Daannolhnak 10 - Zanniat Bible

Moses In Thukham Lang Lehsal I

¹ “Cen Bawipa in i hnenah, ‘Lung tlephnih a hmasa ai bangin solh tulai a dahhnak ah thingkuang pakhat bawn tu. Mualvum i hnenah kai tulai,

² lungtlep vumah a hmasa na khoiruaihnak vumai i ngahhnak heh ngan leh tuh ing; cen thingkuang songah dah tuh isi,’ tiin iti i.

³ “Ciamanin lawithing in thingkuang pakhat bawn ai a hmasa ai bangin lung tlephnih solh ai mualvum ah koih ing.

⁴ Cen Bawipa in cia lungtlep vumah hmasa ai a nganhnak, mualvum ning taikhawm nia ai mai songin ning hnenah a relhnak, thupe sawmkhat a ning pehnak heh ngan leh i. Cen Bawipa in lungtlep heh i pe ai,

⁵ tlang vuman tolh leh ing. Cen Bawipa ai thupeciahnak bangin lungtlepte heh i bawnhnak thingkuang songah dah ai ciata ah um hlen lai i,” tiin ti i.

⁶ Israel mite tu Jaakan mite namkum in feh ai Moserah ah feh i. Ciata ah Aaron thi ai vui i; cen a suangbawi naṭuan heh a fapa Eleazar in a tumrul in sawng i.

⁷ Moserah in suak ai Gudgodah ah hleng tlang i; Gudgodah in suak ai ti tampui umhnak Jotbathah ah hleng i.

⁸ Cialai ah Bawipa in Thutiam Kuang kiltu tuhin le a suangbawi naruaihtu tuhin le amah hmingin hmuifu petu tuhin Levi mite ṭuanvo pe i. Tun tianin ciami heh amahte ṭuanvo cang tata i.

⁹ Ciamanin Levi hinte tu Israel hin dangte bangin lairam cohnak nai lo i. Bawipa a Pathian ai thukhamhnak bangin a cohnak tu Amah Bawipa i.

¹⁰ Cen Moses in rel lehthio ai, “Mualvum ah a hmasa ai bangin ni sawmli le zan sawmli um ing. Cia ṭum ahkhai Bawipa in i ngenhnak i sang sah ai ningmah siatsuah tuh loin a lungkhim i.

¹¹ Cen ning pupate hnenai a thukhamhnak ram heh lut ai ning cothilhnak tuhin ningmah hotu tuhin kaimah i ruai i.”

Pathian Ruaihnak

¹² “Ciamanin, aw Israel mite, Bawipa ning Pathian ai ning ruaihnak heh phatak niu in ngai tu ih. Bawipa kihzah tu ilai a thupehnak hmuahhmuah heh bawn tu ih. Ning thinlung a veksen in amah it tu ilai amah ruaih tu ih.

¹³ A dan heh a khimniu in hlun tu ih; ningmah ca phathnak tuhin tunnia ah ning pe ing.

¹⁴ Van a sang ber rin heh Bawipa ai i. Lailung le a vumai thil hmuahhmuah khai amah ai sio i.

¹⁵ Ikhalselai ning pi le ning pute tu Bawipa in a it ze manin miphun dang ril loin ningmah sawn ning ril i. Tunnia ahkhai ciatih thotho in a rilmi i si.

¹⁶ Ciamanin tunnia ai panin ning thinlung thleng tu ilai Bawipa thu ngai tuhang ih, ning lungruh nawn mah ih.

¹⁷ Bawipa ning Pathian heh pathian hmuahhmuah lakah a cungnungber i ai bawi hmuahhmuah lakah bawi ber i. Ani tu a lianber le a sang ber i ai kihzah ber tuhhnak i. Ani tu ṭan bulhnak nai lo ai nawhthuh khai ai lo i.

¹⁸ Nu le pa nai lo farah le hmaitongte ai thu khai fel ngai in rel sah i; ningmah lakai a ummi ramdang mite khai a it manin rong le hnikpon pe i.

¹⁹ Ning inkhai ramdang mite heh it tu ih, zaimantifangin ning khai Egypt ramah mikhual i awng i si.

²⁰ Ciamanin Bawipa ning Pathian kihzah tu ilai amah lek bia tu ih. Amah hmaiah rinsantlak in um tu ilai amah hming lekin thukham tu ih.

²¹ Ani tu thangphat tu ih; zaimantifangin ning Pathian i ai ning ca thil mak ngaingai le kihkul ngaingai a bawnhnak tepawl ning mit rori in hmu zo i si.

²² Ning pipute Egypt ram feh tlang fangin mi sawmsarih lek i. Ikhalselai tun tu Bawipa Pathian in van ai arsite zah in ning bawn i.”