Daannolhnak 16 - Zanniat Bible

Kansuak Puai

¹ “Bawipa ning Pathian cawimawihnak ah Kansuak Puai heh Abib hla ah bawn tu ih; zaimantifangin cia hla song zankhat zan ah Egypt ram an ning suah i.

² Pathian biahnak hmunah feh tu ilai ning tuu ihlahle ning kawlpaw pakhatkhat in Bawipa ning Pathian songlawihnak ah le Kansuak Puai rong kawmhnak hrangah ro tu ih.

³ Hemi rong kawmhnak ning ai fangin col roihhnak sang ai tuh lo i si. Egypt ram an a rang ngai ai ning suak bangin ni sarih song col tello sang ai tuh i si. Ning harsahnak ning hihlehhnak ah hemi sang heh ai tu ilai ning nunsong hmuahhmuah ah Egypt ram an ning suak nia heh hai mah ih.

⁴ Ning ram songah aisu inkhai a inn songah col heh ni sarih song dah maseh. Cen ning puai bawn nia a hmasaber zan lamai rohnak sa tu a thangha hleng hlanah ai tu sio seh.

⁵ “Kansuak Puai ning bawn fangin ning hibawlhnak sa tu Bawipa ning Pathian ai ning pe tuhhnak khua song ning hiamhnak cangah ro mah ih.

⁶ Hmun pakhat, Pathian in a hming umhnak tuhin a rilhnak ning biahnak hmun lek ah ro tuh i si; cen Egypt ram an ning suak can, nitla sawng fangin ro tuh i si.

⁷ Ti in suang tu ilai biahnak hmunah ai tu ih; cen a thangha fangin ning inn ṭen ah tlung tu ih.

⁸ Niruk song col tello sang ai tu ilai a ni sarihhnak ah Bawipa ning Pathian bia tuhin pumkhawm tu ilai cia nia ah zaikhai per mah ih.”

Rong Khawm Puai

⁹ “Rong khawm ning pan nia in siar tu ilai zarh sarih a khim fangin,

¹⁰ rong khawm puai bawn tu ih. Bawipa ning Pathian thangphathnak ah he puai heh bawn tu ilai amah ai hmuifu ning donghnak heh ning siang zah; tam a dongtu in tam deuh, tlawm a dongtu in tlawm deuh, lungtho ngai in a hnenah pe tu ih.

¹¹ Bawipa ai hmaiah ning fanu ning fapate, ning hnenum nupang pasalte, ning khua songai Levi mite le ramdang mite, nu le pa nai lo farahte le hmaitongte thawn lungawi in um tu ih. Bawipa ning biahnak hmunah lungawi in um tu ih.

¹² Egypt ramai sal ning tanghnak khiah ngaisung tu ilai he thupehnak heh fel ngai in hlun tu ih.”

Ponhlam Puai

¹³ “Rong ning cil ben hnua le ning cabit ning rial ben hnuaah Ponhlam Puai heh ni sarih song bawn tuh i si.

¹⁴ Ning khua songai ummi ning fanu ning fapate, ning hnenum nupang pasalte, Levi mite le ramdang mite, nu le pa nai lo farahte, hmaitongte thawn lungawi ngai in puai bawn tlang tuh i si.

¹⁵ Pathian ning biahnak hmunah he puai heh ni sarih song bawn in Bawipa ning Pathian thangphat tu ih. Bawipa in ning lo rong le ning naperhnak ah hmuifu ning pe manin lungawi tu ih.

¹⁶ “Ning hinte veksen songin pasal hmuahhmuah Bawipa biahnak hmunah kum khat ah vel thum kawi tuh i si. Kansuak Puai, Rong Khawm Puai, Ponhlam Puai ah kawi tuh i si. Aisusu inkhai lehsawng keng tu ilai,

¹⁷ Bawipa ai hmuifu tam deuh a dongtu in tam deuh, tlawm deuh a dongtu in tlawm deuh, Bawipa ning Pathian hnenah lehsawng keng tu ṭen ih.

Dik Ngai Ai Thukhanhnak

¹⁸ Bawipa ning Pathian ai a ning pe tuhhnak khuapui songah ning hin ṭen in thukhantu le a dang upate ril tu ih. Hemi thukhantute in mizapui ai thu heh cawh cuang nai loin thukhan tuseh.

¹⁹ A dik lo le ṭanbul nai in thukhan mah ih; cen nawhthuh khai lang tuh lo i si; zaimantifangin nawhthuh in mifim le mifelte ai mit tianin cawruai ai thukhanhnak sualruai de i.

²⁰ Thudik le thuhman lek si tuh i si; ciatihin nung le i sikhaw Bawipa ning Pathian ai a ning pe tuhhnak ram heh khur tuhai can raipui ning nung tuh i.

²¹ “Bawipa ning Pathian ca puleng ning tiang fangin zaibang thing khai a hiangah a bia tuhin bir tuh lo i si.

²² Cen zaibang lungto khai bia tuhin bir tuh lo i si; ciamite tu Bawipa ai hua phun pawl i.”