2 Siangphahrang 8 - Zanniat Bible

Shunem Nupang Nu Let Leh I

¹ Shunem khua ai ummi, a fapa a nungruai lehsal mi nupang nu hnenah, “Tho tulai Bawipa in a sangsang in kum sarih riantlungruai tuh manin, nangmah le na innsangte thawn hmundang ah feh le i sikhaw pha tuh i,” tiin Elisha in ti i.

² A thurelhnak ngai in a innsangte thawn Filistin ramah feh ai ciata ah kum sarih song um tlang i.

³ Kum sarih hnuaah ciami nupang nu tu Israel ramah tlung leh ai a inn le a lote ngah thillehnak tuh kumpibawi ngen tuhin feh i.

⁴ Cialak ah kumpibawi tu Elisha hnenum pa Gehazi thawn thurel kawm thliahthlo i. Elisha in ngaihsunurkul a bawnhnak tepawl heh kumpibawi in ling nuam ngai i.

⁵ Elisha in naupang pa a nungruai lehsal thu Gehazi in kumpibawi a rel thliahthlo laitak ah Shunem nupang nu in kumpibawi hnenai a ngenhnak thu rel i. Ciafangin Gehazi in, “Aw kumpibawi, i relhnak nupang nu le Elisha ai a nungruai lehsal mi a fapaniu tu heta ah kawi kawm i,” tiin ti i.

⁶ Kumpibawi in thu a zawt betbo fangin Gehazi ai relhnak tu thudik i ti khiah ling i. Cen kumpibawi in a kuthnia ai tlangsuak pakhat ko ai ciami nupang nu hnenah hlanai a naihnak hmuahhmuah le a um lo kum sarih song a lo song suak rong man hmuahhmuah khai pe tuh sio in thupe i.

Elisha Le Syria Kumpibawi

⁷ Vaikhat ah Elisha tu Damascus khua ah feh i. Cialak ah Syria kumpibawi Benhadad tu ur ngelcel i. Elisha tu Damascus khua songah um i, ti khiah kumpibawi in a ling fangin,

⁸ a kuthnia ai tlangsuak pakhat Hazael ko ai, “Prophet heh lehsawng pe ta tulai i nung tuh maw, i nung tuh lo Bawipa i zawt sah tu hram seh,” tiin ti i.

⁹ Ciamanin Hazael in Damascus ai a suakhnak thilri a pha ber pawl a phunkhim in lang ai kalauk sawmli phurruai ai Elisha hnenah feh i. Hazael in Elisha a tawk fangin, “Na cengfa Syria kumpibawi Benhadad in a urhnak in i cak tuh maw, cak tuh lo ti na zawt tuhin i hlat i,” tiin ti i.

¹⁰ Ciafangin Elisha in, “Na kumpibawi heh thi tuh i, tiin Bawipa in i hnenah phuang zo i; ikhalselai feh tulai na nung tuh i ti rel tu,” tiin ti i.

¹¹ Cen Elisha incen a mithmai sia in Hazael mit en ngio ai Hazael tu a um nuam lo ai a hmai tianin san sio i. Cen Elisha tu rinlopui in kap i.

¹² Ciafangin Hazael in, “Bawipa zaiman kap isi,” tiin zawt i. Elisha in, “Israel mite vumah thil siava na bawn tuhhnak hmu manin kap ing. Amahte ralving mai in tai tuh sio isi, a tlangvalte ralvang in cihmit in rek tuh sio isi, a fate laipua ah a thi tian vit tuh ai naupai nupangte a ril puah tuh sio isi,” tiin sawn i.

¹³ Ciafangin Hazael in, “Akontih in ciabang bawnthilhnak huham nai tuh ing? Kai tu uico tluk fang ing; zaikhai ilo ing,” ti i. Elisha in, “Bawipa in i hmuh zo ai Syria ram kumpibawi cang tuh isi,” ti i.

¹⁴ Hazael tu let ai Benhadad in, “Elisha in ziang na ti pa?” tiin zawt i. Ciafangin Hazael in, “Nung tuh i, na ti i,” tiin rel i.

¹⁵ Ikhalselai a thangha fangin Hazael in pon sah ngai pakhat lang ai ti songah a niat hnuaah kumpibawi in a hmai tuam ai kumpibawi khiah rek i. Ciatihin Hazael tu kumpibawi ah cang i.

Judah Kumpibawi Jehoram

¹⁶ Ahab ai fapa Joram tu Israel kumpibawi a canghnak kum, kum ngahnak ah Jehoshaphat ai fapa Jehoram tu,

¹⁷ Judah kumpibawi cang pan i. Kumpibawi a cang fangin kum sawm thum le kum hnih i ai Jerusalem khua an kum riat song uk i.

¹⁸ A nupui tu Ahab ai fanu i ai Ahab innsang bangin Jehoram inkhai Israel kumpibawite ai bawnhnak thil sual hlun ve i. Bawipa vumah sualhnak bawn i;

¹⁹ ikhalselai Judah ram tu Bawipa in siatsuah siang lo i, zaimantifangin a sal pa David hnenah a tefate in ram uk tuh ngio i, ti ai thu a kham zo manin i.

²⁰ Jehoram kumpibawi ram a uk laiah Judah tawng tuhin Edom mite ral tho tlang ai amahte hlanlam ukdunhnak ngah tlang i.

²¹ Ciafangin Johoram incen a siphuhlengte thawn Zair ah feh ai ciata ah Edom ralkapte in kulh sio i. Zan seulai Jehoram le a siphuhleng mawng hotute in amahte kulhtu Edom ralkapte heh pel teu ai luat tlang i; ralkapte tu amahte inn ṭen ah tlung tlang sio i.

²² Ciami ai panin Edom tu Judah ram thawn peh dun nawn loin mah hlanlam ukdunhnak ngah i. Ciami can thotho ah Libnah khuapui khai ral tho i.

²³ Jehoram ai naperhnak dangdangte tu Judah kumpibawite Ai tluanthu Laibu tihnak songah ngan tlang i.

²⁴ Cen Jehoram tu thi ai Jerusalem David khuapui, kumpibawi hlanmual ah phum tlang i. Cia hnuaah a fapa Ahaziah in a tumrul in kumpibawi tuhin sawng i.

Judah Kumpibawi Ahaziah

²⁵ Ahab ai fapa Joram tu Israel kumpibawi cang ai kum hlaihnihhnak ah Jehoram ai fapa Ahiziah in,

²⁶ Judah kumpibawi cang pan i. Kumpibawi a cang fangin amah tu kum kul hluanhnih i. A ram tu Jerusalem an kum khat song uk i. A nu Athaliah tu Israel kumpibawi Omri ai tunu i.

²⁷ Ahaziah tu hoidunhnak in kumpibawi Ahab thawn peh dun imanin Ahab ai innsang bang thotho in Bawipa vumah sualhnak bawn i.

²⁸ Kumpibawi Ahaziah in Israel kumpibawi Joram ṭanpui ai Syria kumpibawi Hazael tawng kawm i. Gilead ram Ramoth ah tawng dun ai Joram tu ma liam i.

²⁹ Ciamanin khuapui ah a cak nuam in let i. Ciafangin Judah kumpibawi Ahaziah in fan i.