Aanroling 6 - Zanniat Bible

Ralringhnak Dang

¹ I fapa, midang ai laibadunhnak ah, thukhamdunhnak nai awng aw sim?

² Nangmah ai ponkam in na awk ai, Nangmah ai thukhamhnak in na hen awm?

³ Ciatih ilekhaw i fapa, ciami pa kut songah um isi, cen hetih ian in na hawk thil tuh i. A hnenah rang ngai in feh tulai suak tuh ngen tu.

⁴ Mitmu in cawlum hiar menma mah.

⁵ Sakap pa kut songin vaniu le kiho a tlansuak bangin Thang songin a suak tuh tum tu.

⁶ Thazawng mite in sirsing khiah sik tuseh, Sirsing nuncan ziaza sik in zir tuseh.

⁷ Anite tu konghoitu upa ber le uktu nai lo i;

⁸ Ikhalselai khuakhal songah rong khawl tlang ai, khuasik cu hrangah ralring tlang cia i.

⁹ Thazawng pa tu zaikom tian mitmu tuhlai ini? Zaikom fangin tho tuh ini?

¹⁰ Amah in, “Camkhat song zau rih tuh ing, Camkhat song kutzep in cawlum rih tuh ing,” ti i.

¹¹ Ikhalselai a mitmu lakah farahhnak tawk tuh i, Fai le vang thawn ruko in a thilri a sutmi pa bangin, Tlasam in um tuh i.

¹² Santlai lo le misiavate tu thudonrel tuhin vak luplo de i.

¹³ Mitkhiaphnak le mithmai hmuhdunhnak in ning zawl tuh i.

¹⁴ Ciatihin thinlung siava in phatlohnak ngaisung tuhai, Nuamhmuncang ah harsahnak suakruai tuh i.

¹⁵ Ciamanin amahte hnenah harsahnak mangrinlo in hleng tuhai, Thi dawn in maliam tuh i.

^16-19 Bawipa in a huahnak thilte paruk um i, A ningdulhnak thilte pasarih um i. Puarthau mithmai, Thudonreltu lai, Misual lo rektu kut, Sualhnak ian a ngaisungtu thinlung, Thil sual bawn tuhin zual a rangmi ke, Thudonrel in thulingpuitu canghnak, Unaute lakah harsahnak a suahpui ṭiotu pa, Hemite heh Bawipa in a ningdulhnak pawl i.

Nu Le Pa Sualhnak Vumah Ralringhnak

²⁰ I fapa, na pa relhnak bangin bawn tulai, Na nu ai zirhhnak khiah zaikom inkhai hai mah.

²¹ Amahte relhnak thute heh hih tu ngio lai na thinlung songah khum tu.

²² Khual na tlawng fangin amahte zirhhnak thute in kong na hoi tuhai, Zan fangin na kilkhawl tuhai, sun ah ruathnak na pe tuh i.

²³ Amahte zirhhnak tu tleu tuh ngiode ai, Amahte thuhluphnak in nuncandan na zirh tuh i.

²⁴ Nupang pha lo le mi nupuite ai zawlhnak in na humhim tuh i.

²⁵ Na thinlung in amahte mawihnak ir malai, amahte mitkhiaphnak in na pom maseh.

²⁶ Mi pakhat in hlotlaunu tu, sang hlom khat man thawn zawng thai i, Ikhalselai nu le pa sualhnak in a nunhnak ai sumsaw hmuahhmuah boruai thai i.

²⁷ Na silhpon kang loniu in na kang songah mai dah thil aw sim?

²⁸ Na ke kang loin mailing vumah vak thil ngasim?

²⁹ Ciatih bangin midang nupui thawn it kawm heh a kihkul ngai i ai, A itpuitu hmuahhmuah heh cawhhnak tuar tuh i.

³⁰ Rikam manin rong a rutu heh amahte in nautat hang lo i,

³¹ Ikhalselai pom ngah lekhaw a let sarih in rul leh tuhai, A naihnak hmuahhmuah in pe tuh i.

³² Ikhalselai midang nupui thawn a sualtu heh ruathnak nai lo mivoi i. Amah veve hnawmcan dun i.

³³ Cawhkuan tuar in a hmingsia tuh i; Zomzet in zakthihnak phur tuh i.

³⁴ Pasal in a nupui sang nawn hlah lekhaw, A roh ngai in umhlah ai a rulthunhnak tu dap thil nawn lo i.

³⁵ Zaibang sum le saw pe ta inkhai lang nuam lo ai, Zaibang lutdunhnak inkhai a thinlung dap thil lo i.