Daannolhnak 12 - Zanniat Bible

Biakhawmhnak Hmun Pakhat

¹ “Bawipa, ning pupate ai Pathian in a ning pehnak ram ning khur ai cia ram songai ning um song hmuahhmuah ning hlun tuhhnak dan le thukhamte tu hemite i.

² Ning khur tuhhnak ramsong mite ai biahnak hmun tlangsang vumah ituseh, tlangbol le thing lian hniaah ituseh, amahte khuavang biahnak hmun hmuahhmuah heh siatsuah tu sio ih.

³ A pulengte bal tusek ih, amahte biahnak lungdawlte seu tusek ih. A huaimi thingbir Asher khuazingnu limte khai mai ah tai tusek ilai he hmunah amahte khuavang bia thil leh tuh loin a milimte heh cekkhoi tusek ih.

⁴ “Bawipa ning Pathian khiah he miphunte ai amahte khuavang biadan bangin bia mah ih.

⁵ Bawipa in ning hin veksen ai ram songin amah umhnak ah hmun pakhat ril tuhai ciata ah feh tu ilai bia tu ih.

⁶ Ciata ah ning hibawlhnak hmuahhmuah; maitai hibawlhnak, rai hibawlhnak, sawm ah pakhat le ning pehnak dangdang, Bawipa sel tuhin ning thukhamhnak dangdang, lungtho ngai ai hibawlhnak le ning kawlpaw le ning tuute ai fa upa ber pawl sel tu ih.

⁷ Ciata ah Bawipa ning Pathian hmaiah rong ai tu ih; ciatihin ning innsang in zai ning bawnhnak cangcang ah ning lung ning awi tuh i, zaimantifangin Bawipa ning Pathian in hmuifu ning pe zo i.

⁸ Ciami can a hleng fangin tun hlanai ning thil bawnhnak bangin bawn nawn mah ih. Tun hlan ahcen ning nuamnuam in bawn tlang i si, nung i si;

⁹ zaimantifangin Bawipa ning Pathian in a ning pehnak, dap niu in ning cawlum thil hmun hleng tlang lai lo i si.

¹⁰ Jordan runpui ning tan fangin Bawipa in ram heh ning coruai tuhai umhnak khuar tuh i si. Ning ralte kut songin ning hup tuhai thinnuam ngai in um tlang tuh i si.

¹¹ Bawipa in a hming um tuh hmun le amah ning biahnak tuh hmun pakhat ril tuhai ciata ah amah pe tuhin i ruaihnak hmuahhmuah ning hibawlhnakte, maitai hibawlhnak le hibawlhnak dangdang, ning sawm ah pakhat le a dang ning pehnakte, ning thukhamhnak lehsawngte heh Bawipa hnenah pe tu ih.

¹² Cen Bawipa mithmuh ah ning fanu le fapate, ning hnenumte, le ning khua songai Levi mite thawn ang ngai in um tu ih. Zaimantifangin Levi mite tu lairam cohnak nai ve lo man i.

¹³ Ning nuamhmuncang ah hibawlhnak sel tuh lo i si;

¹⁴ Bawipa in ningmah hinte ai ram songah hmun pakhat ril tuhai ciata ah pe tuh i si. Ciata lek ah hibawlhnak sel tuhai i thupeciahnak bangin bawn tu sio ih.

¹⁵ “Ikhalselai konteng ah ning um inkhai ning sumhnamte heh ro tu ilai ai tu ih. Bawipa ning pehnak zah in ai tu ih. Ning veksen mi cianghlim inkhai cianghlimlo inkhai ai tu sio ih; kiho sa le sakhi sa ning ai bangin ai tu ih.

¹⁶ Ikhalselai a thisan tu ai tuh lo i si. Ti ning bung de bangin laipua lakah bung tu ih.

¹⁷ Ning umhnak khuasong hmuah ah ning sawm ah pakhat pehnak rong, cabitti le olive sitite tu ai tuh lo i si. Bawipa hnenah ning selhnak hmuahhmuah ning kawlpaw ning tuute ai fa upa ber Bawipa hnenah ning thukhamhnak lehsawng, lungtho ngai ai selhnak hibawlhnak le a dang hibawlhnakte khai ai tuh lo i si.

¹⁸ Hemi hibawl ning selhnak tu ningmah le ning fate, ning hnenumte, le ning khua songai ummi Levi mite thawn Bawipa ning Pathian ai mithmuh ah amah biahnak hmun lek ah ai tlang tuh i si. Bawipa in zaizongza ning bawnhnak ah ning umpui manin ang ngai in ciata ah ai tu ih.

¹⁹ Cen ram songai ning um song hmuahhmuah Levi mite heh hnuaphnal mah ih.

²⁰ “Bawipa ning Pathian in, a thukhamhnak bangin ning ram a kau deuhdeuh fangin ning nuamhmuncang ah rong ai thil tuh i si.

²¹ Pathian biahnak hmun a hla ze lekhaw, i thupeciahnak bangin Bawipa ai a ning pehnak kawlpaw le tuu heh ro tu ilai ning nuamhnak khua le inn ah a sa ai tu ih.

²² Aisu khai mi cianghlim ituseh, cianghlimlo khai ituseh kiho sa le sakhi sa ai bangin ai tuseh.

²³ A sa ning ai fangin a thisan tu ai tuh hrimhrim lo i si, zaimantifangin a thisan tu nunhnak i ai a sa thawn a nunhnak heh ai cih tuh lo i si.

²⁴ Thi tu ai mah ih. Ti bangin laipua ah bung tu ih.

²⁵ Thi ai hlahle isikhaw Bawipa tu a lungawi tuhai ningmah le ning fate ca lampui ning tluang tuh i.

²⁶ Ning hibawlhnakte le Bawipa hnenah ning thukhamhnak lehsawngte tu Pathian biakhnak hmunah koih tuh i si.

²⁷ Maitai hibawlhnakte tu Bawipa ai puleng vumah a thisan le a sa thawn tai tusek ih; rualrem hibawlhnak tu puleng ah a thisan phiah tu ilai a sa tu ai tu ih.

²⁸ I thupeciahnak hmuahhmuah fel ngai in hlun tu ilai kumzangza in ningmah le ning fate lampui ning tluang tuh i; zaimantifangin a pha le a dikmi bawn tuhai Bawipa lungawiruai tuh i si.”

Milim Bia Mah Ih

²⁹ “Ral ning tawng fangin Bawipa ning Pathian in he miphunte tu siatsuah tuhai amahte ram heh khur tuh i si.

³⁰ Ciatihin Bawipa in a siatsuah sek fangin amahte khuavang biadan pawl in ning zawl lohnak tuhin ralring tu ih; amahte thu cung le i sikhaw ning pairal tuh i. ‘Akontih in amahte in pathian bia i? Kin khai amahte bangin bia tuh ising,’ tiin ti mah ih.

³¹ Anite khuavang a bia bangin Bawipa ning Pathian bia mah ih, zaimantifangin anite khuavang biadan heh Bawipa daihdan ilo ai a ningdulkul i. A fapa le fanu tianin hibawlhnak ah hmang ai amahte puleng ah mai in tai tlang i.

³² “I thupeciahnak hmuahhmuah a khimniu in hlun tu sio ih; zaikhai belh mah ih, pakhat khai pelh fawn mah ih.