2 Sansiarnak 9 - Zanniat Bible

Sheba Kumpibawinu In Tlawng I

¹ Sheba ram kumpibawinu in kumpibawi Solomon hmingthanghnak thu a za fangin thuzawthnak har bikbik thawn a cu tuhin Jerusalem ah kawi i. Mi tampui in hlun ai rimhmui, lungmankhung le sui tampui phurtu kalaukte thawn kawi tlang i. Solomon a tawk fangin a thinlung ai a ruathnak thu hmuahhmuah zawt sio i.

² A thuzawthnak heh Solomon in sawn ben sio i, a sawn ben lohnak pakhat khai um lo i.

³ Ciatihin Sheba kumpibawinu in Solomon fimdan hmu ai kumpibawi innpui a sahnak,

⁴ a cabuai vumah ai tuhhnak rongte hinkhim, a kuthnia tlangsuakte ai innte, kumpibawi zung ai napertute a uk dun zia le a thilthuamte, a rong ai fangin a siktu hnenumte le a tlangleng fangin a kiltute le a hnikpon sildante, le Bawipa Biakinn ai hibawl a selhnakte hmuahhmuah a hmu fangin a mangbang ze ai a thinlung vai sio i.

⁵ Cia hnuaah kumpibawinu in Solomon hnenah, “I ram an na faidan le na fimhnak thula i zahnak heh a dik i.

⁶ Kaimah rori kawi ai i mit in i hmu hlan ahcen mi in i relhnak heh sang thil lo ing. I bil lekin i zahnak tu na fimhnak ngaingai ai a hrek khai ilo i. Amahte relhnak tahin na fim sawn i.

⁷ Na minungte le na kuthnia ai napertute tu zaitlukin mibawngpha i! Nisiar in na fimhnak ponkam za tlang ṭiode i.

⁸ Bawipa na Pathian thangphat in um tuseh. Na vumah Bawipa tu a lungawi ai a hming in mi uktu hrimhrim tuhin kumpibawi in na bawn ibang! A minung Israel mite it manin le kumzangza in a humhim nuam manin nangmah heh amahte vumah thudik le dikcanglairelhnak thawn uktu tuhin kumpibawi ah na bawn i,” tiin ti i.

⁹ Kumpibawinu in kumpibawi Solomon heh lehsawng in sui pawng thawng kua, rimhmui tampui, le lungmankhung pawl pe i. Sheba ram kumpibawinu in kumpibawi Solomon hnenah a pehnak rimhmui bang rimhmui pha a konteng ahkhai um awng lo i.

¹⁰ Kumpibawi Hiram le kumpibawi Solomon ai minungte, Ophir in sui a phurtute in hual thing le lungmankhung pawl phurh tlang i.

¹¹ Solomon in ciami thing heh Biakinn le kumpibawi inn ai kaipumte bawnhnak tuhin le lasatute ai congcing le tingrisette bawnhnak tuhin hmang i. Judah ramah ciabang heh hmu tlang awng lo i.

¹² Solomon in lehsawng a ngahhnak tepawl tumrul in Sheba kumpibawinu hnenah lehsawng tampui pe ai a ngahhnak tahin tam sawn in pe i. Kumpibawinu in a ngenhnak hmuahhmuah pe sio i. Cia hnuaah a hluntute thawn Sheba ramah tlung tlang leh i.

Kumpibawi Solomon Lianhnak

¹³ Kum siar in kumpibawi Solomon in sui pawng thawng sawmnga dawnniu ngah ṭiode i.

¹⁴ Hemi tu sumpaitu le dawr bawntute ai pehnak ngunkhuai vumah a ngahhnak i. Arabia ram kumpibawite le Israel ram songai miukte in sui le ngun tampui pe tlang fawn i.

¹⁵ Solomon in lum a lian pawl zahnih bawn ai lum pakhat heh a denghnak sui pawng hlainga ṭen ai khuthnak i.

¹⁶ Ciahlaiah a cik deuh pawl lum za thum bawn ai pakhat heh a denghnak sui pawng riat ṭen in khut i. Ciami lumte tu a veksen in Lebanon tupui thing ai sahnak kumpibawi innkhan pakhat songah dah i.

¹⁷ Solomon in kumpibawi tohkham a lianpui pakhat vuiha in bawn ai sui ciang in khut i.

¹⁸ Ciami tohkham kaihnak tuhin pumdonte paruk um ai a hmaiah sui ai bawnhnak ke dahhnak hmun um i. Kekeh lam le kiahhan lamah kut dahhnak um ai a sir ah chintit lim pakhat veve dingruai i.

¹⁹ Pumdonte paruk ai a sir le sir veve ah chintit limte hlaihnih ding i. Hemi bang kumpibawi tohkham heh akon ram ahkhai um awng lo i.

²⁰ Kumpibawi Solomon ai khuat hmuahhmuah sui ciang in bawnhnak i ai Lebanon Tupui Khan songai belhlengte khai sui ciang in bawnhnak ciang i. Solomon san ah ngun tu songlawi lo i.

²¹ Cen tangphawlawng tampui nai ai kumpibawi Hiram ai tangphawlawng thawn Tarshish khua ah fehruai de i. A feh le a tlung ah kumthum rai de i. Ciami tangphawlawngte in sui, ngun, vuiha, zawng le udaungte phur de i.

²² Kumpibawi Solomon tu laivum kumpibawi hmuahhmuah lakah a fimber le a lianber i.

²³ Pathian ai pehnak fimhnak ling nuam in kumpibawi hmuahhmuah in thu zawt de i.

²⁴ Solomon tu lehsawng a phunphun sui, ngun, korfualpui, ralthuam, rimhmui, siphuh le laakte pe tlang de i. Kum siar in ciatihin pe tlang ṭiode i.

²⁵ Cen Solomon in a siphuh le a siphuhleng hrangah siphuh inn thawng li nai ai siphuh vumto ralkapte in to tuhin siphuh thawng hlaihnih nai i. A siphuh hrekkhat tu Jerusalem ah dah ai a hrekkhat tu khuapui dangdang ah dah i.

²⁶ Euphrates Runpui in Filistin ram le Egypt ramri tian kumpibawi a ummi zongzong vumah thunaitu ber i.

²⁷ Solomon san ah ngun tu Jerusalem ah lungto zah in tam ai Cedar thing tu thaikung zah in tam i.

²⁸ Solomon in siphuh heh Egypt ram le ram dangdang ah lai i.

Solomon Ukhnak Thutlangpui

²⁹ Kumpibawi Solomon tluanthu dangdang, a panin a tawp tian, Prophet Nathan Tluanthu Laibu songah le Shiloh khua Ahijah ai Thuphuan laibu songah le Prophet Iddo Ai Hmuhnak Laibu songah ngan i. Ciami laibu songah Israel kumpibawi Jeroboam pakhathnak ai thula khai ngan ve i.

³⁰ Solomon in Israel ram pumpuhluk heh Jerusalem khua an kum sawmli song uk i.

³¹ Solomon tu thi ai David khuapui, Jerusalem ah phum i. Cen a fapa Rehoboam in a tumrul in kumpibawi cang i.