Amos 7 - Zanniat Bible

Khokhuak Larhnak

¹ Cungnungber Bawipa hnenin larhnak pakhat hmu ing. Ciami larhnak ahcen kumpibawi ai rongkung at ben ai hampa a po sawng fangin Bawipa in khokhuak burpui a samruai hmu ing.

² Ciami larhnak i hmuhnak song ahcen khokhuakte tu ram pumpuhluk songai thil hing hmuahhmuah a ai sek khiah hmu ing. Ciafangin kai in, “Aw Cungnungber Bawipa, na minungte heh ngaithiam tu hram law. Akontih in nung thil tuh i? Mi tlawm ze ai ṭawnṭai ze fawn i,” tiin ti ing.

³ Cen Bawipa in a thinlung thleng ai, “Na hmuhnak bangin cang leh tuh lo i,” tiin i ti i.

Mai Larhnak

⁴ Cungnungber Bawipa hnenin larhnak a dang pakhat hmu ing. Bawipa in a minungte mai in cawh tum khiah hmu ing. Ciami mai in lai hnia tipuithuanthum khiah kang sek ai lairam khai kang tuh lala i tihnak khiah i.

⁵ Ciafangin kai in, “Bawipa Pathian, com tu. Akontih in na minungte nung thil tuh i? Mi tlawm ze ai ṭawnṭai ze fawn i,” tiin ti ing.

⁶ Cen Bawipa in a thinlung thleng ai, “Na hmuhnak bangin cang leh tuh lo i,” tiin ti i.

Khaibolri Larhnak

⁷ Bawipa hnenin larhnak a dang pakhat hmu ing. Khaibolri hmang in sahnak inn bangkhang hiangah Bawipa Pathian a ding khiah hmu ing. Cen khaibolri tu a kut songah um i.

⁸ Amos ziang hmu pa si? tiin i zawt i. “Khaibolri,” tiin sawn ing. Cen ani in, “I minung Israel mite heh a cang lo bangkhang bang i ai amahte kawndan larruaihnak tuhin he khaibolri in na hmuh ing. Amahte cawh tuhin i ruatciahnak tu thleng tuh nawn lo ing.

⁹ Isaac tesinfate ai Pathian biahnak hmunte tu khing tuh sukso i. Israel ai a thianghlim hmunte tu siatsuah tuh sek i. Kumpibawi Jeroboam sen mite ai ram ukhnak tu boruai tuh ing,” tiin ti i.

Amos Le Amaziah

¹⁰ Bethel ai suangbawi Amaziah in Israel kumpibawi Jeroboam hnenah thuthan ai, “Amos in Israel misenpui lakah na engsan i. A ponghnak in ram pumpuhluk siatsuah tuh i.

¹¹ A relhnak tu hetihin i: ‘Jeroboam tu raltawnghnak ah thi tuh i; Israel mite amahte ram an sal ah hoi tuh sek i,’ tiin rel dekdo i,” ti i.

¹² Cen Amaziah in Amos hnenah, “Nang prophet, pong nawn mah; Judah ramah let tulai ciata ah thurel tu. Anite in na hlawhman na pe tuseh.

¹³ Heta Bethel ahcen prophet ponkam in pong nawn mahang. Heta tu na ram pumpuhluk biakinn i ai kumpibawi ai Pathian biahnak hmun i,” tiin ti i.

¹⁴ Ciafangin Amos in, “Prophet ilo ing; prophet ai fapa khai ilo ing; sumkhaltu le thaikung kilkhawltu awng ing.

¹⁵ Ikhalselai Bawipa in tuu i khalhnak in i lang ai a minung Israel hnenai prophet tuhin thu i pe i.

¹⁶ Bawipa ai ponghnak heh ngai tu! Nang incen Israel miphun engsan in ituseh, Isaac miphun engsan in ituseh, pong tuh nawn loin i kham isi.

¹⁷ Ciatihin na ti manin, nang Amaziah, Bawipa in na hnenah, ‘Na nupui tu khua songah taksa zuar in cang tuhai na fate tu ralvang in thi tuh i. Ning ram tu piak tuh sio ai midang hnenah pehnak tuar tuh i. Nangmah khai Pathian ling lomi ram, ramdang ah na thi tuh i. Israel mite heh amahte ram an sal ah hoi tuh sek tengteng i,’ ti i,” tiin rel i.