Daannolhnak 24 - Zanniat Bible

Madunhnak Le Hoidunlehhnak

¹ “Pasal pakhatkhat in nupui hoi ai can a rai deuh fangin pakhatkhat a ngaih lo zawng um manin a nupui tuhin daih nawn lo i. Ciafangin a mahnak lai ngan in pe ai a inn in hnawt i.

² Cia hnuaah pasal dang nai i.

³ Cia a pasal inkhai daih lo ai mahnak lai ngan in pe ai a inn in hnawt nengno i. Santehhnak ah a pasal hnuata thi i ti singlai,

⁴ zaibang thu a um ta inkhai a pasal hmasa thawn hoi dun leh hrimhrim maseh; amah ca nupang nu heh a ningrim zo i. Hoi leh thotho lekhaw Bawipa hmaiah a ningdulkul i. Hebang sualhnak manin Bawipa ning Pathian ai a ning pe tuhhnak ramah mawhhnak hlengruai tuh lo i si.

Dan Dangdang

⁵ “Nupui hoi sawngniu khiah ralkap ah fehruai tuh lo i si; A dang naper tuh inkhai fehruai mah ih. Inn ah um in a nupui thinnuamruai tuhin kum khat song olh tuh i si.

⁶ “Mi pakhatkhat in thil ning pu fangin fangrialhnak lungto heh thukhamdunhnak in lang tuh lo i si, zaimantifangin a pumcawmhnak i.

⁷ “Aisu inkhai a unau Israel mite heh ru ai sal cangruai i, ihlahle sal ah zuar lekhaw amah khiah rek tu ih. Ciatihin thil sual boruai tuh i si.

⁸ “Ning lakah miphar um pang lekhaw suangbawi in ning ruaihnak bangin bawn tu ih; kaimah in dan pe zo sio ai ciamite tu hlun tu ih.

⁹ Egypt ram an ning suak laiah Bawipa ning Pathian in Miriam vumah akontih in bawn i ti khiah hai mah ih.

¹⁰ “Mi pakhat hnenah thil pakhatkhat put ai thukhamdunhnak a silhpon na pe tumhnak khiah a inn songah lut in lang mah.

¹¹ A inn pualam ah um tulai amah in na pe tuseh.

¹² Mi farah lekhaw a pon heh zan tian na hnenah dah mah.

¹³ Zan ithnak a nai tuhhnak in nitla sawng fangin khirh leh tu. Ciatihin bawn lesikhaw zan ih pon nai tuhai na vumah a lungawi tuhai Bawipa ning Pathian khai a lungawi tuh i.

¹⁴ Na unau Israel mite ituseh, ramdang mite ituseh, na khua songah a ummi nihlawh na ruaihnak mi harsa le mi tlasamte ai hlawhman heh cawh in hen meng mah.

¹⁵ Nisiar in a nihlawh heh nitla hlanah pe tu. Cia paisa heh a nunhnak ca kul ai ciami niu lek ring i. Pe hlahle sikhaw Bawipa hnenah au in ngen tuhai mawhphurtu heh nangmah tuh i si.

¹⁶ “A fate sualhnak manin a nu le a pa rek tuh lo i si; A nu le a pa suakhnak manin khai a fate rek tuh lo i si. Mi pakhat khiah amah sualhnak man ian in rek tuh i si.

¹⁷ “Ramdangmi le nu le pa nai lo farahte ai co tuhhnak vo heh dik ngai in ruat sah tu ih; thukhamdunhnak ah hmaitong nu ai silhpon lang sah tuh lo i si.

¹⁸ Sal ning tanghnak Egypt ram an Bawipa ning Pathian in luang ning suah khiah ruat tu ṭio ih. Ciamanin he dan ning hnenah i pehnak i.

¹⁹ “Rong ning khawm fangin ning atciahnak songin ning khawm haihnak um lekhaw let leh in lang leh mahang ih. Bawipa Pathian ai hmuifu heh ning per ning merhnak hmuncang ah umthilhnak tuhin, cia rong heh ramdang mi, nu le pa nai lo farah le hmaitongte ca hlup tu ih.

²⁰ Olive khai vel khat ning loih hnuaah a tanghnak loih leh mahang ih; ramdang mi, nu le pa nai lo farah, le hmaitongte ca cang tuseh.

²¹ Cabit na loih fangin vel khat na loih hnuaah si leh mahang; a tanghnak cabit heh ramdang mi, nu le pa nai lo mifarah, le hmaitongte ca tuhin zuah tu.

²² Ningmah khai Egypt ramah sal ning tang khiah hai hrimhrim mah ih. Ciamanin he dan ning pe ing.