2 Siangphahrang 9 - Zanniat Bible

Israel Kumpibawi Jehu

¹ Cialai ah prophet Elisha in prophette lakai mino pakhat khiah ko ai, “Ralring tulai Gilead ram Ramoth ah feh tu. Hemi olive thau bung khiah keng tulai,

² ciata na hleng fangin Nimshi ai tupa Jehu, Jehoshaphat ai fapa si hmasa tulai,

³ hemi thau khiah a lu ah burh in, ‘Israel kumpibawi tuhin Bawipa in thau na pawh i,’ ti tu. Cen rang ngai in dawp tu,” tiin ti i.

⁴ Ciatihin mino pa prophet pakhat tu Ramoth ah feh ai,

⁵ bawite a taikhawm tlang lak tawk i. Ciafangin prophet in, “Bawipa na tawk vut i nuam i,” ti i. Jehu in, “Aisu sawn pon isi?” ti i. Ciafangin prophet in, “Bawipa nangmah,” ti i.

⁶ Cen anite pahnih tu inn songah lut kawm ai prophet in olive thau khiah Jehu lu ah burh ai, “Bawipa, Israel ai Pathian in ‘I miphun Israel mite ai kumpibawi tuhin thau na pawh ing.

⁷ I prophette le i cengfate Jezebel in a rek manin amah i cawh tuhin Ahab ai fapa, kumpibawi na bawipa heh rek tuh isi.

⁸ Ahab innsang le a tesinfate tu thi kul i; a dawn ituseh, a tar ituseh, a innsang ai pasal hmuahhmuah cihmit tuh sio ing.

⁹ Nebat ai fapa kumpibawi Jeroboam innsang le Ahijah ai fapa kumpibawi Baasha innsangte vumah thil i bawnhnak bangin Ahab innsang vum ahkhai bawn tuh ve ing.

¹⁰ Jezebel tu aisu inkhai phum tuh lo i; a luang tu Jezreel ramah uicote in ai tlang tuh i,’ ti i,” tiin rel i. Ciami a rel ben sawng fangin prophet mino pa tu suak ai dawp i.

¹¹ Jehu tu a rualpui bawite hnenah let i. Anite in, “Ziang thula um i?” Khia mivoi pa in zaimanin na tawk nuam i?” tiin zawt tlang i. Jehu in, “Zaibang minung i ti le ziang daih i ti khiah ling tlang ngawn lo i sim?” ti i.

¹² Anite in, “I lo i, ling tlang lo ngaingai na ingkhaw. A tihnak tu kin rel tucuk law,” tiin ti tlang i. Ciafangin Jehu in, “Bawipa in ‘Israel kumpibawi tuhin thau na pawh ing,’ na ti i, ti i,” tiin rel i.

¹³ Ciasawng fangin a rualpui bawite tu amahte korfualte hawk tlang ai Jehu dinghnak tuhin kaipum vumta ber ah phah tlang ai thirhlung a hmut tlang hnuaah, “Jehu tu kumpibawi i,” tiin amahte aw naih tawp suah in au tlang dekdo i.

Kumpibawi Joram Rek Tlang I

^14-15 Cen Jehu in kumpibawi Joram heh engsan i. Kumpibawi Joram tu Syria kumpibawi Hazael tawng ai Ramoth ah ma liam ai a hmaihma lawm nuam in Jezreel ah a feh hmun an akonah khai suak lai lo i. Jehu in a rualpui bawite hnenah tu, “Kaimah lamah ṭang tlang le i sikhaw Jezreel khua mite rel tuhin aisu khai Ramoth khua an suak tlang tuh lo i si,” tiin ti i.

¹⁶ Cen a siphuhleng vumah to ai Jezreel lamah feh i. Joram tu cak ciang lai lo ai Judah kumpibawi Ahaziah in a fan laitak i.

¹⁷ Jezreel khua kotka kiltu in Jehu le a minungte a kawi tlang khiah hmu ai, “Siphuh vuman mi kawi hmu ing,” tiin au i. Joram in, “Kinmah rualpuite i, ti le kin ralte i, ti a zongtu tuhin ralkap pakhat hlat tu,” tiin thupe i.

¹⁸ A hlathnak pa in Jehu heh tawk ai a hnenah, “Rualpui pha in kawi isim, tiin kumpibawi in ling nuam i,” ti i. Ciafangin Jehu in, “Ciami tu na naper ilo i, i khel lamin i hlun tu sawn!” ti i. Kotka kiltu in, “Kin hlathnak pa tu anite thawn tawk dun zo napui let bang nawn hlah,” ti i.

¹⁹ Midang hlat lala ai a hmasa ai bangin Jehu in zawt ve i. Jehu in, “Ciami tu na naper ilo i; i khel lamin i hlun tu sawn!” ti i.

²⁰ Cen kotka kiltu pa in, “Kin hlathnak pa thawn khai tawk dun zo napui ani khai let lo i. Amahte hotu pa in a siphuhleng heh rang roh in mawng i, Jehu bang ngai i!” tiin ti lala i.

²¹ Ciasawng fangin Joram in, “I siphuhleng koih tu taito ih!” tiin thupe i. Koih sah tlang ai Joram le a kumpibawi Ahaziah tu amahte siphuhleng veve in Jehu tawk tuhin suak kawm i. Feh kawm ai Naboth vuandum ah Jehu heh tawk kawm i.

²² Ciafangin Joram in, “Thu pha in kawi aw sim?” tiin Jehu zawt i. Jehu in, “Na nu Jezebel ai panhnak milim bia le polsia leng in kin ram a dim song ahcen ziang thu pha um thil pa ngai?” tiin sawn i.

²³ Ciasawng fangin Joram tu hnua lamah her ai dawp kongin, “Kin tawngcai i, Ahaziah!” tiin au i.

²⁴ Ciafangin Jehu in a li le thal suah ai a tha naih tawp in er ai Joram heh a zangkhun ah sai ai a lung kha lio i. Joram tu a siphuhleng songah sawn ai thi i.

²⁵ Jehu in amah bawmtu Bidkar hnenah, “A luang lang tulai Naboth vuandum ah lon tu. Joram ai pa Ahab hnua i hlun laiah nangmah thawn siphuh vuman heta dungso ah feh kawm ai Bawipa in Ahab tawngcaihnak pong ai,

²⁶ Mizan ah Naboth le a fapate rek tlang ai amahte thisan hmu ing. Hemi hmun thotho ah phuzul tuh ing, tiin thu na kham ing,’ a ti khiah hih aw lai sim! Ciamanin Bawipa ai a relciahnak bangin Joram luang lang tulai Naboth vuandum ah lon tu,” tiin thupe i.

Judah Kumpibawi Ahaziah Rek Tlang I

²⁷ Ciami tu kumpibawi Ahaziah in a hmu fangin a siphuhleng in Beth Haggan khua lamah tlan i; a khel lamin Jehu in hnawh i. “Ani khai rek tu ih!” tiin Jehu in a ralkapte heh thupe i; Ahaziah tu Ibleam khua hiangah ma liam i. Ikhalselai Megiddo khuapui tu hleng ben ai cia khua ah thi i.

²⁸ A luang tu a kuthnia tlangsuakte in siphuhleng in Jerusalem ah phur tlang ai Jerusalem David khuapui, kumpibawi hlanmual ah phum tlang i.

²⁹ Ahziah tu Ahab ai fapa Joram, Israel kumpibawi a cang kum hlaikhathnak ah Judah kumpibawi cang i.

Kumpibawinu Jezebel Rek Tlang I

³⁰ Cen Jehu tu Jezreel khua hleng i. Jezebel in thula tu ling sio ai a mit rong ah a hang mat i, a sam bawn ai kumpibawi inn ai tukvirh in a hnia ai lampui dunghlun cuan i.

³¹ Jehu tu khuapui kotka in lut ai Jezebel in, “Aw Zimri! aw mirek pa, heta ah ziang bawn isi?” tiin auh i.

³² Ciafangin Jehu in sik ai, “Kaimah lamah aisu ṭang i?” tiin au i. Kumpibawi inn ai bawite pahnih pathum dung in tukvirh in sik tlang i;

³³ cen Jehu in, “Khiami nu heh lon tu lio ih!” tiin ti i. Jezebel heh lon tlang ai a thisan in bangkhangte le siphuhte phiah sio i. A luang vuman Jehu in a siphuhleng mawng ai,

³⁴ kumpibawi inn ah lut ai rong ai i. Ciahnua fang ian in, “Khiami nupang sualral khiah khul tlang tu ilai phum tu ih, kumpibawi fanu i heh ta in!” tiin ti i.

³⁵ A luang khul tuhin mi hrekkhat feh tlang ai a sik fangin a luruh, a keruh le a banrukte lek hmu tlang i.

³⁶ Ciami tu Jehu a rel tlang fangin ani in, “Hetihin cang tuh i, tiin Bawipa in rel cia i; a sal pa prophet Elijah hnenin ‘Jezebel ai sa tu Jezreel ram songah uicote in ai tlang tuh i.

³⁷ A luang tu ek bangin piak tuh sio ai aisu inkhai Jezebel i ti lingthiam tuh lo i,’ ti cia zo i,” tiin ti i.