Daannolhnak 15 - Zanniat Bible

Kum Sarihhnak Laiba Map Kum

¹ “Cen kum sarihhnak a khim cang fangin paisa ning batute map tu ilai ngaithiam tu ih.

² Ning bawndan tuh tu hetih tuh i. Ningmah lakah pakhatkhat in a unau Israel mite hnenah paisa put lekhaw map tuseh. Laiba phing nawn maseh, zaimantifangin Bawipa amah in laiba map kum tiin ti zo i.

³ Ramdang mite ai laiba tu cawh tu ih; ikhalselai ningmah Israel hinte songin laiba tu phing mah ih.

⁴ “Bawipa ning Pathian in a ning pe tuhhnak ramah hmuifu ning pe tuh i. Tunnia ai i thupehnak hlun ai amah thu felniu in ngai le i sikhaw,

⁵ ningmah lakah mifarah miharsa ning um tuh lo i.

⁶ A thukhamhnak bangin Bawipa in hmuifu ning pe tuh i. Miphun tampui hnenah paisa put tuh i si, ikhalselai ningmah in aisu hnen ahkhai paisa pu tuh lo i si. Miphun tampui uk tuh i si, ikhalselai ningmah heh aisu inkhai ning uk tuh lo i.

⁷ “Bawipa ning Pathian in a ning pe tuhhnak ram songai khua pakhatkhat ah ning hinpui Israel mite farah ai bawm kul lekhaw lungruh hmundit in bawm nuam loin um mah ih.

⁸ A kul zah in bawm tu ilai siang ngai in put tu ih.

⁹ Laiba map kum nong manin bawm nuam lo inkhai um pang mah ih. ‘Kum sarih kum, laiba map kum nong zo heh in! tiin ruat in hmuhheh pang tuh i si. Ciabang ruathnak pha lo heh ning thinlung ah lutruai mah ih. Bawm ning nuam hlah lekhaw Bawipa hnenah au in ngen tuhai mawhphurtu heh ningmah tuh i si.

¹⁰ Siang ngai le thatho ngai in pe tu ih, zaizongza ah Bawipa in hmuifu ning pe tuh i.

¹¹ Israel mite lakah mifarah miharsa um tuh ṭiode i; ciabangte vumah hmunthiam in um tu ih, tiin thu ning pe ing.”

Salte Kilkhawldan

¹² Na unau Hebrew mi mi pakhatkhat pasal ituseh, nupang ituseh, na hnenah sal cang tuhin amah le mah zuar dun lekhaw kum ruk song na ruaih hnuaah a kum sarihhnak ah luatruai tuh hrimhrim i si.

¹³ Ciatihin na hlat fangin kut lolek in hlat tuh lo i si.

¹⁴ Bawipa Pathian ai hmuifu na pehnak tuu le rong le cabitte uak thah ngai in pe tu.

¹⁵ Ningmah khai Egypt ramai sal ning tuar awng fangin Bawipa ning Pathian ai ning luatruai khiah ngaisung tu ih; ciamanin hetihin thu ning pe ing.

¹⁶ Ikhalselai na sal pa, na sal nu in suak nuam loin nangmah le na innsangte ning daih ngai ai na hnenah a um lungkhim hlen lekhaw,

¹⁷ na inn dawngkham ah fehpui tulai a bil ret sah tu; ciatihin a nun song hmuahhmuah na sal cang tuh i. Na sal nu khai ciatih thotho in bawn tu.

¹⁸ Na sal na hlat fangin na thinhar in um mah; a ngaingai ti fangin nihlawh ruai ai na langhnak hnenum ai hlawh hrek lek ngah in kum ruk song na ruaih zo ilo im? Ciamanin ang ngai in hlat tulai Bawipa na Pathian in na thil bawnhnak hmuahhmuah ah hmuifu na pe tuh i.”

Kawlpaw Le Tuu Fa Upaber

¹⁹ “Bawipa ning Pathian ca ning kawlpaw le ning tuute ai fa upa ber a cang heh dah tu ih, he kawlpawte tu naperhnak ah hmang mah ih, tuu khai a hmul met mah ih.

²⁰ Kumsiar in cia kawlpaw le tuu sa heh Bawipa mithmuh, amah biahnak hmunah ning innsang veksen in ai tu ih.

²¹ Ikhalselai ciami sumhnam tu him lohnak pakhatkhat nai ai, a kebai, a mitvai, ihlahle a hnahpha lohnak pakhatkhat nai lekhaw ciami tu Bawipa hnenah hibawlhnak ah pe tuh lo i si.

²² Ciabang sumhnamte tu inn ah ai tu sawn ih. Ning veksen cianghlim khai cianghlimlo inkhai sakhi sa le kiho sa ning ai bangin ai tu ih.

²³ A thisan tu ai tuh lo i si; tidap bangin laipua ah bung tu ih.