Daannolhnak 11 - Zanniat Bible

Bawipa Ai Thawmlianhnak

¹ Bawipa ning Pathian heh it tu ilai amah thukham, a dan le a thupehnak hmuahhmuah hlun tu ih.

² Cen zaibang Pathian i, ti khiah ning nunhnak in tep zo ai ciami khiah tunnia ah hih tu ih. Ciatihin a teptu heh ning fate ilo i, ningmah i si. Bawipa ai thawmlianhnak, a ban thahathnak le a huhamte hmu zo sio ai,

³ ngaihsunurkul a bawnhnak tepawl le Egypt kumpibawi le a ram pumpuhluk vumah a bawnhnak tepawl khai hmu zo i si.

⁴ Egypt ralkapte in ning hnawh fangin Bawipa in a siphuh le siphuhlengte thawn Tipui San songah pilruai sek ai pairal sek ti khiah hmu i si.

⁵ Heteng ning hleng hlanah Bawipa in nelrawn ah ning ca zaibang thil bawn awng i, ti khai hmu i si.

⁶ Reuben hin Eliab ai fapate Dathan le Abiram vumai Bawipa in akontih in bawn i, ti khai ruat tu ih. Amahte hnia lamai laipua kak ai amahte innsang le ponhlamte, hnenumte, sumhnamte thawn thon sio i.

⁷ I! Bawipa ai a bawnhnak thil mak ngaingai a hmutu heh ningmah i si.”

Thukhamhnak Ram Ai Hmuifu

⁸ “Tunnia ai i pehnak thukham hmuahhmuah heh hlun tu sio ih. Ciafang ian in ning luttumhnak ramah lutbenhnak thazang nai tuhai khur ben tuh i si.

⁹ Cen Bawipa in ning pipute le a tesinfate hnenah pe tuhin a thukhamhnak ram; hnawiti le khoitizu luanghnak ramah a raipui ning nung tuh i.

¹⁰ Tunai ning khur tuhhnak ram tu hlanai ning umhnak Egypt ram thawn bang dun lo i. Khiata ah tu hlaici cing ai, thinghnah thingthai vuandum bangin, ning ke in tikhuat ai harsa ngai in per tlang i si;

¹¹ ikhalselai tunai ning khur tuhhnak ram tu tlang le phairawn umhnak i ai van ruah pha bik ai donghnak ram i.

¹² Bawipa ning Pathian in he ram tu, kum a panin a tawp tian, phatak ngai in sik i.

¹³ “Ciamanin tunnia ai i pehnak thukham hmuahhmuah heh hlun tu ih; cia thukham tu, Bawipa ning Pathian tu ning thinlung a veksen in it tu ilai ruaih tu ih, ti i.

¹⁴ Ciatihin bawn le i sikhaw, Bawipa in ning ramai a kulhnak fur ruah le khal ruah heh a camcu ah siruai tuhai rong le cabitti le olive siti nai tuh bial ai,

¹⁵ ning sumhnamte hrang hampa khai um tuh i. Ciatihin rong ning kham tuh i.

¹⁶ Bawipa hnenin pial in a dang khuavangte zawlhnak ah aisu inkhai ning hoisual maseh.

¹⁷ Ciatihin lampeng hlun le i sikhaw Bawipa tu ning vumah a thinraw tuh tengteng i; van ruahti kangruai tuhai laipua in rong suak tuh lo i. Ciatihin Bawipa ai pehnak ram an ning pairal leh tuh sek i.

¹⁸ “Hemi i thupehnak heh ning thinlung runruh ah khum tu ih. Ning ban ah pen tu ilai ning phawrtu tuhin ning cal ah bet tu ih.

¹⁹ Ning fate hnenah zirh tu ih. Inn ah ning um fang ituseh, sumpua ning suak fangin ituseh, rel tu ih; ning zau hmun le ning per ning mer hmun ahkhai rel tu ih.

²⁰ Ning inn dawngkham vumah le ning kotka vumah ngan tu ih.

²¹ Ciatihin bawn le i sikhaw Bawipa ning Pathian in ning pu le ning pate hnenah pe tuhin a thukhamhnak ram songah ningmah le ning fate khiah a raipui ning nung tlang tuh i. Lai le van a um song cia ramah um tuh hlen i si.

²² “I thupehnak hmuahhmuah heh fel ngai in hlun tu ih; Bawipa ning Pathian heh it tu ih, a lampui songah fel ngai in feh tu ilai ani tu kho ngai in pom tu ih.

²³ Ciatihin hmai lam ning nor fangin he miphunte tu Bawipa in ning hnawt sah tuhai ning tahin a ham deuh le a hat deuh pawl ram heh khur thil tuh i si.

²⁴ Ning ke ai ning fonhnak ram hmuahhmuah heh ningmah ai cang tuh i. Ning ram tu hlang lamah nelrawn in sak lamah Lebanon Mual tian, nisuah lamah Euphrates runpui in nitlak lamah Mediterranean tifingriat tian tuh i.

²⁵ Aisu inkhai ning kham thil tuh lo i. Khia ramai ning feh hmun cangcang ah, a thukhamhnak bangin, Bawipa ning Pathian ai thiltibenhnak manin mi zongzong in ning kih tuh i.

²⁶ “Ngai tu ih! Tunnia ah ning ril tuhin hmuifu le cukcamhnak ning hmaiah dah ing.

²⁷ Bawipa ning Pathian thupehnak, tunnia ai i pehnak heh hlun le i sikhaw hmuifu dong tuh i si.

²⁸ Ikhalselai he thupehnakte hlun loin ning ling awng lohnak khuavang dangdang hnenah bia tuhin feh le i sikhaw cukcamhnak tawk tuh i si.

²⁹ Ning khur tuhhnak ramah Bawipa in ning hlengpui fangin Gerizim Mual in hmuifu aupui tuhai Ebal Mual in awrsia thuthan tu ih.

³⁰ Hemi mualte pahnih tu Jordan runpui zawllai ah ummi, Canaan mite umhnak Jordan runpui in nitlak lamah um i. Nitlak lamai deuh ah um ai Gilgal khua hiangai Moreh cianghlim thingkung hiangah um i.

³¹ Bawipa ning Pathian in a ning pehnak ram khur tuhin Jordan runpui tan tuh ihang i si. Ram heh lang ai ning khur fangin,

³² tunnia ai i pehnak dante heh felfai in hlun tu ih.