Daannolhnak 17 - Zanniat Bible

¹ “Bawipa ning Pathian hnenah a hnahpha lomi kawlpawcang ihlahle tuu heh hibawlhnak ah pe tuh lo i si; zaimantifangin Bawipa ning Pathian ai hua phun pawl i.

² “Santehhnak ah ning khua songah nupang ituseh, pasal ituseh,

³ Bawipa ai thutiam bal in a dang khuavangte, ihlahle ni maw, hlapui maw, arsi maw bia ai ciamite ruaih i. Ciatihin Bawipa vumah sual ai a thukhamhnak bal i,

⁴ ti ning ling fangin fel ngai le khim ngai in a thu zong tu ih. Ciabang thil sual heh Israel mite lakah um ngaingai lekhaw,

⁵ a bawntu heh hnarpua ah suah tu ilai a thi tian lungto in sep tu ih.

⁶ Thulingpuitute pahnih ihlahle pathum um lekhaw ani tu rek tuh i si; ikhalselai pakhat lek um lekhaw rek tuh lo i si.

⁷ A thulingpuitute in a hmasaber in lungto in sep tuhai cia hnuaah midangte in sep tlang tuh i; ciatihin he thil ningdulkul heh boruai tuh i si.

⁸ “Cen rek dun thu ah maw, loram le thilri cuh dun thu ah maw, taksa tuahmawh dun, lukhoi bilzik thu ah maw vai khatkhat tu he thukhantute rel thil lohnak um tuh i. Ciafangin Pathian ai a ril tuhhnak biahnak hmunah feh tu ilai,

⁹ cia thu heh Levi mi suangbawi le ciata ai a dahhnak thukhantute hnenah hlen tu ih; anite in rel tuseh.

¹⁰ Anite in rel tu selai a relcathnak bangin ning in bawn tu ih.

¹¹ A thu relcathnak heh lungkhim tu ilai amahte thurelhnak ang rori in bawn tlang tuh i si. Amahte relcathnak in kiahhan lam ituseh, kekeh lam ituseh, pial tuh hrimhrim lo i si.

¹² Ciami thu relcattu suangbawi ituseh, ihlahle thukhantu ituseh, amahte thu ngai nuam hlahle i sikhaw a ngai nuam lotu heh rek tuh i si. Ciatihin Israel miphun songin thil sual heh boruai tuh i si.

¹³ Ciami thu heh mizapui in ling fangin ralringhnak nai tuhai ciabang tu bawn ngam tuh nawn lo i.”

Kumpibawi Hlun Tuhhnak

¹⁴ “Bawipa ning Pathian ai ning pe tuhhnak ram ning khur ai umhnak ning khuar sio fangin ning hiangai a ummi miphunte bangin kumpibawi nai ning nuam tuh i.

¹⁵ Ciatihin ning daih ngaingai fangin Bawipa ai a rilhnak khiah ning ril vehnak tuhin ralring tu ih. Cia kumpibawi tu ningmah miphun songin i tuh i; ramdang mi tu kumpibawi cangruai tuh lo i si.

¹⁶ Kumpibawi in ralkap ca siphuh tam ze nai maseh; siphuh lai tuhin Egypt ramah minung hlat maseh; zaimantifangin Bawipa in amah minungte tu Egypt ramah feh leh tuh loin thupe zo i.

¹⁷ Kumpibawi in nupui tampui nai tuh lo i, zaimantifangin Bawipa lampui in pialruai tuh i. Sui le ngun khawl in milian cang nuam maseh.

¹⁸ Kumpibawi a cang fangin Levi mi suangbawite in fel ngai ai nganhnak Pathian ai thukham le dante nganhnak laibu pakhat nai tuseh.

¹⁹ Ciami laibu songai a umhnak dante tu fel ngai in hlun tuhin le Bawipa kihzah thiam tuhin laibu heh a hiangniu ah dah in a nunsong hmuahhmuah siar tu ṭio seh.

²⁰ Ciatihin bawn lekhaw a unau dang Israel mite tahin i pha deuh i, tiin ruat dun tuh lo ai Bawipa thupehnak in pial tuh lo i. Cen amah le a tesinfate in Israel ram heh san tampui uk tuh i.”