2 Siangphahrang 13 - Zanniat Bible

Israel Kumpibawi Jehoahaz

¹ Ahaziah ai fapa Joash tu Judah kumpibawi a cang kum kul hluanthumhnak ah Jehu ai fapa Jehoahaz tu Israel kumpibawi cang ai Samaria in kum hlaisarih song uk i.

² A hlanai kumpibawi, Israel mite sualhnak ai a hoisualtu kumpibawi Jeroboam bangin Bawipa vumah sualhnak bawn ai a thilsual bawnhnak hlat thil kel lo i.

³ Ciamanin Bawipa tu Israel vumah a thinraw ai Syria kumpibawi Hazael le a fapa Benhadad in vel tampui neh i.

⁴ Cen Jehoahaz in Bawipa hnenah sawngen ai, Israel mite Syria kumpibawi in siava ze in a nauneh khiah Bawipa in hmu manin a sawngenhnak heh ngai sah i.

⁵ Bawipa in Israel mite hnenah hotu pe ai ciami hotu in Syria kut songin luatruai ai a hlan bangin Israel mite tu hlamuang in um tlang leh i.

⁶ Ikhalselai kumpibawi Jeroboam in Israel a sualruaihnak ai sualhnak heh anite inkhai hlum loin bawn tlang betbo thotho i; khuazingnu Asherah ai lim tu Samaria ah um ngio lai i.

⁷ Jehoahaz in ralkap tampui nai lo i; Syria kumpibawi in cihmit sio ai fangcil can ai laivut bangin a ke hniaah fon manin a naihnak veksen in siphuhte sawmnga, siphuhlengte pahra le ke ralkapte thawng hra lek i.

⁸ Jehoahaz naperhnak dangdang le ral pha bik ai a bawnhnak tepawl tu Israel Kumpibawite Ai Tluanthu Laibu songah ngan tlang i.

⁹ A thi fangin Samaria ah phum tlang i. Cen a fapa Jehoash in a tumrul in kumpibawi cang i.

Israel Kumpibawi Jehoash

¹⁰ Judah kumpibawi Joash in Judah ram a uk kum sawmthum le kum sarihhnak ah Jehoahaz ai fapa Jehoash tu Israel kumpibawi ah cang ai Samaria in kum hlairuk song uk i.

¹¹ Ani inkhai Israel a hoisualtu kumpibawi Jeroboam ai sualhnak heh bawn ve ai Bawipa vumah sual i.

¹² Jehoash ai naperhnak hmuahhmuah Judah kumpibawi Amaziah thawn a tawng dun fangin ralpha ai a tawnghnak thute tu Israel Kumpibawite Ai Tluanthu Laibu songah ngan tlang i.

¹³ Jehoash tu thi ai Samaria khua, kumpibawi hlanmual ah phum tlang i. Cen a fapa Jeroboam pahnihhnak in a tumrul in kumpibawi tuhin sawng i.

Elisha Thihnak

¹⁴ Prophet Elisha tu a roh ngai in ur ai a thi dawn fangin Israel kumpibawi Jehoash in fan i. “Aw i pa, aw i pa; siphuhleng le siphuh vumto ralkapte bangin Israel hupthaitu!” tiin a kap kongin ti i.

¹⁵ Ciafangin Elisha in, “Li le thalte lang tu,” ti i. A tihnak bangin Jehoash in lang ai,

¹⁶ Elisha in, “Sai tu,” ti ai kumpibawi in a sai tum fangin Elisha in a kut heh kumpibawi kut vumah dah i.

¹⁷ Cen prophet ai ruaihnak bangin kumpibawi in Syria lamai a umhnak tukvirh hong i. “Na thal sai tuhang,” tiin Elisha in ti i. Kumpibawi in thal a sai sawng fangin prophet in, “Nangmah heh Bawipa ai thal isi ai Syria heh neh tuh isi. Syriate tu Aphek tihnak hmunah tawng tuhai neh tuh isi,” tiin ti i.

¹⁸ Cen Elisha in kumpibawi heh, “Na thal dangte lang tulai laipua ah sai tu,” ti i. A tihnak bangin kumpibawi in laipua heh vel thum sai i.

¹⁹ Ciafangin Elisha tu a thinraw ai, “Vel ruk tian sai ta silai Syria mite heh neh lan tuh rori napui isi! Tun tu vel thum tian lek neh tuh isi,” tiin kumpibawi heh ti i.

²⁰ Elisha tu thi ai phum tlang i. Kumsiar in Moab mi, a burbur ai a ummi damiahte in Israel ram rok ṭiode i.

²¹ Vaikhat tu mithi a phum tlang laitak ah ciabang damiah bur khat hmu tlang i. Mithi phumtute in amahte mithi luang heh Elisha ai hlan songah lon lio ai tlan tlang i. Cen mithi luang le Elisha ai ruhte heh khing dun ai cia sawng fangin mithi tu nung leh ai ding i.

Israel Le Syriate Tawngdunhnak

²² Jehoahaz in Israel ram a uk song hmuahhmuah ah Syria kumpibawi Hazael in Israel mite heh siava roh in nauneh i.

²³ Ikhalselai Bawipa tu Israel mite vumah ninghiohnak le ngaihharhnak a nai manin; siatsuah tuh sek heh siang lo i; Abraham, Isaac le Jacob hnenai a thukhamhnak manin Israel mite tu bawm ṭiode i. A minungte hai awng lo i.

²⁴ Syria kumpibawi Hazael thi fangin a fapa Benhadad kumpibawi cang i.

²⁵ Cen Israel kumpibawi Jehoash in Benhadad khiah vel thum tian neh ai Jehoash ai pa Jehoahaz kumpibawi a uk laiah Benhadad in a langciahnak khuapuite khiah sut sal sio i.