngai maw tiin na mitri cat dawn tian nisiar in hlir khalsilai na hlir man um tuh lo i.

³³ Hlaici harsa ngai ai na cinghnak tepawl tu ramdang mi in na sut tuhai na ngahhnak zaikhai um loin zohsuamhnak le siatsuahhnak ian tuar tuh ṭio i si.

³⁴ Ciatihin na tawkhnak thute manin na molh tuh i.

³⁵ Bawipa in na keruhte tu a cak thai lo, a ur thai roh hmaihma in dimruai tuh i. Na sipburuh in na kezapham tian ciabang hmaihma in dim tuh i.

³⁶ Bawipa in ningmah ituseh, ningmah ning uktu tuhai ning dahhnak ning kumpibawi ituseh, ning pupate rin um awng lohnak, a dang miphunte ramah ning hnawt tuh sio i. Ciata ah thing le lung ai bawnhnak milimte bia tlang tuh i si.

³⁷ Bawipa in ram cangcang ah ning piakruai tuh sek ai ciami heh mi in ning hmu fangin khuaruahhar in hnih ning cip tuh i. Cen mi ai naunehhnak le zonsuamhnak tuar tuh i si.

³⁸ “Hlaici tampui cing tuh napui ning rong heh khokhuak in ning ai sah tuh sek ai ning khawmhnak rong tu a tlawm cirikniu lek tuh i.

³⁹ Cabit vuandum bawn in pha bik khalselai pangang in ning ai sah tuh sek i; cabit thai a loih pha um tuh lo ai cabitti khai ding ngah tuh lo i si.

⁴⁰ Ning ramsong khuahacang ah olive thing po tuh i, ikhalselai a thai tu theh tuh sek ai olive siti zaikhai ngah tuh lo i si.

⁴¹ Fanu le fapa cawi tuh napui ralpom mi cang tuh sio ai ningmah ai i tuh lo i.

⁴² Ning thingkung le ning rongkungte tu khokhuak in ai tuh sek i.

⁴³ Ning ramsong ai ramdang mite tu khangso tuh amam ai ning tu ning khupsuk tuh deuhdeuh i.

⁴⁴ Anite tu mi paisa puttu cang tuhai ning tu a putu ning cang tuh i. Anite tu mi konghoitu cang tuhai ning tu a hluntu ning cang tuh i.

⁴⁵ Bawipa ning Pathian thu ngai loin a dan le a thukhamte felfai ngai in ning hlun lo manin bawngsiahnak pakhat hnua pakhat ning vumah hleng tuhai ciatihin ning pairal tuh sek i.

⁴⁶ Hemi bawngsiahnak tu ningmah le ning tesinfate vumah Pathian cawhhnak hleng i ti hnikhnaihhnak ah kumzangza in ning hnenah um tuh ngio i.

⁴⁷ Bawipa ai hmuifu heh a phunphun in co tuh i si; ikhalselai lungawi ngai in bia lo ai thatho ngai thinlung thawn ruaih lo i si.

⁴⁸ Ciamanin Bawipa in ning hnenah a hlathnak ning ralte ruaihtu ning cang tuh i. Rikam tihal in ning um tuh i; silhfen hnikpon nai loin kawngkolh in le thil dang hmuahhmuah khai tlasam ngioṭio in ning um tuh i. Ning ralte in ning siatsuah tuhai ning bo hlanlo ning hawng ah thirkawn ning orh tuh i.

⁴⁹ Bawipa in vanham tong ai ummi miphunte heh ningmah cawh tuhin hlat tuh i; a pon rin ning ling awng lohnak miphunte khiah! Mupui ai ar a dawp bangin ning dawp tuh i.

⁵⁰ Mithmai ti riamruam phun, nutar patar naupang vum ahkhai ngaihhar thai lo le mi ninghio thiam lo phun pawl tuh i.

⁵¹ Ning sumhnamte le ning rong ning ai sah tuh sek manin rong loin ning thi tuh i. Ning ca rong le cabitti le olive siti, kawlpaw le tuu zaikhai a zuahhnak um tuh lo ai ci ning mit tuh i.

⁵² Bawipa ning Pathian ai a ning pe tuhhnak khuapuite khai pakhat khai tang loin kulh tuh sio i; sim tuhai ning rinsanhnak ving puipui khai min tuh sek i.

⁵³ “Ning ralte in ning khuapuite a kulh sio fangin rong loin van ning sang tuhai Bawipa Pathian ai a ning pehnak ning fate sa rin ai tuh i si.

^54-55 Zaibang mi upa, miphun pha le phun u ita inkhai ralte in a khua kulh sio fangin aican in thinpit vansang in a um fangin rong ai tuh nai lo manin amah song suak a fa rori khai ai tlang tuh i; a fate sa tu a unau le a ithnak a nupui le a tanglaimi a fate khai sem tuh lo i.

⁵⁶ Zaibang in nupang phun pha le phun u, a nai ze manin a ke in laipua fon awng lomi ita inkhai ciabang thotho in a fate sa heh ai tuh ve i. A ithnak a pasal le a dang fanu fapate khai sem tuh lo i.

⁵⁷ Ralte in a khua kulh sio fangin rong loin a vansang ze tuh manin a te sawng a faniu khai ai tuhai amah sul tianin ai tuh i. Ciami khai aisu khai sem loin a thupniu in ai tuh i.

⁵⁸ “Pathian ai thuzirhhnakte he laibu songai nganhnak fel ngai in hlun tu ilai ngaihsunurkul le a kihkul Bawipa ning Pathian hming heh upat tu ih.

⁵⁹ Hlun hlahle i sikhaw ningmah le ning fate vumah a cak thil nawn lo le a laukul urhnak a phunphun tlungruai tuh i.

⁶⁰ Egypt ramai ning tawkhnak ursia hmuahhmuah ning vumah hlengruai tuhai ning cak thil tuh lo i.

⁶¹ Hemi Pathian dan le thukhamte nganhnak laibu songai a tel lo ursia a phunphun ning vumah hlengruai tuhai ning bo tuh rori i.

⁶² Van ai arsite zah in tam khal i silai Bawipa ning Pathian thu ngai hlahle i sikhaw a tlawm cirikniu lek ning tang tuh i.

⁶³ Ning lianruaihnak le ning pungzairuaihnak ah Bawipa tu a lungawi ngai i; ciatih bangin ningmah pairal tuh le siatsuah tuhin khai a lungawi tuh thotho i. Ning khur tuhhnak ram songin ning phorhsuak tuh sio i.

⁶⁴ “Bawipa in vanhamtong khat lamin vanhamtong a khat lam tian ning piakruai tuh sek ai cia ramah ningmah in ituseh, ning pupate in ituseh, ning ling awng lohnak le ning bia awng lohnak, lung le thing ai bawnhnak khuavang dangdang bia tuh i si.

⁶⁵ A konteng ah khai thinnuamhnak hmu tuh lo ai kin khua kin ram tihnak nai tuh lo i si. Bawipa in thinlauhnak, mitvaihnak le vansang thinpithnak in ning dimruai tuh i.

⁶⁶ Ning nunhnak tu thinpithnak lekin dim tuh i. A sun a zan in ning hlawng tuh derdo ai thi tuh lau in thincawl in um tuh i si.

⁶⁷ Zaibang thil ning hmu inkhai ning hmu sawngpah in thinlau in ning hlawng tuh i. Zan lam fangin, ‘Zing lam hang selai aw,’ ti tuhai zing lam fangin, ‘Zan lam hang selai aw,’ ti tuh lala i si.

⁶⁸ Feh leh tuh nawn lo i si tiin thu ning kham zo napui lawng thawn Bawipa in Egypt ram sal cang tuhin ning kuat leh tuh i. Ciata ah ning ralte hnenah sal cang tuhin zuar dun hnelhno khal i sikhaw ning laitu aisu khai um tuh lo i, tiin ti i.