2 Siangphahrang 12 - Zanniat Bible

Judah Kumpibawi Joash

¹ Israel kumpibawi Jehu in Israel ram a uk kum sarihhnak ah Joash tu Judah kumpibawi cang ai Jerusalem an kum sawmli song uk i. A nu tu Beersheba khuami Zibiah i.

² Joash tu suangbawi Jehoiada in zirh manin a nun song hmuahhmuah ah Bawipa ai daihdan bawn i.

³ Ikhalselai lawki mite ai khuavang biahnak hmunte ah hibawlhnak le maitai hibawlhnakte tu sel tlang ṭiode i.

⁴ Joash in suangbawite ko ai, “Pathian biatute in a bawn ṭiode hibawlhnak thawn a pecihhnak paisa ituseh, amahte lungtho ai pehnak paisa ituseh, Biakinn songai hibawl bawnhnak thawn pehzom in amahte pehnak paisa hmuahhmuah khawl ning kul tuh i.

⁵ Suangbawi in a ruaihmi Pathian biatute ai pehnak paisa tu phatak niu in kilkhawl tu ṭen ilai a kul cang fangin Biakinn remmhnak ah hmang tuh i,” tiin thupe i.

⁶ Ikhalselai kumpibawi Joash in ram a uk khelleh kum kul hluanthumhnak a khim fangin suangbawite in biakinn heh zaikhai remm lai lo i.

⁷ Ciafangin kumpibawi Joash in suangbawi Jehoiada le a dang suangbawite khiah ko ai, “Zaimanin tun tian Biakinn remm lai lo i si? Tunai panin ning ngahhnak paisa heh ningmah in kilkhawl tuh lo i si. Paisa ning ngahhnak hmuahhmuah ap tu sio ilai Biakinn remm tlang tuh ising,” ti i.

⁸ Anite in paisa lang tuh nawn loin le Biakinn khai anite in remm tuh loin suangbawite in lungkhim tlang i.

⁹ Cen Jehoiada in thingkuang pakhat lang ai, a sin ah kua pakhat a ret hnuaah puleng hiang, Biakinn luthnak ai kiahhan lamah dah i. Pathian biatute in a pehnak paisa heh Biakinn dawngkham ai napertu suangbawite in lang ai ciami thingkuang songah thun i.

¹⁰ Thingkuang songah paisa tam ihang, ti a ling fangin kumpibawi cazi le Suangbawi Sang in paisa heh siar tlang ai phaniu in dip ah thun i.

¹¹ Zaizah i ti laibu songah phatak niu in a ngankhum hnuaah Biakinn remm hotu hnenah pe i. Ciatihin Bawipa ai biakinn napertu zungthiam le inn satute,

¹² lungdawltu le lungsolhtute ai nihlawh ah pe i. Biakinn remmhnak ai a kulhnak thing ah, lungtote le a dangdang a bohnak laihnak tuhin hmang tlang i.

¹³ Ikhalselai ciami paisa tu ngun khuat, hleng, thirhlung le maikhuat varhnak ai hmanghnak thilri le a dangdang sui le ngun ai bawnhnak thilri laihnak ah cenin hmang tlang lo i.

¹⁴ Biakinn remmhnak ai a kulhnak thilri le a remmtute hlawh man lek ah hmang tlang i.

¹⁵ Ciami napertu pawl hotute tu rinsantlak ngaingai i ai anite paisa hmangdan heh a zong hnelhno kul lo i.

¹⁶ Rul lehsal hibawlhnak ai pehnak paisa le sualhlat hibawlhnak ai pehnak paisate tu ciami kuang songah thun lo i; suangbawite ai covo i.

¹⁷ Cialai ah Syria kumpibawi Hazael in Gath khuapui tawng ai lang i; cen Jerusalem khuapui khai tawng tum i.

¹⁸ Ciafangin Judah kumpibawi Joash in a hlanai kumpibawite Jehoshaphat le Jehoram le Ahaziah in Pathian hnenah amahte pehnak thawhhlawmte le Bawipa ai biakinn tangka dahhnak songai a umhnak sui hmuahhmuah le kumpibawi inn ai um sui hmuahhmuah heh lang sio ai kumpibawi Hazael hnenah lehsawng in kuat i. Ciafangin Hazael tu Jerusalem tawng loin a ralkapte thawn let i.

¹⁹ Kumpibawi Joash ai a dangdang bawnhnak tepawl tu Judah Kumpibawite Ai tluanthu Laibu songah ngan tlang i.

^20-21 Kumpibawi Joash tu a kuthnia ai umtu tlangsuakte in tawngcai ai, tlangsuakte pahnih Shimeath ai fapa Jozacar le Shomer ai fapa Jehozabad in rek kawm i. Silla khua fehhnak lampui, Millo phairawn ai umhnak inn ah Joash heh rek kawm i. Jerusalem, David khuapui, kumpibawi hlanmual ah phum tlang ai Amaziah in a tumrul in kumpibawi cang i.