2 Siangphahrang 1 - Zanniat Bible

Elijah Le Kumpibawi Ahaziah

¹ Israel kumpibawi Ahab a thi hnuaah Israel tawng tuhin Moab mite ral tho tlang i.

² Israel kumpibawi Ahaziah tu Samaria ai a kumpibawi inn phu vuman tlok ai a roh ngai in tuahmawh i. Ciamanin a nung tuh le nung tuh lo ling nuam in, Ekron khua ai amahte khuavang Baalzebub thu zawt tuhin Filistin ram Ekron khua ah mi hlat i.

³ Ikhalselai Bawipa ai vancungmi pakhat in Tishbe khua ai Prophet Elijah tu kumpibawi Ahaziah ai nalangte tawk tuhin ruai ai anite hnenah, “Zaimanin Ekron khua ai Baalzebub khuavang tawk tuhin feh tlang i si? Israel ramah Pathian um lo im?

⁴ Ning kumpibawi hnenah, Bawipa in, ‘Nung tuh lo i. Na tuahmawhhnak in na thi tuh i,’ na ti i, tiin rel tu ih,” tiin rel tuhin ruai i. Bawipa ai thupehnak bangin Elijah in bawn ai,

⁵ ciamanin kumpibawi ai nalangte tu let tlang i. Kumpibawi in, “Zaimanin let tlang i si?” tiin zawt i.

⁶ Anite in, “Mi pakhat tawk ai ning hlattu kumpibawi hnenah Bawipa in, ‘Zaimanin Ekron ai Baalzebub khuavang tawk tuhin mi hlat i si? Israel ramah Pathian um lo im? Na nung tuh lo ai na tuahmawhhnak in na thi tuh i,’ tiin rel tu ih, kin ti manin let tlang i ing,” tiin ti i.

⁷ Ciafangin kumpibawi in, “Ning tawkmi pa tu zaibang minung heh i?” tiin zawt i.

⁸ Anite in, “Savun ai bawnhnak korfualpui sil ai savun elpen pen i,” ti tlang i. Ciafangin kumpibawi in, ‘Elijah i bang e!’ ti i.

⁹ Ciafangin kumpibawi in Elijah koih tuhin ralbawi pakhat le ralkapte sawmnga hlat i. Elijah tu mual vumah a to laitak ah ralbawi pa in hmu ai a hnenah, “Pathian ai minung pa, kumpibawi in kawi tuseh na ti i,” tiin ti i.

¹⁰ Ciafangin Elijah in, “Pathian ai minung ilengkhaw van in mai zuktla tu selai nangmah le na minungte ning kang tusek seh!” tiin ti i. A tihnak bangin van in mai tla ngaingai ai ralbawi pa le ralkapte sawmnga tu kang tlang sio i.

¹¹ Kumpibawi in a dang ralbawi pakhat le ralkapte sawmnga hlat lala ai Elijah hnenah feh tlang lala i. Ralbawi pa in, “Pathian ai minung pa, kumpibawi in rang ngai in kawi tuseh na ti i,” tiin ti i.

¹² Ciafangin Elijah in, “Pathian ai minung ilengkhaw van in mai zuktla tu selai nangmah le na ralkapte ning kang tu sio seh!” tiin ti i. A ti sawng fangin van in mai tla ai ralbawipa le a ralkapte tu kang tlang sio i.

¹³ Kumpibawi in a dang ralbawi pakhat le ralkapte sawmnga hlat lala i. Ralbawi pa tu Elijah hnenah feh ai Elijah hmaiah khuk caicin ai, “Aw Pathian ai minung pa, kaimah le i minungte vumah heh ninghiohnak nai tu hram lai kin nunhnak tu kin zuah tu hram law.

¹⁴ I hlanai ralbawite pahnih le a ralkapte tu van ai mai in kang sio i. Ikhalselai kai tu ning i hio tu hram law,” tiin ngen i.

¹⁵ Ciafangin Bawipa ai vancungmi in Elijah hnenah, “Amah thawn feh tu. Zaikhai kih mah,” tiin ti i. Ciamanin Elijah tu ralbawi pa thawn kumpibawi hnenah feh ai,

¹⁶ a hnenah “Bawipa in, ‘Israel ramah Pathian um lo bangin Ekron khua ai Baalzebub hnenah mi na hlat manin tunai na khuahluan in tho tuh lo ihang si. Na thi tuh ihang,’ ti i,” tiin rel i.

¹⁷ Elijah hnenai Bawipa ponkam bangin Ahaziah tu thi i. Ahiziah tu fapa nai lo manin a unau Joram in, Judah kumpibawi Jehoshaphat ai fapa Jehoram ai kumpibawi a cang kum hlaihnihhnak ah, Israel kumpibawi cang i.

¹⁸ Kumpibawi Ahaziah ai bawnhnak hmuahhmuah Israel Kumpibawite ai Tluanthu Laibu songah ngan tlang sio i.