Amos 4 - Zanniat Bible

¹ Hemi thu ngai tucuk ih, ningmah Samaria nupangte, thau bik ai cawmhnak Bashan kawlpawpuite, minautate parh sek in rial ai mifarah a naunehtu le “Din tuh ti i pe tu,” ti ai mah pasal a auh hluahhlo mite,

² Cungnungber Bawipa in a thianghlimhnak thawn, “Sio thawn ning duk can hleng leh tuh i; ning veksen in ngasio thawn awkmi nga bangin ning cang tuh i.

³ A nong ber bang kua ah ning duk tuhai ciata in sumpua ah Harmon lamah ning lon tuh i,” tiin cukcam in thukham ing.

Israel In Ling Thil Lo I

⁴ Bawipa in, “Aw Israel mite, Bethel ai hmun thianghlim ah feh tu ilai ning nuam lekhaw sual tu ih! Gilgal ahkhai feh tu ilai ning sual ben tawp in sual ta tu ih. Ning hibawlhnak sumhnamte tu zingkhat hnua zingkhat koih tu betbo ilai ning thawhhlawm khai ni thumhnak cang fangin koih tu ṭiode ih.

⁵ Ning sang khiah anghnak in Pathian hnenah pe tu ilai thawhhlawm a hlai ai ning pehnak khai tluangkhawngpui tu dekdo ih. Ciami ilo im ning bawn hiamhnak tu!

⁶ “Ning khua hmuahhmuah ah rian a tlungruaitu heh kaimah ing. Cia inrin i hnenah let lo i si.

⁷ Ning lo rong in ruahti a kul ber can ah ruah si loin umruai ing. Khua pakhat ah ruah siruai ai a dang khua pakhat ahcen siruai lo ing. Lo pakhat ah ruah ngah napui a dang pakhat ahcen vanruah loin car i.

⁸ Minung tampui tu khua dang ah ti ding tuh si hnelhno in feh i. Ikhalselai din khop hmu lo i. Ciacingin i hnenah let cuang lo i si.

⁹ “Ning lo rong a ngauruaitu tuhin hlivua sia zuangruai ing. Khokhuak in ning vuan le cabit vuan, ning thaikung le olive kungte khai ai sek i. Ikhalselai i hnenah let ning nuam cuang lo i.

¹⁰ Egypt ramah i hlengruai awng bangin ning vumah pul tlungruai ing. Raltawnghnak ah ning minote kaimah in thiruai ai ning siphuh hat ngaingai lang sek ing. Ning hnarkua tu ning zancam hmunai mithi luang uih rim in dimruai sio ing. Cia inkhai i hnenah let nuam cuang lo i si.

¹¹ “Sodom le Gomorrah i siatsuah bangin ningmah lakai mi hrekkhat pawl siatsuah ing. Tunai a nungmi ningmah heh mai songin thurhnak a ko lai fungkek bang i si. Ikhalselai i hnenah kawi ning nuam cuang lo i.

¹² Ciaman nakhaw Israel mite, ning cawh tuh ing i tihnak khiah! Kaimah in ciatihin bawn tuh manin Pathian thawn tawk dun tuhin ralring tu ih,” tiin ti i.

¹³ Pathian tu tlangsang puipui a bawntu i; Hlivua bawntu khai i. A ruathnak heh minung lingruai i; Sun khiah zan ah cangruai i; Lailung hmunsang fon sio i. A hming tu Cungnungber Bawipa Pathian i.