Aanroling 11 - Zanniat Bible

¹ Cuai dik lo a hmangtute tu Bawipa in hua i, Ikhalselai cuailung dik vumah a lungawi i.

² Mah lala a porhduntute tu zohsuamhnak tawk tuh i, Ciamanin hniatacuh in um pha sawn i.

³ Mipha tu dikcanghnak in lam hoi i, Sangtlak lo mite tu amahte ai dikcang lohnak in siatsuah i.

⁴ Thihhnak a hleng nia ah lianhnak tu hnempui lo i, Ikhalselai dikcanghnak in na nunhnak na hum thai i.

⁵ Dikcanghnak in mipha pa ai nunhnak nuamruai i, Ikhalselai hrokhrawl mite tu amahte phatlohnak in amahte nunhnak tluruai i.

⁶ Dikcanghnak in midikcang luatruai i, Ikhalselai sangtlak lo mite tu amah ai duhhamhnak in awk i.

⁷ Mihrokhrawl a thi fangin amah ai umlamhnak khai thicih i, Lianhnak a rinsantu khiah zaikhai hnempui lo i.

⁸ Midikcangte tu harsahnak lakin ohnak ngah i, Mihrokhrawl pawl hnen sawn ah harsahnak hleng i.

⁹ Pathian zaisiar lotute ai ponkam in na siatsuah thai i, Ikhalselai midikcangte ai fimhnak in na o thai i.

¹⁰ Midikcangte bawngphahnak a tawk fangin khuasen in ang tlang i, Mihrokhrawl pawl a thi fangin ang in au tlang i.

¹¹ Midikcangte in hmuifu a pe fangin khua khangso i, Ikhalselai hrokhrawl mite ai ponkam in khuapui hnawmruai i.

¹² Mi zohsuamhnak ponka a pongtu heh mivoite i. Mifim ilesikhaw na ponka sup tu.

¹³ Katam pawl in thuthup phuang de i, ikhalselai sangtlak mite in thup ben i.

¹⁴ Konghoihnak um hlah lekhaw ram hnawm i, Ruathnak pha petu tam umhnak ah himhnak um i.

¹⁵ Na ling lomi pa khiah a laiba rul sah tuhin thukham lesikhaw na sir leh tuh i. Tel hlahle sikhaw nangmah caah pha sawn i.

¹⁶ Ninghio thiammi nu tu mi in upat i, Ikhalselai ziaza pha a nai lomi nu tu zakthikul i. Mi thazawng in sumsaw nai tuh awng lo i. Ikhalselai mithakolte tu lian tuh i.

¹⁷ Mi ninghio thiam ilesikhaw nangmah veve hmaiphahnak pe dun isi. Mi ninghio nai hlah lesikhaw nangmah veve siatsuah dun isi.

¹⁸ Mihrokhrawl pawl in hnempuihnak ngaingai tawk thil lo i. Ikhalselai thildik bawn lesikhaw lehsawng pemi i tuh rori isi.

¹⁹ Aisusu khai phathnak a bawn nuamtute tu nung tuh i. Ikhalselai aisusu khai phatlohnak a bawn ngiotu heh thi tuh i.

²⁰ Bawipa in thinlung pha lote hua i, Ikhalselai thildik a bawntute tu daih i.

²¹ Mihrokhrawl pawl cawh tuar tuh i ti khiah fiang i, Ikhalselai midikcangte tu luat tuh i.

²² A mawi ngai napui ruathnak nai lo nupang tu, Vok hnar ah sui vuh sah bang i.

²³ Midikcangte daihhnak tu phathnak ah suak de i, Mihrokhrawl pawl in amahte daihhnak a ngah tlang fangin mi zongzong thinraw de i.

²⁴ Mi hrekkhat siang ngai in amahte paisa hmang napui lian amam i, A dangte incen ralring ngai napui farah amam i.

²⁵ Siang ngai in nung tulai na lian tuh i, Midang bawm tulai na bawm thun tuh ve i.

²⁶ A man kai tuh deuh iang in rong a zuar sianglotu heh mi in siatcam i, Ikhalselai a zuar siangtu heh mi in thangphat i.

²⁷ Na tumtekhnak pha lekhaw mi in na upat tuh i, Ikhalselai harsahnak si lesikhaw, ciami tu ngah tuh isi.

²⁸ Lianhnak a rinsantute tu khuakhal can ai thinghnah bangin tlok tuh i. Ikhalselai midikcangte tu tlimniu bangin hing tuh hlelhlo i.

²⁹ A innsang vumah harsahnak a hlengruaitu heh hnuavai fangin zaikhai nai tuh lo i. Mivoite tu mifimte hnenum cang tuh ṭio i.

³⁰ Dikcanghnak ai thai tu nunhnak i. Ikhalselai phatlohnak in nunhnak pairuai i.

³¹ Miphate in laivum ah phatman ngah lekhaw, Mihrokhrawl pawl le misualte in zaitluk cawhhnak ngah tuh i ti fiang ngai i.