2 Sansiarnak 6 - Zanniat Bible

Solomon Thurelhnak

¹ Cen Solomon in sawngen ai: “Bawipa, mairo le khuanim songah um tuh ing ti isi;

² Ikhalselai nangmah ca Biakinn mawi roh sa zo ing, Bawipa kumzangza in na umhnak hrangah,” tiin ti i.

³ Israel mite hmuahhmuah ciata ah ding tlang i. Kumpibawi tu amahte lamah hoi ai amahte caah Pathian hmuifu ngen sah i.

⁴ Solomon in, “Bawipa, Israel ai Pathian tu thangphat in um tuseh. I pa David hnenah thukhamhnak bawn ai,

⁵ ‘I minungte Egypt ram an suakruai nia ai panin tunnia tian, Israel ram song a konteng khuapui ahkhai kaimah i biahnak tuh tiin Biakinn sahnak hmun ril zo ai i minungte hotu tuhin khai aisu khai ril lai lo ing.

⁶ Ikhalselai tuh ahcen kaimah i biahnak hmun tuhin Jerusalem ril ai i minungte uktu tuhin David nangmah na ril ing,’ a ti awnghnak hmuahhmuah heh khimruai zo sio i.

⁷ ‘I pa in Bawipa, Israel ai Pathian biahnak tuhin Biakinn sa tum awng i;

⁸ ikhalselai Bawipa in, ‘Biakinn sa tuh na thinlung in na tumhnak heh thil pha bik i.

⁹ Ikhalselai nangmah incen sa tuh lo isi. Na fapa, nangmah song suak na fapa in i Biakinn sa tuh i,’ ti i.

¹⁰ “Tunah Bawipa in ciami a thukhamhnak khimruai zo i. I pa tumrul in kaimah Israel kumpibawi i cang ai, Bawipa Israel ai Pathian biahnak tuhin Biakinn sa ben zo ing.

¹¹ Cen Biakinn songah Bawipa in Israel mite thawn thukhamhnak bawn ai ciami thukham nganhnak lungtlepte umhnak Thutiam Kuang heh dah zo ing,” tiin ti i.

Solomon Ai Sawngenhnak

¹² Cen mizapui hmuh ah Solomon feh ai puleng hmaiah ding ai banpharh in sawngen i.

¹³ Solomon in sardonsang pakhat dar in bawn ai tualvan a laiteng ah dah i. Ciami tu pi riat sau, pi riat kau i ai pi nga sang i. Ciami sardonsang vumah kai ai mizapui hmuh ah khukhlep ai a kut van lam pharh ih sawngen i.

¹⁴ “Aw Bawipa, Israel ai Pathian, lai le van ah nangmah bang Pathian dang um lo i. Na thutiamhnak thinlung takin a hlun tlang fangin na minungte vumah na thutiamhnak khimruai ai na ithnak hmuh isi.

¹⁵ I pa David hnenah na thukhamhnak khoruai ai tunnia ah pakhat khai pelh loin khim sio i.

¹⁶ Ciamanin Aw Bawipa, Israel ai Pathian, i pa bangin na dante hlun ai na thu pha bik in ngai tlang lekhaw a tesinfa pakhatkhat in Israel kumpibawi cang tuh ngio i, tiin i pa hnenah na thukhamhnak khai khimruai tu hram law.

¹⁷ Na cengfa David hnenah na thukhamhnak hmuahhmuah heh aw Bawipa, Israel ai Pathian, pakhat khai pelh loin khimruai tu hram law.

¹⁸ “Ikhalselai aw Pathian, laivum minung lakah um thil taktak nisim? Van ai van sin ah rin na thual lo manin kaimah ai i sahnak Biakinn ahcen akontih in na thual tuh i?

¹⁹ Ikhalselai Bawipa i Pathian, kaimah na cengfa in sawngenhnak le i kunhnak heh i ngai sah tu hram law. Na hnenah i ngenhnak le i auhnak heh i ngai tu hram law.

²⁰ Hemi Biakinn heh a sun a zan in i kil sah tu hram law. ‘Kaimah i bia tuhhnak hmun i,’ na tihnak hemi Biakinn lam hoi in saw i ngen fangin i ngai sah tu hram law.

²¹ Hemi Biakinn lam hoi in saw i ngenhnak le na minung Israel mite sawngenhnak ngai sah tu hram law. Na umhnak vancung in kin ngai tulai kin sualhnak kin ngaithiam tu law.

²² “Mi pakhat in midang vumah thil tisualhnak nai i tiin sualpuh tlang ai a sual lohnak khiah cukcam in thukham bawn tuhin hemi na Biakinn na puleng hmaiah hlenpui fangin,

²³ aw Bawipa, vancung in ngai tulai na minungte ai thu khiah rel sah tu law. A mawhtu heh a mawhhnak bangin cawh tulai a sual lotu cenin luatruai tu law.

²⁴ “Na vumah sual tlang manin na minung Israel mite tu amahte ralte in neh ai sualsir in ngaithiamhnak ngen in hemi Biakinn ah saw a ngen tlang fangin,

²⁵ van in ngai tu hram law. Na minungte ai sualhnak tu ngaithiam in na hnenah le a pupate hnenah na pehnak ramah hoi leh tu hram law.

²⁶ “Na minungte na vumah sual tlang manin vanruah siruai lo ai sualsir in hemi Biakinn hoi in saw a ngen tlang fangin,

²⁷ aw Bawipa, vancung in ngai sah tulai Israel mite na minungte ai sualhnak tu ngaithiam tu hram law. A dikcang bawn tuhin nangmah in zirh tulai, na minungte hnenah a zomzet in amahte ai tuhin na pehnak hemi ramah vanruah siruai tu hram law.

²⁸ “Hemi ram songah rian tlung maw, ursia i, ihlahle a rongte hlisia in maw, khokhuak in maw siatsuah sek i; ihlahle na minungte amahte ral in a tawng fangin le zazul in a ur sio fangin,

²⁹ amahte sawngenhnak ngai sah tu hram law. Na minung Israel mite burpui in ituseh, pakhat in ituseh, thinpit vansang in hemi Biakinn lam hoi in saw a ngen fangin,

³⁰ ngai sah tu hram law. Vancung na umhnak an ngai sah tulai amahte sualhnak ngaithiam tu law. Minung ai thinlung le ruathnak tu nangmah lekin ling isi. Amahte bawnhnak ṭen sik in amahte thu rel tulai,

³¹ ciatihin kin pupate hnenah na pe awnghnak ramai a um song hmuahhmuah ah na minungte in na kihzah tuhai na thu ngai tlang tuh i.

³² “Israel mite lo miphun dang pakhatkhat lamhlapui ai a ummi inapui na huham le na hathnak le na thiltiben zia a ling manin kawi ai, hemi Biakinn hoi in saw a ngen fangin,

³³ a sawngenhnak ngai sah tu hram law. Vancung na umhnak an ngai sah tulai a ngenhnak bawn sah tu hram law; ciatihin na minung Israel mite in na ling ai na kihzah bangin, laipua vum minung hmuahhmuah in na ling tuhai na kihzah tlang tuh i. Cen i sahnak Biakinn heh nangmah bia tuhhnak hmun i, ti ling tlang tuh i.

³⁴ “Na minungte tu raltawng tuhin thu na pe ai amahte fehhnak hmuncang ah hemi na rilhnak khuapui le nangmah ca ai i sahnak Biakinn lam hoi in saw a ngen tlang fangin,

³⁵ amahte sawngenhnak ngai sah tu hram law. Vancung in ngai sah tulai nehhnak pe tu hram law.

³⁶ “Na minungte tu na vumah sual tlang sio i, aisu khai misual lo um lo i; na thinraw in a ralte nehruai ai ralte in pom ai ram hlapui ah a fehpui fangin,

³⁷ na minungte ai sawngenhnak ngai sah tu hram law. Amahte saltanghnak ramah sir tlang ai na hnenah sawngen in amahte sualhnak le phatlohnak phuang lekhaw, aw Bawipa a sawngenhnak ngai sah tu hram law.

³⁸ Ciami ram an thinlung takin le thungai in sualsir in kin pupate hnenah na pehnak he ram le na rilhnak he khuapui le nangmah ca ai i sahnak he Biakinn lam hoi in na hnenah sawngen tlang lekhaw,

³⁹ amahte sawngenhnak ngai sah tu hram law. Na umhnak inn vancung in ngai sah in ninghio tulai amahte sualhnak ngaithiam tu hram law.

⁴⁰ “Aw i Pathian, tunah na mit in i hmu tulai heta hmunah i sawngenhnak na bil in i ngai tu hram law.

⁴¹ Bawipa Pathian, tunah tho tulai na thahathnak hmuhtu Thutiam Kuang thawn Biakinn songah lut tulai kumzangza in um tu hram law. Suangbawite a bawnhnak hin cangcang ah hmuifu pe in amahte vumah na phathnak manin na minungte lungawi aipuang in um tlang tu ngio selaw.

⁴² Bawipa Pathian, thau na pawh zomi kumpibawi khiah hnawl hram malaw. Na cengfa David hnenah na ithnak khiah ling tu ngio law,” tiin ti i.