Daannolhnak 21 - Zanniat Bible

Mirektu Ling Lo Thawn Pehparhnak

¹ Bawipa ning Pathian in ning khur tuhai a petuhhnak ram songah mi pakhatkhat hampalak ah rek ai a rektu ling hlahle i sikhaw,

² ning hotu le thukhantute tu cia mithi luang umhnak ah feh tu selai a hiangai umhnak khuate zaizah hla i, ti khiah teh tu ngiarngo seh.

³ Cen mithi luang umhnak thawn a nong ber khua songai upate in naper a perruai lai lo, hak a hawng ah a khit awng lai lohnak kawlpawcang niu lu khat ril tuseh.

⁴ Duk tuhai ti a kang awng lo rawnti ah fehpui tu selai rawn hiang lovai awng lohnak le rong cing awng lohnak hmunah a hawng merh in ro tuh i si.

⁵ Cen Levi hin suangbawite kawi tuh i, zaimantifangin haudunhnak thu ah ituseh, lukhoi bilzik thu ah ituseh, anite tu thukhantu tuh i. Bawipa ning Pathian in amah ruaih tuhin le amah hming in hmuifu petu tuhin a rilmi i.

⁶ Cen mithi luang thawn a nong ber khuasong upate in a rohnak kawlpaw vumah amahte kut som tu selai,

⁷ hemi pa rektu heh kinmah ilo i ing; a rektu aisu i ti khai ling lo i ing,

⁸ Ciamanin maw Bawipa, Egypt ram an na osuakmi Israel na minungte heh ngaithiam tu. Mawh nai lomi ai thisan heh kin vumah hlengruai hram malaw,’ ti tuh i.

⁹ Ciatihin Bawipa hmaiah thudik ning bawnhnak thawmin mawh nai lo pa ai thisan suak manin mawhhlukhnak in ning luat tuh i.”

Ralpom Mi Nupang Thawn Pehparhnak

¹⁰ “Bawipa ning Pathian in ning ralte vumah nehhnak ning pe fangin ning pomhnak tampui um tuh i.

¹¹ Ningmah lakai mi pakhatkhat in ning pommi lakah nupang hmel pha pakhat hmu ai a nupui tuhin hoi nuam lekhaw,

¹² a inn ah tlungpui tu selai cia nu in a sam met in a tin cem tuseh.

¹³ A hnikpon khai thleng tuseh. Cen raltawnghnak ai a thimi a nu le a pa ngai in hlakhat song pasal pa inn ah um tuseh.

¹⁴ Leh hnuaah a nupui tuhin daih leh hlah lekhaw dap niu in fehruai tuseh. A thangsiatiar zo manin sal bangin hnawmcan tuh lo ai zuar khai zuar maseh.

Fapa Upaber Ai Rothil Thawn Pehparhnak

¹⁵ “Santehhnak ah pasal pakhat in nupuite pahnih nai ai a pahnih in fapa nai kawm veve i; ikhalselai a daih lo deuh a nupui ai naihnak fapa heh upa deuh i.

¹⁶ Ciatih ilekhaw a fate hnenah rothil a zem fangin daih deuhmi nai maseh; fapa upa ber ai co tuhhnak rothil heh fapa upa ilomi a daih deuhmi a nupui ai fapa hnenah pe maseh.

¹⁷ A daih deuhmi a nupui ai fa ilo inkhai a fapa upa ber heh midang cohnak tahin a let hnih in a rothil songin pe tuseh. Zaimantifangin a nam hmasaber fapa i ai fapa upa ber covo heh amah ai i.”

Thu Ngai Lo Fapa Thawn Pehparhnak

¹⁸ “Mi pakhat in fapa nai ai ciami a fapa heh nunthutiam in zirh khalselai nu le pa thu ngai nuam lo ai akontih in khai ti thil nawn lo i.

¹⁹ Ciatih ilekhaw a nu le pa in khua upate hnenah koih tu selai thukhanhnak hmun kotka ah a thu rel tuseh.

²⁰ A nu le a pa in khua upate hnenah, “Hemi kin fapa heh misalpa, thu rel thilh lo minung i ai kin thu ngai hrimhrim lo i; zu ri ṭiode ai kin naih hmuahhmuah cimpil zo sio i,’ ti tuh i.

²¹ Cen khuasong mite in ciami pa heh a thi tian lungto in sep tuhai ciabang thilpha lo khiah bo tuh i. Israel mite in ling tuh sio ai ralring tlang tuh i.

Dan Dangdang

²² “Amah sual manin mi pakhat rek ai a luang heh thing vumah tar lekhaw,

²³ ciata ah zanvar umruai tuh lo i si. Cia nia ah vui tu ih, zaimantifangin thing vumah mithi luang tar heh Pathian cukcamhnak tuar i. Bawipa ning Pathian in a ning pe tuhhnak ram ningrimtiar lohnak tuhin mithi luang heh vui tu ih.