Daannolhnak 1 - Zanniat Bible

Thu Hampanhnak

¹ Hemi laibu songai thute tu Jordan runpui in nisuah lam nelrawn ai a um tlang laiah Moses in Israel mite hnenah a rel awnghnak thute i. Israel mite tu Jordan phairawn Suph khua hiangah um tlang i; Paran khua tu ciata in khat lamah um ai, Tophel, Laban, Hazeroth le Dizahab khuate tu khat lam ralden ah um i.

² Sinai Mual in Kadesh Barnea tu Edom tlang vum lampui in ni hlaikhat rai feh kul i.

³ Israel mite Egypt ram an a suak hnua kum sawmli kum, hla hlaikhat hla, ni khat nia ah Bawipa in rel tuhhnak thu a pehnak hmuahhmuah heh Moses in mizapui hnenah rel i.

⁴ Ciami tu Heshbon khua songai a ummi Amor kumpibawi Sihon, le Ashtaroth le Edrai khuapui ai a ummi Bashan kumpibawi Og a neh hnuaah a relhnak i.

⁵ Jordan in nisuah lam Moab ram songai a um laiah Moses in Bawipa ai pehnak dante le thuzirhhnakte fiang ngai in rel i.

⁶ Moses in, “Sinai Mual ai kin um laiah, Bawipa kin Pathian in i hnenah ‘Hemi mual ah a raipui um zo i si.

⁷ Suak tu ilai feh tuhang ih; Amor tlang vum ram le a hiang cingkim ram hmuahhmuah ah, Jordan phairawn, tlang vum ram le zawllai ram, hlang lam ram le Mediterranean tifingriat tianin feh tu ih. Cen Canaan ram le Lebanon tlang kan in Euphrates runpui tian feh tu ih.

⁸ Sik tu ih, he ramte tu Bawipa Kaimah in ning pupate Abraham, Isaac, le Jacob hnenah le a tesinfate hnen tian pe tuhin i khamciahnak i,’ iti i,” tiin ti i.

Moses In Thukhantute Dah I

⁹ Moses in, “Cialai ah ning hnenah, ‘Ningmah mizapui konghoi heh kaimah ca thilrit ze i. Kaimah pakhat lekin tu ti cawk lo ing.

¹⁰ Bawipa ning Pathian in ning pungzairuai ai tun tu van ai arsite zah ihang i si.

¹¹ Ning pupate ai Pathian Bawipa in a thukhamhnak bangin a let thawng khat in ning pungzairuai in ning khangso tu hram seh!

¹² Ikhalselai akontih in kaimah pakhat lekin ning haudunhnak le ning thubuaite heh phur cawk tuh ing?

¹³ Ciamanin ningmah ning hin ṭen songin mifim, rinsantlak le thiltiben pawl ril tu ilai ningmah hotu tuhin dah tuh ing,’ tiin ti ing.

¹⁴ Thil pha bik peu i, tiin lung ning khim tlang i.

¹⁵ Ciamanin ningmah ning hin song ṭen in ning rilmi mifim le rinsan mite heh ningmah hotu ah dah ing. Mi hrekkhat tu mi thawng khat hotu, mi hrekkhat tu mi zakhat hotu, a hrekkhat tu mi sawmnga hotu, a hrekkhat tu mi sawmkhat hotu i. Ning hin song ṭen ah hotu dangdang khai dah ing.

¹⁶ “Cialai ah anite hnenah, ‘Ning minungte hnenin thubuai a hlenghnak heh phaniu in thupuiruai tu ilai ning minungte thu khai ituseh, ning lakai a ummi a dang miphunte ai thu khai ituseh dik ngai in rel sah tu ih.

¹⁷ Thu ning relcat fangin ṭan bul nai mah ih. Aisu minung bangkhai ita tuseh hlaihdanhnak nai loin a thu umdan bangin rel tu ih. Aisu khai kih mah ih. Zaimantifangin ning thu relcathnak tu Pathian hnenai a hlenghnak i. Thu pakhatkhat heh ning caah relcat tuhin a har ze lekhaw i hnenah hlen tu ilai kaimah in relcat tuh ing,’ tiin rel ing.

¹⁸ Ciahlaiah ningmah khai thil ning bawndan tuh hmuahhmuah khimniu in ning rel ing,” tiin ti i.

Kadesh Barnea Ah Micultu

¹⁹ Moses in, “Bawipa kin Pathian thupehnak heh bawn sio ising. Sinai Mual in suak ai khia tluk kau le kihkul nelrawn lakin vak ai Amor tlang vum ram lamah feh ising. Kadesh Barnea kin hleng fangin,

²⁰ ning hnenah, “Bawipa kin Pathian ai a kin pe tuhhnak ram, Amor tlang vum ram hleng zo i si.

²¹ Sik tu ih, ning pupate ai Pathian Bawipa in ning pehnak heh he ram i. Amah thupehnak bangin feh tu ilai cia ramah um tu ih. Aisu khai kih mah ih. Ning thin khai nau mah ih,’ tiin ning ti ing.

²² “Ikhalselai i hnenah kawi ai, ‘Hemi ram cultu tuhin le fehhnak lampui siktu tuhin le zaibang khuapui um i, ti siktu tuhin a cultu hlat hmasa tuh ising,’ tiin ti i si.

²³ “Ciami heh ruathnak pha bik ilo im, tiin ti ai ning hin song ṭen in mi pakhat ṭen, a veksen in minungte hlaihnih ril in,

²⁴ feh tlang ai tlang vum ram heh Eshkhol phairawn tianin sik tlang i.

²⁵ Amahte sikhnak ramai thingthai khai loih ai kin tlut i. Bawipa kin Pathian ai a kin pe tuhhnak ram tu rampha bik i, tiin kin rel i.

²⁶ “Ikhalselai Bawipa ning Pathian ai thupehnak el ai cia ram heh lut ning nuam lo i.

²⁷ Ningmah lakah phuncam tlang murhmo ai, ‘Bawipa in kin hua i; Amor mite in kin rek tuhin Pathian in Egypt ram an kin suahpui ai anite kut ah kin hlengruai sio i.

²⁸ Ciamanin zaimanin cia ramah feh tuh i ing? Kin lau heh in! Kin hlathnak micultute in le ciata ai a um mite tu kin tahin miham puipui i, dung khai sang puipui ai hat deuh fawn i, tiin kin rel i. Khuapui song ciang ah um ai amahte khuapui kulhhnak vingpui heh van ban i, kin ti i. Tlami tiatia minung um i kin ti lawnsi i,’ tiin ti i si.

²⁹ “Ikhalselai ning hnenah, ‘Hemite heh kih mah ih!

³⁰ Bawipa ning Pathian in ning hoi tuhai Egypt ram le,

³¹ nelrawn ramcar ram songah thil a bawn zo bangin ningmah ca ning ralte ning tawng sah tuh i. A pa in a fapa a cawi de bangin ning lamtluanah ning cawi ai heta tian ning hlengpui zo heh in,’ ning ti ing.

³² Ciatluk in ning rel zo napui ning in,

³³ ning hmai lamai a fehtu le ning riahbuk tianin ning si sah ai ning lampui hmuh tuhin zan ah mai zual in, sun ah mairo zual in, ning hmaiah a fehtu Bawipa heh rinsan thotho lo i si.

Pathian In Israel Mite Cawh I

³⁴ “Bawipa in ning phuncamhnak murhmo a za fangin a thinraw ai,

³⁵ ‘Hemi san misualte ning heh ning pupa hnenah i thukhamhnak rampha ah aisu khai lut tuh lo i si.

³⁶ Jefunneh ai fapa Kaleb lek lut tuh i. Kaleb in kaimah i rinsan manin a sikhnak ram heh amah le a tesinfate hnenah pe tuh ing,’ tiin cukcam in ti i.

³⁷ Ningmah manin Bawipa tu i hnenah a thinraw ai, ‘Moses, nangmah tianin Canaan ram hleng tuh lo isi.

³⁸ Na bawmtu Nun ai fapa Joshua tu hleng tuh i. Ciamanin Joshua heh thape tu; Israel mite heh amah in konghoi tuhai Canaan ram khiah khur tuh i,’ tiin ti i.

³⁹ “Cen Bawipa in i hnenah, ‘A hnawm a pha ling thiam lai lomi, ralte in rek tuh sio i ning tihnak ning fate lek lut tuh i. A hnenah ram khiah pe tuhai anite in co tuh i.

⁴⁰ Ikhalselai ning tu let tu ilai Tipui San lamin nelrawn ah feh tu ih,’ kin ti i,” ti i.

Israel Mite Sung I

⁴¹ “Cen ning in i hnenah, ‘Bawipa vumah kin sual zo i. Ikhalselai tun tu Bawipa kin Pathian ai thupehnak bangin kin ralte tawng tuh i ing,’ iti i si. Cen ning veksen in raltawng tuhin ralring tlang i si. Tlang vum ram tawng heh bai tuh i, tiin ruat i si.

⁴² Ikhalselai Bawipa in ‘Tawngruai mah. Zaimantifangin anite hnenah um tuh lo ai ralte in neh tuh i,’ tiin ralringhnak i pe i.

⁴³ Bawipa ai i relhnak tu ning rel salawn napui aisu inkhai i ngai sah ning nuam lo i. Bawipa ai thu heh el ai hngal ngai in tlang vum ramah feh tlang i si.

⁴⁴ Ciafangin tlang vumai a ummi Amor mite tu khoi bangin suak ai ning hnawh tlang dek i. Cen Edom tlang vum ram Hormah khua tian ning rek diamdo i.

⁴⁵ Ciamanin ning let fangin Bawipa hnenah kap tlang i si. Ikhalselai Bawipa in ning ngai nuam lo ai zaikhai ning siarlo i.

⁴⁶ Ciaman nakhaw Kadesh ah hetluk raipui ning um heh!