Daannolhnak 18 - Zanniat Bible

Suangbawite Ai Covo

¹ “Israel ram songah suangbawi phun Levi hinte in ram covo nai maseh. Bawipa hnenai hibawlhnak le a dangdang pehnakte in pumcawm tuseh.

² Hin dangte bangin ram cohnak nai maseh. Bawipa in a thukhamhnak bangin anite covo tu suangbawi naṭuan i.

³ “Aisu inkhai kawlpawcang, ihlahle tuu hibawlhnak a sel fangin a dar, a kha, le a songkuate tu suangbawi hnenah pe tuseh.

⁴ Ciahlaiah suangbawite in a hmasaber langhnak rong, cabitti, olive siti le tuuhmulte co tuseh.

⁵ Ning hin hmuahhmuah lakah Levi hinte tu Bawipa Pathian hmingin, kumzangza a naruaihtu tuhin ril i.

⁶ “Levi mi in a nuam lekhaw Israel ram akon khua ahkhai Pathian biahnak hmunah kawi thil ai,

⁷ ciata ai Levi mite bangin Bawipa Pathian ai suangbawi bangin ruaih thil i.

⁸ Suangbawi dangte ngah zah in rong heh ngah tuhai a innsangte kuathnak khai amah in co tuh thotho i.

Sakhua Nuncandan Ralringhnak

⁹ “Bawipa ning Pathian ai a ning pe tuhhnak ram ning hleng fangin ciata ai um cia miphunte ai ningdulkul tlangleng dan heh hlun mah ih.

¹⁰ Puleng vumai mai vumah ning fate heh hibawlhnak ah pe mah ih; ning minungte lakah tlahsanthiam ituseh, dawithiam ituseh, mimolhthiam ituseh, mipol ituseh,

¹¹ mi dawi thiam ituseh, mitkher thiam, mithi hla ko thiam, ciabang a bawntu aisu khai um maseh.

¹² Ciabang ningdulkul thil a bawntute tu Bawipa ning Pathian huahnak i; ciamanin i, hmaiah ning nor deuhdeuh fangin he miphunte a hnawt sekhnak khiah!

¹³ Bawipa ning Pathian ai rinsantlak taktak in um tu ih.

Pathian In Prophet Hlat Tuh Thukhamhnak

¹⁴ “Ning khur tuhhnak ramai minungte in dawithiam mite le mimolh thiamte thu ngai i; Ikhalselai Bawipa ning Pathian in ciabang a bawntu heh sik tuh menma lo i.

¹⁵ Bawipa ning Pathian in ningmah unau songin kaimah bang prophet ningmah ca suakruai tuhai ciami thu heh ngai tu sawn ih.

¹⁶ Sinai Mual vumah ning taikhawm tlang laiah Bawipa ai ponka heh ning bil in za leh tuh loin ngen i si; ning hnenai a larhnak mai tleu khai sik ngam tlang lo i si, zaimantifangin kin thi tuh sio i, ti i si.

¹⁷ Ciamanin Bawipa in i hnenah, ‘Thildik ngai i ngen tlang i.

¹⁸ Amahte lakin nangmah ang prophet suakruai tuh ing. Ciami prophet tu a pong tuhhnak rel tuhai i thupehnak hmuahhmuah heh mizapui hnenah rel tuh i.

¹⁹ Prophet pakhatkhat in kaimah hming in thu a rel fangin a thu a ngai lotu heh kaimah in cawh tuh ing.

²⁰ Ikhalselai i ruai lohnak thu i hming in thurel lekhaw thi tuh i. A dang Khuavangte hmingin a rel inkhai thi tuh thotho i,’ iti i.

²¹ “Prophet thurelhnak tu Bawipa hnenin a hlenghnak i le ilo, tiin ning ngaihsunur can um tuh i.

²² Prophet pakhat tu Bawipa hming in thu rel ai a relhnak bangin cangsuak hlah lekhaw Pathian hnenin a hlenghnak i tuh lo i. Cia prophet tu amah palung in thu a rel manin kih mah ih.”