Aanroling 18 - Zanniat Bible

¹ Midang thawn pawlkom thil hrimhrim lomi heh, Mah daihhnak ian a ruattu i. Midang ruathnak tu pom thil hrimhrim lo i.

² Mivoi in thu a ling le ling lo khiah thupui in ruat lo i; Zaitluk i fim ti larruai tuh ian hiam i.

³ Sualhnak le zakthi mualphohnak tu feh kawm ngiode i. Upathnak pairuai lesikhaw a tumrul in zohsuamhnak ngah tuh isi.

⁴ Minung ponkam heh fimhnak hampui cang thai i; Tipuithuanthum bangin thuk thai ai, a luangtu thliahthlo runpui ti bangin thar thai ngio i.

⁵ Mihrokhrawl pawl mithmai pha pe heh a dik lomi i; Midikcang mawhruai khai a dik lomi i.

⁶ Mivoi hmurka in haudunhnak suak i; Cen a ka in vitdunhnak sawm i.

⁷ Mivoi a pong fangin amah veve siatsuah dun betbo i; A ponghnak in amah veve awk dun i.

⁸ Mi relsiahnak thu tu ur roh i; hlum roh ai lem tlang hluanghlo ising.

⁹ Thazawng heh mi siatsuahtu tlukin siava i.

¹⁰ Bawipa tu a kho ngai buan hmun inn sardonsang i; Midikcangte tu ciata ah feh ai him tlang i.

¹¹ Miliante in amahte sumsaw khiah himhnak i tiin ruat tlang i; Sang ngai ai a kho ngai khuapui kulhhnak vingpui i tiin ruat tlang i.

¹² Aisu khai hniatacuhhnak a nai hlanlo upat pehnak ngah awng lo i. Mihngalte tu hnophnak lampui ah um i.

¹³ Thu na sawn hlanah phatak niu in ngai hmasa tu; Ciatihin bawn hlahle sikhaw mivoi isi ai hlaiah thu na sawnhnak khiah zohsuam isi.

¹⁴ Minung thinlung in urhnak tuar ben i; Ikhalselai aisu in thin khoi tuar ben i?

¹⁵ Mifimte tu zirnuamhnak thinlung nai ṭiode i.

¹⁶ Mi thupui tawk na nuam awm? Thil sum pha koih sah tulai bai niu in tawk thil tuh isi.

¹⁷ Thukhanhnak zung ah thu a rel hmasabertu heh midik ber bang i; Ikhalselai ciatihin a banghnak tu amah a eltu pa in a liklak in thu a zawt dekdo tian lek rai i.

¹⁸ Thuling ngai veve pahnih thukhanhnak zung ah thu el dun lekhaw, Camciafung ian in a thukhan thil i.

¹⁹ Na unau bawm tulai ani in a kho ngai khuapui vingpui bangin na hup tuh i; Ikhalselai hau lesikhaw nangmah caah a dawngkham kham tuh i.

²⁰ Na ponkam ai suakruaihnak a thai in rong na khamruai tuh i; Na kahmur in a suakhnak in lung na khimruai tuh i.

²¹ Na ponkam in na nunhnak a himruai thai bangin hnophnak ahkhai na hnawmruai thai i. Ciamanin na ponkam manin a hlenghnak thilte heh tuar ben kul isi.

²² Nupui nai heh thilpha tawk i; Ciami in Bawipa ai phathnak na vumah larruai i.

²³ Mifarah a pong fangin a ngen niu in ngen de i; Ikhalselai milian pa in awka hrang roh in mi sawn de i.

²⁴ Rualpui hrekkhat tu can comniu song ian kho i. Ikhalselai rualpui hrekkhat tu unau tahin mi hngaihngam sawn i.