Aanroling 1 - Zanniat Bible

Thufim Songlawihnak

¹ David ai fapa, Israel kumpibawi, Solomon ai thufimte tu:

² Fimhnak, ruathnak pha le thudik relhnak ling thil thai tuhin na bawmtu tuh thufim um i.

³ Ciami thufim in umdan thiamhnak le dikcanghnak, Fimkhur le tluangtlam ai nungthilhnak tuh na zirh tuh i.

⁴ Ruathnak tlawm pawl khai fimruai thai ai, minote khai lingthiamhnak le ruatthiamhnak pe i.

⁵ Hemi thufim in mifimte tu amahte lingthiamhnak in dimruai tuhai, Mithiamte khai konghoi tuh i.

⁶ Ciamanin mifimte in a suahpuihnak thufim relfianghnak thuk ngai pawl le, Thu harsa pawl khiah lingthiam tuh i.

Minote Ca Khuaruah Pehnak

⁷ Pathian kihzah heh fimhnak ai hampanhnak i, Mivoite in fimhnak le zirhnak zaisiar lo i.

⁸ I fapa, na nu le na pa ai relhnak thu phaniu in ngai tu.

⁹ Amahte zirhhnak thu in na nuncan ziaza pharuai tuhai Na lu caah lupawng mawi ngai le na hawng caah khi mawi ngai cang tuh i.

¹⁰ I fapa, misualte in sual na so fangin ang mah.

¹¹ Anite in, “Kawi tulai mi pakhat tal rek tuhin si tuh ising, Sualhnak a nai lo mite heh a thupruk in bawh tuh ising!

¹² Mithi khua an mi a thon bangin a nungpah in thon tuh ising, Sualhnak nai lo napui khur songah a tlok bangin cang tuseh.

¹³ Thilri mankhung pawl lang tlang tuhai, Kin innte heh thilri mankhung thawn dimruai tuh ising!

¹⁴ Kin hnenah tel tu ve lai, Kin ruhnakte na zem tuh ve i ing,” tiin ning ti fangin,

¹⁵ I fapa, ciabang mite hnenah feh mah, Amahte lampui khiah hel tu.

¹⁶ Thil pha lo bawn tuhin rang ngaingai ai, Mirek tuhin ralring cia ngiode i.

¹⁷ Vaniu mithmuh in surthang siah heh a lovang cang i.

¹⁸ Ikhalselai hebang hrokhrawl mite in amahte veve thangtoh dun ai, Ciami thangtohhnak songah awk ai thi leh tuh i.

¹⁹ Nauneh ai thil suttute in ciatih bangin thihhnak si tlang de i.

Fimhnak Ai Sawmhnak

²⁰ Ngai tu ih! Lam lianpui le thilzuarhnak hmun an fimhnak auaw khiah!

²¹ Khuapui kotka le mi taikhawmhnak hmun an cawm ngai in au i.

²² Mivoite, zaikom tian ning voihnak ning daih tuhlai ini? Zaikom tian lingthiamhnak zohsuam heh a hiam ngai i ti tuhlai ai, lingthiamhnak hua tlang tuhlai i si?

²³ Thu ning tiam fangin phatak ngai in ngai tu ih, Ruathnak pha ning pe tuhai, I lingthiamhnak ning sem tuh ve ing.

²⁴ I hnenah kawi tuhin ning ko napui kawi ning nuam tlang lo i; I kut in ning zap napui zaikhai siar lo i si.

²⁵ Ruathnak pha i pehnakte khai zaisiar loin um tlang ai, Ning nuncan ziaza rem sah tuh khai ning daih lo i.

²⁶ Ciamanin harsahnak ning tawk fangin ning hnihsan tuhai Kihkul tongkhun in ning tuahmawh fangin a thupniu in hni tuh ing.

²⁷ Harsahnak tu hlisia bangin a hleng fangin le, a kihkul simpai bangin ning hual fangin, vansang le thinhar in um tlang tuh i si.

²⁸ Ciafangin i ko tlang tuh i si, Ikhalselai ning awi tuh lo ing; Nuamhmuncang ah ning in i si inkhai i tawk tlang tuh lo i si.

²⁹ Thulinghnak tu ning hua ai, Bawipa kihzah tuh ril tlang lo i si.

³⁰ I thuruahpehnak khai ning daih lo ai, nun thu ning tiam fangin ngai ning nuam fawn lo i.

³¹ Ciamanin ning perhnak bangin ngah leh tuh i si. Ning bawnhnak tepawl in urhnak ning pe tuh i.

³² Lungmu tlawm deuh pawl in fimhnak hnawl manin thi tlang i, Mivoite tu a ngulsulhnak in siatsuah i.

³³ Ikhalselai i thu a ngaitute cenin him tuhai, thinlauhnak zaikhai nai tuh lo i.