2 Timote 1 - Zanniat Bible

¹ Khrih Jesuh thawn kin pawlkomhnak manin kin thukhamhnak nunhnak thu phuang tuhin Pathian lungkhimhnak in Khrih ai nalang kaimah Paul in,

² i ithnak i fapa Timothy na hnenah lai na kuat ing. Pathian kin pa le Khrih Jesuh kin Bawipa in ngaihharhnak, ninghiohnak le daphnak na pe tu hram seh.

Anghnak Thu Le Thapehnak

³ I pupate ai amahte ruaih awng mi le thinlung thiangniu ai i ruaih ve mi Pathian hnenah anghnak thu rel ing. Sun le zan in i sawngenhnak ah nangmah na hih cang fangin Pathian hnenah anghnak thu rel ing.

⁴ Na mithli farhnak hih ṭiode ai i anghnak khim tuh liang in na tawk thil inglai i nuam ze i.

⁵ Sanghnak fel na naihnak hih ṭiode ing. Ciami sanghnak tu na pi Lois le na nu Eunice in naihnak sanghnak i. Tun inkhai ciami sanghnak nai lai isi, tiin sang ing.

⁶ Ciamanin na lu vumah kutsuanhnak i bawn awng laiah Pathian ai ning pehnak lehsawng nung tuh ngio in kilkhawl tu tiin i lingruaihnak i.

⁷ Zaimantifangin Pathian in kin pehnak rauhla in ralhutmi i cang ruai lo i; hathnak huham, ithnak le mah veve ukbenhnak in kin dimruai sawn i.

⁸ Kin Bawipa ai thu tu mi rel tuhin zakthi mah. Khrih caah thawng a totu kaimah ca ahkhai zakthi mah. Pathian in thazang na pe bangin Thuthangpha hrang rimsuhnak tuar ngam tu sawn law.

⁹ Pathian in amah ai minung cang tuhin kin ko ai nun kin o zo i. Ciatihin nun kin ohnak tu kinmah bawn benhnak kin nai manin ilo i, a ninghiohnak le tumtekhnak a nai man sawn in i. Hemi a ninghiohnak tu Khrih Jesuh hmangin can hampan hlan in pe awng zo i.

¹⁰ Ikhalselai kin Nunotu Bawipa Khrih Jesuh a hlenghnak songin tunah kin hnenah larruai i. Thihhnak ai huthawm boruai ai Thuthangpha songin kumkhua nunhnak larruai zo i.

¹¹ Pathian in Thuthangpha phuang tuhin le zirhtu tuhin i ril zo i.

¹² Hebangtluk ai i tuarhnak tu ciatih ai i ril zo manin i. Ikhalselai i rinsan ngah mi heh aisu i ti i ling manin muanghnak nai ing. Ciamanin a kut songai i kilruaihnak thil tu ciami Nia a hleng tianin himniu in amah in kilkhawl tuh i, ti ling ing.

¹³ I zirhciahnak thudik heh kho ngai in awh tulai na hlun tuh le na sikṭhim tuhin dah tu. Khrih Jesuh thawn kin pawlkomhnak manin i naihnak sanghnak le ithnak songah um tu ngio law.

¹⁴ Kin songai a nungmi Rauhla Thianghlim ai hathnak in na hnenah a pehnak thilpha pawl heh kilkhawl tu.

¹⁵ Asia peng songai a umtu hmuahhmuah in kin zangtak ai kin hlum zo sek i ti ling isi. Ciami songah Figelas le Hermogenes khai tel kawm i.

¹⁶ Ikhalselai Onesiphoras in vel tampui thin i nuamruai manin Bawipa ai a ninghiohnak heh a innsang ah hlengruai tu hram seh.

¹⁷ Thawng songah um napui zak i thihpui loin Rome khua a hleng sawngpah in i tawk hlanlo i si dekdo i.

¹⁸ Cia Nia ah Bawipa in ninghiohnak pe tu hram seh. Cen Ephesa khua ah zaitlukin kaimah caah naper i, ti khai fiangniu in na linghnak i.