Daannolhnak 26 - Zanniat Bible

Rong Thar Pehnak

¹ “Bawipa ning Pathian in ro ai ning pehnak ram ning khur ai ning um hnuaah,

² ning loram ai suakhnak rong thar hmuahhmuah heh bawm songah thun tu ilai ning Pathian biahnak hmunah koih tu ih.

³ Ciata ai naruaihtu suangbawi hnenah, ‘Kin pu le kin pate hnenah pe tuhin na thukhamhnak he ram hleng ihang ing, ti hmuhhnak in he thil heh Bawipa i Pathian hnenah na pe ing,’ tiin ti tuseh.

⁴ “Ciafangin na bawm heh suangbawi in awh tu selai Bawipa na Pathian ai puleng hmaiah dah tuseh.

⁵ Cen Bawipa na Pathian hmaiah nang in, ‘I pupate tu Aram mi i ai, inn nai lo mivakvai i. Egypt ram a feh fangin a innsang tu minung tlawmniu lek i. Ikhalselai Egypt ram songah mi tampui le miphun lianpui cang i.

⁶ Cen Egypt mite in kin reem ai sal kin can i; naper har kin perruai i.

⁷ Bawipa, kin pu le kin pa ai Pathian hnenah au tlang ai kin aw kin ngai sah i; kin tuarhnak, kin harsahnak, le kin rimsuhnakte hmu i.

⁸ Ciamanin a huham le a hathnak ban pharh in ngaihsunurkul thil khuaruahhar le laukul ngai thilte heh bawn ai Egypt ram an kin suah i.

⁹ Hemi ramah kin hlengpui ai hnawiti le khoitizu luanghnak ram kin pe i.

¹⁰ Ciamanin amah Bawipa in a kin pehnak rong tharte heh Bawipa hnenah pe i ing,’ tiin kihzahhnak thawn ti tuh i si. “Cen Bawipa ning Pathian hmaiah na bawm hma tulai Bawipa khiah na lu ut in bia tu.

¹¹ Cen Bawipa ning Pathian in hmuifu a phuncang na pe manin na innsang le Levi mite le ningmah lakai ummi ramdang mite thawn lungawi aipuang in lawm tlang tuh i si.

¹² Kum thumhnak ah ning lo rong sawm ah pakhat heh Levi mi, ramdang mi, nu le pa nai lo farah le hmaitongte hnenah pe tuh i si. Ciatihin amahte kul zah in cia khua songah aih tuh nai tuh ṭen i. Ciatihin ning bawn ben fangin,

¹³ Bawipa ning Pathian hnenah, ‘Sawm ah pakhat cianghlim heh i inn ah zaikhai tang lo ihang; Levi mi, ramdang mi, nu le pa nai lo farah le hmaitongte hnenah thu na pehnak bangin pe zo sek ing. A cianghlimmi sawm ah pakhat thu ah na thupeciahnak bangin bawn zo sek ing, pelhhnak nai lo ing, haihnak khai nai lo ing.

¹⁴ Mithi ngai in i um lai ahkhai sawm ah pakhat songin i aihnak um lo i; i cianghlimlo lai can inkhai i inn in hmundang ah i thiarhnak um lo ai mithi i siahhnak khai um lo i. Aw Bawipa i Pathian, na thu ngai ai, na thupeciahnak hlun sio ing.

¹⁵ Vancung na umhnak thianghlim, vancung in Israel na minungte tu hmuifu pe tulai kin pi le kin pute hnenai na thukhamhnak bangin he ram hnawiti le khoitizu luanghnak ram khai hmuifu pe tu hram,’ tiin ti tu ih.”

Bawipa Ai Miphun

¹⁶ “Tunnia ah Bawipa ning Pathian ai a ning pehnak dan hmuahhmuah hlun tuhin ning ruai i. Ciamanin ning thinlung le ning nunhnak veksen thawn pom in hlun tu ih.

¹⁷ Tunnia ah Bawipa tu ning Pathian tuhin ril zo i si. A thu ngai tuhin le a dan le a thukhamte hlun tuhin thukham zo i si.

¹⁸ A thukhamhnak bangin tunnia ah Bawipa in amah minung taktak, a songlawi mi cang tuhin ning pom i. Ciamanin a dan hmuahhmuah hlun tuhin ning ruai i.

¹⁹ Laivum ai a semsuahhnak miphun hmuahhmuah tahin hmun sang deuh ah ning dah i. A thukhamhnak bangin ningmah heh amah ai miphun ning cang tuhai amah hming a thangphattu le a cawimawitu tuh i si,” tiin ti i.