Daannolhnak 22 - Zanniat Bible

¹ “Israel mite na unau pakhatkhat ai kawlpaw ihlahle tuu suak lekhaw sik menma mah; amah hnenah tlut leh tu.

² A naitu pa umhnak a hla ze ihlahle a naitu pa ling hlahle sikhaw na inn in tlun tu. A naitu pa in si lekhaw pe tu.

³ Na unau Israel mite pakhatkhat ai siphuh, hnikpon ihlahle thil dangdang a pai fangin cia bangpah in bawn tu.

⁴ “Na unau Israel mite pakhatkhat ai kalauk ihlahle kawlpaw lampui ah sawn lio lekhaw hlum loin tho bawm tu.

⁵ “Nupang in pasal hnikpon sil mah ih; pasal inkhai nupang hnikpon sil mah ih. Bawipa ning Pathian in ciabang heh hua i.

⁶ “Thingkung vumah ituseh, lailak ah ituseh, vaniu bu hmu ai a pui in a ti op teng, ihlahle a faniute um lekhaw a pui heh pom mah ih.

⁷ Na daih bik lekhaw a faniute luak tu; ikhalselai a pui tu hlat tu; ciatihin na nun na nuam tuhai na nunkhua sau tuh i.

⁸ “Inn thar na sa fangin na innphu vumah dihlikhai in kulh tu. Innphu in mi pakhatkhat tlok ai thi lekhaw mawh phur tuh lo i si.

⁹ “Na cabit vuandum songah cabit le hlaici dang cing tlang mah ih. Cing tlang le i sikhaw cabit ituseh, na cinghnak rong dang khai ituseh a zarhmi cang tuhai na sung tuh i.

¹⁰ “Lailethnak ah kawlpawcang le kalauk hmang tlang mah ih.

¹¹ “Tuuhmul le vori ai takhnak hnikpon hmang mah ih.

¹² “Na silhnak ponhmurte pali ah a mai bawn tu.”

Nu le Pa Pawldun Hrang Dan

¹³ “Mi pakhat in fenu pakhat hoi ai a nupui can hnuaah daih leh lo fangin,

¹⁴ mawh a phunphun hluk ai, ‘I hoi sawng ah fenu him ilo i tiin a thangsiat i.

¹⁵ “Ciabang lekhaw, fenu nu ai nu le pa in fenu him ti larruaihnak ah a hoi dun zan a ihphah khuk heh khua upa thukhantute hmaiah koih tuseh.

¹⁶ Ciafangin nupang nu ai pa in, ‘I fanu heh hemi pa hnenah pe ing, ikhalselai tun tu a nupui tuhin daih nawn lo i.

¹⁷ I fanu heh sualsi ai a hoi dun laiah fenu him ilo i, ti i. Ikhalselai i fanu tu pasal a nai hlanah fenu him i tithilhnak nai ing’ ti tuhai a hoi dun zan ai hmanghnak ihphah khuk heh upate hmaiah pharh tuh i.

¹⁸ Cen khua upate in ciami a pasal heh pom tuhai vit tuh i.

¹⁹ Ciahlaiah ngun tangka zakhat cawh tuhai cia tangka heh fenu nu ai a pa pe tuh i, zaimantifangin Israel nupang pakhat vumah zakthihnak hlengruai i. Cen a nupui cang tuh thotho ai a nunsong hmuahhmuah ma thil tuh lo i.

²⁰ “Ikhalselai a pasal ai sual a sihnak heh dik ai a nupui heh fenu him rori i tiin fiangruaihnak um peu hlah lekhaw,

²¹ ciami nu khiah suahpui tuhai a pa inn dawngkham hmaiah khua songai pasal hmuahhmuah in a thi tian lungto in sep tlang tuseh. A pa inn ah a um lai, pasal a nai hlanah nupa sualhnak a bawn manin i miphun vumah zakthihnak hlengruai i. Ciatihin ciabang thil sual heh boruai tuh i si.

²² “Mi pakhat in pasal a naimi nupang thawn sual kawm lai hmu le i sikhaw amahte pahnih in rek kawm tu ih. Hebang thil ningrim heh boruai tu ih.

²³ “Mi pakhat in midang thawlthan sa nupang pakhat thawn khua songah a sual kawm lai hmu le i sikhaw,

²⁴ hnarpua ah suahpui tu ilai amahte pahnih in a thi tian lungto in sep tu ih. Midang hmuh hmun khua songah i ai midang in bawm tuhin au thil napui au lo manin nupang nu heh thi kul i. Pasal pa khai midang thawlthan cia nupang sualpui manin thi kul i. Ciatihin hebang thil ningrim heh boruai tuh i si.

²⁵ “Pasal pakhat in hampalak ah midang hamciami nupang pakhat tawk in pom ai sualpui lekhaw, ciami pasal pa lek rek tuh i si.

²⁶ Nupang nu vumah zaikhai bawn tuh lo i si; rek tlak in ziang sualhnak khai bawn lo i. Hemi thu tu ziang thawn bang dun i tifangin pasal pakhat in midang zoi ai a rek thawn bang i.

²⁷ Pasal pa in hampalak ah nupang nu heh pom ai sualpui ai i bawm tu i law tiin au khalselai aisu khai a bawmtu tuh um lo i.

²⁸ “Pasal pakhat in aisu inkhai ham lomi fenu pakhat pom ai sualpui lekhaw,

²⁹ ngun tangka sawmnga a pa hnenah pe tuseh; cen khengkhebel in sualpui imanin a nupui ah cang tuhai a nun song hmuahhmuah ma thil tuh lo i.

³⁰ “Aisu inkhai a pa ai nupui pakhatkhat sualpui in a pa vumah zakthihnak hlengruai maseh.”