2 Siangphahrang 24 - Zanniat Bible

Ralte In Judah Neh I

¹ Jehoiakim Judah kumpibawi awng laitak ah Babylon kumpibawi Nebuchadnezzar in Judah ram tawng ai kum thum song Nebuchadnezzar kuthnia ah um tlang i. Cia hnuaah ral tho tlang i.

² Ikhalselai Bawipa in Babylon mi, Syria mi, Moab mi le Ammon mite heh Jehoiakim tawng tuhin le Judah ram siatsuah tuhin hlat tlang i. Hemi tu Bawipa in a naruaihtu prophette hnenai a relciahnak a khimruaihnak tuh i.

^3-4 Kumpibawi Manasseh ai sualhnak hmuahhmuah manin le, a hlaice in, sualhnak nai lo mite ai thisan tam ze a luangruai manin Bawipa in Judah mite tu a mithmuh lohnak ramah hnawt tum manin hemi thilte khiah amah ai thupehnak in canghnak i. Bawipa in Manasseh heh ngaithiam thil lo i.

⁵ Jehoiakim ai naperhnak dangdang tu Judah Kumpibawite Ai Tluanthu Laibu songah ngan tlang i.

⁶ Jehoiakim tu thi ai a fapa Jehoiachin in a tumrul in kumpibawi cang i.

⁷ Egypt kumpibawi le a ralkapte tu amahte ram an ramdang ah vel khat khai feh ben leh nawn lo i; zaimantifangin Egypt ai uk awnghnak ram tampui Babylon kumpibawi in lang sio ai Euphrates Runpui in Egypt Runpui tian uk sio i.

Judah Kumpibawi Jehoiachin

⁸ Jehoiachin tu kum hlairiat a khim fangin Judah kumpibawi cang ai Jerusalem an hlathum song uk i. A nu tu Jerusalem khuami Elnathan ai fanu Nehushta i.

⁹ Jehoiachin tu a pa ai ziaza a hlun manin Bawipa vumah sual i.

¹⁰ Jehoiachin Judah kumpibawi awng laiah Babylon ralbawite Nebuchadnezzar ai ralbawite ho in Judah ramah hleng tlang ai Jerusalem khuapui kulh tlang i.

¹¹ Ciatihin a kulh songah Nebuchadnezzar amah rori Jerusalem ah kawi ai,

¹² Kumpibawi Jehoiachin tu a nu, amah a ruaihtu hnenumte, a kuthnia ai tlangsuakte le kumpibawi ralkapte hotu bawite thawn in Nebuchadnezzar hnenah feh tlang ai a kuthnia ah lut tlang i. Nebuchadnezzar in Babylon ram a ukhnak kum riat kum ah Jehoiachin heh pom lio ai,

¹³ Bawipa Biakinn le kumpibawi inn ai a umhnak sui le ngun tu Babylon ah phur sio i. Bawipa ai rel cia bangin Nebuchadnezzar in Bawipa Biakinn ai hmang tuhhnak hrangah Solomon in sui ai a bawnhnak thilrite tu seu sek i.

¹⁴ Jerusalem khuasong mi, kumpibawi songkhat le hotute, amahte veksen in thawng hra, Babylon ah Nebuchadnezzar in sal tuhin fehpui i. Zungthiamte le pumsute tianin fehpui sio ai Judah ram ahcen mifarah ber pawl lek hlum i.

¹⁵ Cen Nebuchadnezzar in kumpibawi Jehoiachin tu a nu le a nupuite, a kuthnia tlangsuakte le Judah ram hotute thawn Babylon ah sal cang tuhin fehpui i.

¹⁶ Mi thahat le mi thupui pawl le raltawng tuhin a ralring lep ralkapte thawng sarih, le zungthiamte le pumsute minung thawng khat, Babylon ah fehpui i.

¹⁷ Nebuchadnezzar in Jehoiachin ai pakhatta, Mattaniah tu Judah kumpibawi ah bawn ai a hming heh Zedekiah tiin thleng i.

Judah Kumpibawi Zedekiah

¹⁸ Zedekiah tu kum kul hluankhat a khim fangin kumpibawi cang ai Jerusalem an kum hlaikhat song uk i. A nu tu Libnah khuami Jeremiah ai fanu Hamutal i.

¹⁹ Kumpibawi Jehoiakim ai sualhnak a bawn awnghnak heh kumpibawi Zedekiah inkhai bawn ve ai Bawipa vumah misual i.

²⁰ Jerusalem le Judah mite vumah Bawipa tu a thinraw manin a mithmuh lo hmun ramah hnawt sek i.