Amos 3 - Zanniat Bible

¹ Aw Israel mite, Egypt ram an ning miphun pumpui in Bawipa in ning hoi zo ai ningmah ai thula ah a relhnak heh ngai tu ih:

² “Laivum miphun hmuahhmuah lakah ningmah ian heh kaimah linghnak mi le i kilkhawlhnak mi i si. Ciacingin ning sual i; ciamanin ning cawh tuh ing,” ti i.

Prophet Ṭuanvo

³ Lungkhim kawm loin mite pahnih hmunkhat ah khualtlawng kawm thil tuh im?

⁴ Chintit tu a dawphnak sa nai loin tupui songah huk de awm? Chintit niu tu a dawphnak sa nai loin a kua songah mi nger de awm?

⁵ Vaniu tu thangtohhnak um loin awk thil tuh im? Thang tu a pelhruaitu um loin pelh thil tuh im?

⁶ Raltawnghnak thirhlung khua songah a hmut fangin khuasong mite thinlau loin um thil tuh im? Bawipa ai hlengruai lohnak in khuasong ah harsahnak hleng awng awm?

⁷ Cungnungber Bawipa in naruaihtu prophette hnenah a tumhnak phuang ta loin zaikhai bawn awng lo i.

⁸ Chintit a huk fangin aisu in kih loin um ben nitur? Cungnungber Bawipa a pong fangin tlangaupui loin aisu um ben tuh i.

Samaria Bawngsia Tuhhnak

⁹ Egypt le Ashdod kumpibawi inn songai a um mite hnenah, “Samaria cingkim ai tlang ah taikhawm tu ilai ciata ah thil sualral a bawnhnak le a songai hnaihnokhnak a roh ngai heh sik tu ih,” tiin thuthan tu ih.

¹⁰ Bawipa in, “Hemite in a kumpibawi inn song tu sualralhnak le thisan luanghnak thawn a langhnak thilri in dimruai i. Akontih in mifel cang thil i ti khai ling nawn lo i.

¹¹ Ciamanin a ram ralte in kulh tuh i. Amahte ṭanghnak hmunte siatsuah tuhai a kumpibawi inn khiah rok tuh i,” tiin ti i.

¹² Bawipa in, “Tuukhal in chintit ai dawphnak tuu a si fangin a kete pahnih le a bil lek a osuak bangin Samaria khua ai umtu Israel mite khai amahte tohphah hmur le khuahluan ke thawn ian luat thil tuh i.

¹³ Phantakniu in ngai tu ilai Jacob ai tesinfate tu ralringhnak thu rel tu ih,” tiin Cungnungber Hmualnaiber Bawipa in ti i.

¹⁴ “Amahte sualhnak manin Israel i cawh nia ah Bethel ai pulengte khai siatsuah tuh sek ing. Puleng ai kite khai ek tuh sek ai lai ah tlok tuh sek i.

¹⁵ Khuakhal ai inn ituseh, khuasik cu ai inn ituseh bal tuh sek ing. Vuiha in mawiruai ai parlianghnak le a dang inn lianpui pawl khai hnawmcan tuh sek ing,” ti i.