Aanroling 5 - Zanniat Bible

Nu Le Pa Sualhnak Vumah Ralringhnak

¹ I fapa, i fimhnak le i linghnak heh phatak niu in ngai tulai felniu in ngaisung tu.

² Cen akontih in ziaza pha nai thil tuh ing ti ling thil tuhai, Na ponkam in na thulinghnak khiah larruai tuh i.

³ Nupang zuangzam hmurka tu khoitizu bangin hlum ai, A ponkam tu olive siti bangin nal tuh i.

⁴ Ikhalselai a tawphnak ahcen a kha ze le harsahnak siar lo, A dang zaikhai hlup tuh lo i.

⁵ Amah in mithi khua ah na duk tuh teu ai, A hlunhnak lampui tu thihhnak hleng tuh i.

⁶ Nunhnak lampui ah um loin vakvai ai, Ziang i cang i tikhai ling dun lo i.

⁷ I fapa, i ngai tulai, Zaikom inkhai i relhnak thu heh hai mah.

⁸ Ciabang nupang khiah hel tu. A dawngkham hiangah rin feh mah.

⁹ Hel hlahle sikhaw mi upathnak na naiciahnak khiah Na sut tuhai ninghiohnak a nai lo mite kut in, na dawnniu laiah na thi tuh i.

¹⁰ Miphundangte in na lianhnak na sut tuhai, Na naper man khiah midang pui in co tuh i.

¹¹ Na thi dawn fangin na kamriat ngasi khaw, na ruh niu lek tang tuh i.

¹² Cen, “Zaimanin zir ta lo ini ing? Zaimanin ning thurelhnak zaisiar loin um awng ita ing?

¹³ I zirhtute ai thu ngai lo ing; I reltute zaikhai siar fawn lo ing.

¹⁴ Ciamanin ruat lopui in midang hmaiah, Zakthi tuar ing,” tiin ti leh tuh isi.

¹⁵ Na nupui vumah rinsantlak in um tulai, Amah pakhat ian it tuh isi.

¹⁶ Midang nupang thawn na naihnak fate inkhai, Na vumah phathnak zaikhai bawn tuh lo i.

¹⁷ Na fate khai nangmah bawmtu tuhin khang tuhai, Miphundang incen na bawm tuh lo i.

¹⁸ Ciamanin na dawnniu laiah na nupui vumah lungawi tulai, A vumah lungawi nuamhnak nai tu.

¹⁹ Cen ani tu kiho bangin a mawi ngai le a daihkul ngai i. A daihkulhnak in lung na awiruai tuhai, A ithnak in na zel tuh i.

²⁰ I fapa, zaimanin nupang dang na daih i? Zaimanin midang nupui ai daihkulhnak heh na daih sawn i?

²¹ Bawipa in na bawnhnak hmuahhmuah hmu sio i, Na fehhnak cangcang ah na sik ngio i.

²² Misiavate ai sualhnakte tu thangtohhnak bang i, Amah ai sualhnak sur songah awk dun i.

²³ Amah veve kilkhawl dun thiam lo manin thi i, A voi ze manin amah ai hlankhur ah hlenpui leh tuh i.