2 Siangphahrang 14 - Zanniat Bible

Judah Kumpibawi Amaziah

¹ Jehoahaz ai fapa Jehoash in Israel kumpibawi a cang kum kum hnihhnak ah Joash ai fapa Amaziah tu Judah kumpibawi cang i.

² Amah tu kum kul hluannga i. Jerusalem an kum kul hluankua song ram uk i. A nu tu Jerusalem khuami Jehoaddin i.

³ Amaziah in Bawipa ai daihdan bawn i; ikhalselai a hlanai kumpibawi David tluk tu ilo i. A pa Joash bangin bawn i.

⁴ Lawki mite ai khuavang biahnak bal lo manin mi tampui in hibawlhnak sel ai rimhmui tai tlang thotho i.

⁵ Amaziah in a khokhah in ram a uk ben fangin a pa, kumpibawi a rektute tu rek thun ve sek i.

⁶ Ikhalselai a fate tu rek lo i; Moses Dan songai Bawipa ai thupeciahnak, “A fate sual manin a nu le a pate rek tuh lo i si; nu le pate sual manin a fate rek tuh lo i si; amah ai sualhnak lek ah minung rek tuar tuh i,” tihnak khiah hlun sawn i.

⁷ Cen Amaziah in Tipui Thi hlang lamai Ci phairawn tihnak ah Edom ralkapte thawng hra rek i. Sela khua lang ai Joktheel tiin a hming thleng i. Tunnia tianin ciatihin ko lai i.

⁸ Cen Amaziah in Israel kumpibawi Jehoash hnenah, “Na tawng ngam ing,” tiin thucah i.

⁹ Ikhalselai kumpibawi Jehoash in, “Vaikhat ah Lebanon tlang ah, hlingbur pakhat in cedar thing hnenah thucah ai, “I fapa ca na fanu i pe tu,” ti i. Sahrang pakhat a hiangah kawi ai hlingbur heh fon ai tat sek i.

¹⁰ Tun in Edom mite na neh manin na puarthau ai na hngal ze i. Na mi nehhnak vumah lungkhim tulai dapthen in um tu menma. Nangmah le na minungte ca ai siatsuah tuhhnak thil heh zaimanin sualsi hnelhno isi?” tiin thu khirh i.

¹¹ Ikhalselai Amaziah in ciami thu tu ngai nuam lo i. Ciamanin kumpibawi Jehoash tu a ralkapte thawn feh tlang ai Judah ram Beth Shemesh tihnak hmunah kumpibawi Amaziah thawn tawng dun i.

¹² Amaziah ai ralkapte tu sung ai amahte inn ṭen ah tlung tlang sio i.

¹³ Jehoash in Judah kumpibawi, Amaziah heh pom lio ai a khuapui Jerusalem khai lang i; khuapui kulhhnak ving heh Epharaim kotka in Khua ning kotka tian, kaih zahnih song, bal sek i.

¹⁴ A hmuhnak sui le ngun hmuahhmuah, Biakinn thilri le kumpibawi inn ai tangka le hlawnthil hmuahhmuah lang sio ai Samaria ah phur sio i. Ral pomhnak tampui khai fehpui i.

¹⁵ Kumpibawi Jehoash ai thil bawnhnak hmuahhmuah, ral pha bik ai Judah kumpibawi Amaziah a tawngdan pawl thawn, Israel Kumpibawite ai Tluanthu Laibu songah ngan sio i.

¹⁶ Jehoash tu thi ai Samaria ai kumpibawi hlanmual ah phum tlang i. Cen a fapa Jeroboam pahnihhnak in a tumrul in kumpibawi tuhin sawng i.

Judah Kumpibawi Amaziah Thi I

¹⁷ Israel kumpibawi Jehoash a thi hnuaah Judah kumpibawi Amaziah tu kum hlainga nung lai i.

¹⁸ Amaziah ai bawnhnak hmuahhmuah Judah Kumpibawite Ai Tluanthu Laibu songah ngan tlang sio i.

¹⁹ Jerusalem khua songah Amaziah rek tuhin tawngcai tlang manin Amaziah tu Lakhish ah tlan i; ikhalselai a tawngcaitute in hlun tlang ai ciata ah rek tlang i.

²⁰ A luang tu siphuh in Jerusalem ah phur tlang ai David khuapui, kumpibawi hlanmual ah phum tlang i.

²¹ Cen Judah mite in Amaziah ai fapa, kum hlairuk a khimmi Uzziah tumrul in kumpibawi tuhin bawn tlang i.

²² A pa thi hnuaah Elath khua a langlehtu le a salehtu heh amah Uzziah i.

Israel Kumpibawi Jeroboam Pahnihhnak

²³ Joash ai fapa, kumpibawi Amaziah in Judah ram kum hlainga a uk kum ah Jehoash ai fapa Jeroboam pahnihhnak tu Israel kumpibawi cang ai Samaria in Israel ram kum khat song uk i.

²⁴ A hlanai Judah kumpibawi, Israel a hoisualtu, Nebat ai fapa Jeroboam ai bawnhnak thil sual a hlun ve manin Bawipa vumah sual i.

²⁵ Israel ram awng, Sak lam ah Hamath tlangkawn in hlang lamah Tipui Thi tian lang leh sio i. Hemi a langhnak tu Gath Hepher khua ai Amittai ai fapa prophet Jonah hnenin Bawipa, Israel ai Pathian ai pehnak thukham khimruaihnak i.

²⁶ Bawipa in Israel mite, sal ituseh miluat ituseh, a veksen ai a harsahnak le a tuarhnak khiah hmu sio i; ikhalselai aisu khai bawmtu nai lo i.

²⁷ Israel siatsuah tuh sek heh Bawipa in a daihhnak ilo manin kumpibawi Jeroboam pahnihhnak hmangin Israel heh hup i.

²⁸ Jeroboam ai thil bawnhnak dang hmuahhmuah, ral pha bik ai ral a tawnghnak le Damascus le Hamath a lang lehhnak thute tu Israel Kumpibawite Ai Tluanthu Laibu songah ngan tlang i.

²⁹ Jeroboam pahnihhnak tu thi ai kumpibawi hlanmual ah phum tlang i; cen a fapa Zechariah in a tumrul in kumpibawi tuhin sawng i.