2 Siangphahrang 3 - Zanniat Bible

Israel Mite le Moab Mite Tawngdunhnak

¹ Judah kumpibawi Jehoshaphat in a ram ukhnak kum hlairiathnak ah Ahab ai fapa Joram tu Israel kumpibawi ah cang ai Samaria khua an kum hlaihnih song uk i.

² Bawipa ai hmaiah sualhnak bawn i; ikhalselai a pa le a nu Jezebel tluk lawmlam in tu sual lo i. A pa ai Baal biahnak milimte a bawnhnak heh bal sek i.

³ Ikhalselai amah hlanai kumpibawi Nebat ai fapa Jeroboam bangin Israel mite tu sualhnak lampui ah hoilut ai ciami sualhnak heh com nuam lo i.

⁴ Moab kumpibawi Mesha in tuu zua ai kumsiar in siahkhon ah tuu niu ting khat le tuu ting khat ai hmul heh Israel kumpibawi hnenah pe de i.

⁵ Ikhalselai Israel kumpibawi Ahab a thi fangin Israel mite tawng tuhin Mesha in ral tho i.

⁶ Cia sawngpah in kumpibawi Joram tu Samaria in suak ai a ralkapte kokhawm diamdo i.

⁷ Cen Judah kumpibawi Jehoshaphat hnenah, “Moab kumpibawi tu kaimah tawng tuhin ral tho ihang. Amah tawng tuhin i bawm thil nga sim?” tiin thucah i. Ciafangin kumpibawi Jehoshaphat in, “Na bawm tuh ing. Kaimah le i ralkapte le i siphuhte tu na daihdaih in kin hmang tu.

⁸ A konteng lamin tawng tuh ising?” tiin zawt i. Joram in, Edom ramai hampalak in feh tuh ising,” ti i.

⁹ Ciamanin Israel kumpibawi Joram tu Judah kumpibawi le Edom kumpibawite thawn suak tlang i. Ni sarih a feh tlang hnuaah amahte kenghnak ti bo i. Minung ca ituseh sumhnam hrangah ituseh zaikhai um nawn lo i.

¹⁰ Ciafangin kumpibawi Joram in, “Kin bo ihang! Moab kumpibawi in a nuamnuam in kin bawn tuhin Bawipa Pathian in kinmah pathum heh kin ruat cia ihang!” ti i.

¹¹ Cen kumpibawi Jehoshaphat in, “Bawipa kin zawtthilhnak tuhin heta ah prophet aisu tal um lo im?” tiin zawt i. Ciafangin kumpibawi Joram in ralbawi pakhat, “Shaphat ai fapa Elisha um ikhaw. Ani tu Elijah bawmtu awng i,” tiin rel i.

¹² Kumpibawi Jehoshaphat in, “Elisha tu prophet dik i,” ti i. Ciamanin a pathum in Elisha hnenah kawi tlang i.

¹³ Ciafangin Elisha in Israel kumpibawi hnenah, “Zaimanin i hnenah kawi i si? Na nu le na pate ai a leng kawm dehnak prophette heh tawk tu,” tiin ti i. Joram in, “I lo i; Kinmah kumpibawite pathum heh Moab kumpibawi in a nuamnuam in kin bawnthilhnak tuhin kin dahtu heh Bawipa i,” ti i.

¹⁴ Elisha in, “Na i ruaihmi a nungmi Pathian hming sal in na rel ing: Judah kumpibawi Jehoshaphat i upathnak um hlah selai nang tu a sik khai na sik i nuam lo i.

¹⁵ Zaizai ita inkhai congcing tum thiam i si tu,” tiin ti i. Congcing tum thiam pa in congcing tum ai, cialak fangin Bawipa ai huham tu Elisha hnenah hleng ai,

¹⁶ Elisha in, “Bawipa in, ‘Hemi rawn ro ah khur co tu ih.

¹⁷ Hli le ruah hmu tuh lo napui hemi rawnti luanghnak tu ti in dim tuhai ningmah le ning ralkapte ca le ning sumhnamte hrangah ti tampui in um tuh i,’ tiin ti i.

¹⁸ Ikhalselai hemi tu Bawipa caah thil bai niu i. Ciahlaiah Moab mite vumah nehhnak Bawipa in ning pe tuh fawn i.

¹⁹ Mawi ngai ai a bawnhnak le pha bik ai a kulhhnak a khuapuite lang tuh sio i si. A thai tampui thingkungte vawng tuh sio i si. Amahte cirhti hmuahhmuah kangruai tuh sio ai, amahte loram pha hmuahhmuah khai lungto in sep tuhai siatsuah tlang tuh sio i si,” tiin ti i.

²⁰ A thangha, zing lam hibawlhnak sel can fangin Edom lamin ti luang ai laipua khuk sio i.

²¹ Kinmah tawng tuhin kumpibawite pathum kawi tlang zo i, ti khiah Moab mite in a ling tlang fangin fai le vang awhthaitu pasal hmuahhmuah, upa ber in nauta ber tian kokhawm dun tlang sio ai amahte ram an ṭanghmun khuar tlang i.

²² A thangha zingniu in a tho tlang fangin ni in ti khiah det ai thisan bangin a san in hmu tlang i.

²³ “Thisan ina e! Kin ral ralkap bur thum tepawl amahte lala tawng dun ai rek dun tlang tuh sio i. Feh ngasing khaw amahte riahbuk rok tlang tuh ising,” tiin ti tlang i.

²⁴ Ciatihin feh tlang i, ikhalselai Israel mite ai riahbuk a hleng fangin Israel mite in tawng dekdo ai let tlang i. Israel mite in hnawh ai Moab mite tampui rek tlang ai,

²⁵ amahte khua tampui siatsuah i. Amahte fehhnak ai loram pha hmuahhmuah vumah Israel mite pakhat in lungto pakhat ṭen sep tlang ai amahte loram hmuahhmuah heh lungto in dim sio i. Amahte cirhti khai kangruai sio ai, thingthai kungte khai vawng sek i. A hnuataber ah a khuapui ber Kirhareseth lek tang ai Israel mite lunghersep thiam pawl in kulh ai tawng tlang i.

²⁶ Moab kumpibawi in a ralkapte sung deuhdeuh ti khiah a ling fangin ralvang hmang ralkapte za sarih thawn a ralte ai a kulhhnak hmun pakhat in pel teu ai Syria kumpibawi hnenah tlan tum i. Ikhalselai pel thil lo i.

²⁷ Ciamanin amah tumrul in kumpibawi a cangtu tuh, a fapa upa ber ko ai amahte khuapui ving kulhhnak vum Moab khuavang hnenah maitai hibawlhnak hrangah rek ai sel i. Israel ralkapte in ciami hmu fangin thin lau tlang ai ciami khuapui an khel lamah let ai amahte ramah tlung tlang i.