2 Siangphahrang 16 - Zanniat Bible

Judah Kumpibawi Ahaz

¹ Remaliah ai fapa Pekah in Israel ram a uk kum hlaisarih kum ah Jotham ai fapa Ahaz tu Judah kumpibawi cang i.

² Kumpibawi a cang fangin Ahaz tu kum kul i ai Jerusalem an Judah ram heh kum hlairuk song uk i. A pu David bawnhnak thilpha heh bawn lo i; Bawipa Pathian daih lohnak bawn ai,

³ Israel a dang kumpibawite ai hnua hlun i. Israel mite Canaan ram a lut laiah Canaan ramai a ummi, Bawipa ai a hnawt sek mite ai bawnhnak thil ningdulkul pawl bawn ve i. Amah fapa rori khai milim hnenah maitai hibawlhnak ah sel i.

⁴ Tlang phundir vum le thingpui nim hnia cang ai lawki mite khuavang biahnak hmuncang ah Ahaz in hibawl ai rimhmui tai de i.

⁵ Syria kumpibawi Rezin le Israel kumpibawi Pekah in Jerusalem khua tawng ai kulh kawm sio i; ikhalselai Ahaz tu neh ben lo i.

⁶ Cialai ah Edom kumpibawi in Elath khuapui lang leh ai ciata ai a ummi Judah mite heh hnawt sek i. Elath khua ah Edom mite um tlang ai tun san tianin um tlang lai i.

⁷ Ciafangin Ahaz in Assyria Kumpimangbawi Tiglathpileser hnenah thucah ai, “Kai tu na naruaihtu na cengfa le na fapa ing. Syria kumpibawi le Israel kumpibawi in kin tawng manin kin hup tu hram law,” tiin ti i.

⁸ Ciahlaiah Ahaz in Biakinn ai sui le ngun le kumpibawi inn ai sui le ngun lang ai Assyria Kumpimangbawi hnenah lehsawng in kuat i.

⁹ Ahaz ai ngenhnak bangin Tiglathpileser tu a ralkapte thawn feh tlang ai Damascus tawng ai lang i; Kumpibawi Rezin khiah rek ai khuasong mite tu Kir khua ah sal tuhin fehpui i.

¹⁰ Cen kumpibawi Ahaz tu Kumpimangbawi Tiglathpileser tawk tuhin Damascus khua ah a feh fangin ciata ah puleng hmu ai ciami bang cekci in tiang tuhin a pianzia heh a khim ngai in suangbawi Uriah hnenah kuat i.

¹¹ Ciami puleng bangin Uriah in puleng tiang ai Ahaz a let hlanah ben sio i.

¹² Ahaz tu Damascus in a hleng leh fangin puleng tiang ben zo ti hmu ai,

¹³ A vum ahcen hibawlhnak ai selhnak sumhnamte tai ai sangvut hibawlhnakte khai sel i; ciahlaiah dinti hibawl ai selhnak sathi phiah i.

¹⁴ Bawipa ca ciangruaihnak, dar ai bawnhnak puleng tu puleng thar le Biakinn karlak ah um i ai ciami heh puleng thar ai sak lamah thawn i.

¹⁵ Cen Uriah tu, “Hemi i puleng lianpui heh zing lam maitai hibawlhnak le zan lam sangvut hibawlhnak ah hmang tulai, kumpibawi le mizapui ai maitai hibawlhnak le sangvut hibawlhnak hrangah hmang tu; mizapui ai dinti hibawlhnak hrangah khai i tuh i. Hibawlhnak ai selhnak sumhnam hmuahhmuah ai sathi heh a vumah burh tu. Ikhalselai dar puleng tu kaimah ca lek tuh i ai tlahsanhnak ah hmang tuh ing,” tiin thupe i.

¹⁶ Uriah in kumpibawi ai thupehnak bangin bawn sio i.

¹⁷ Cen kumpibawi Ahaz in Biakinn songai umhnak lengkete bal ai a vumai umhnak maihumte lang i; cen dar kawlpawcangte hlaihnih hnua lamai umhnak dar tikuang lang ai lungtlep phahhnak vumah dah i.

¹⁸ Ciahlaiah Assyria kumpimangbawi lungawiruai tuhin Ahaz in Biakinn songai umhnak kumpibawi tohkham dahhnak sardonsang lang lio ai Biakinn songai kumpibawi luthnak lampui heh phit sio i.

¹⁹ Kumpibawi Ahaz ai bawnhnak dangdang tu Judah Kumpibawite Ai Tluanthu Laibu songah ngan tlang i.

²⁰ Ahaz tu thi ai Jerusalem, David khuapui ai kumpibawi hlanmual ah phum tlang i. Cen a fapa Hezekiah in a tumrul in kumpibawi tuhin sawng i.