2 Sansiarnak 35 - Zanniat Bible

Josiah In Kansuak Puai Bawn I

¹ Kumpibawi Josiah in Bawipa ai hmingthanghnak tuhin Kansuak Puai heh Jerusalem khua ah bawn i; hla hmasaber ni hlailihnak nia ah ciami puai heh bawn ai sumhnamte ro tlang i.

² Suangbawite hnenah Biakinn ai bawn tuhhnak pe ai fel ngai in bawnsuak tuhin forh i.

³ Bawipa hnenai aphnak, Israel mite zirhtu Levi mite khai thucah ai anite hnenah, “David fapa Solomon ai sahnak Biakinn songah a cianghlim Thutiam Kuang dah tu ih. Hemi Thutiam Kuang heh hmunkhat in hmundang ah phur tuh nawn lo ai Bawipa ning Pathian le Amah ai minung Israel mite lek ruaih tlang tuh i si.

⁴ Kumpibawi David le a fapa kumpibawi Solomon in ṭuanvo ning pehnak bangin Biakinn ah ning songkhat ṭen in ṭuanvo lang tlang tuh i si.

⁵ Israel mite songah innsang pakhatkhat bawm a kul fangin bawmbentu tuhin zuam tlang tuh i si.

⁶ Ningmah in Kansuak puai hrangah tuu le me ro tu ih. Cen Bawipa in Moses hnenah a pehnak Dan bangin ning unau Israel mite in hlunthilhnak tuhin ningmah heh cianghlim dun tu ilai, hibawlhnakte heh pai tu cialep ih,” tiin ti i.

⁷ Kumpibawi Josiah in Kansuak Puai can ai mizapui ca amah ai sumrualte songin tuu le tuuniu, me niu a veksen in thawng sawmthum pe i. Kawlpawcangte khai thawng thum pe i.

⁸ A kuthnia ai bawite inkhai mizapui, suangbawite le Levi mite caah pe ve i. Biakinn kiltu upate: Suangbawi Sang Hilkiah, Zechariah le Jehiel in ciami puai can ai hibawlhnak sel tlang tuhin suangbawite hnenah tuuniu le me niute thawng hnih le zaruk, le kawlpawcangte za thum pe tlang i.

⁹ Levi mi hotute Konaniah, Shemaiah le a nau Nethanel, Hashabiah, Jaiel le Jozabad in tuuniu, le me niute thawng nga le kawlpawcangte za nga heh Levi mite ai hibawlhnak hrangah pe tlang i.

¹⁰ Kansuak Puai hrangah zaizongza a tawlrel ben tlang fangin kumpibawi ai thupe zo bangin suangbawi le Levi mite tu amahte dinhmun ṭen ah um tlang i.

¹¹ Tuu le me a ro ben fangin Levi mite in a phaw hawk ai a thisan heh suangbawite in puleng vumah phiah tlang i.

¹² Cen Moses Dan songai bangin maitai hibawl selthilhnak tuhin sumhnam rohnak ai sa heh songkhat songkhat ṭen in mizapui zem tlang i.

¹³ A dan bangin Kansuak Puai hibawlhnak sa heh Levi mite in mai ah em tlang ai hibawlhnak cianghlim khiah bel le thir bel le ukang lian puipui in suang ai mizapui hnenah rang ngai in zem tlang i.

¹⁴ Ciaben fangin Levi mite in amahte ca le Aaron ai tesinfa suangbawite caah sa zem i; zaimantifangin maitai hibawlhnak le a thaute pehnak tai tuhin suangbawite tu zan khuathim tian man tlang hrimhrim lo i.

¹⁵ Cen Asaph hin lasatute khai Kumpibawi David ai thuhluphnak bangin naperhnak hmun ṭen ah um tlang i. Asaph hinte, Heman le kumpibawi prophet Jeduthun le Biakinn kotka kiltute tu amahte dinhmun in hmundang ah feh hnelhno kul tlang lo i; zaimantifangin amahte caah Levi mite in zaizongza tawlrel sah i.

¹⁶ Ciamanin kumpibawi Josiah ai thupeciahnak bangin Kansuak Puai ulhnak le puleng vumai maitai hibawlhnakte le ciami nia ai Bawipa biahnak zaizongza heh a semkhim in bawn tlang liang i.

¹⁷ Ciata ai a teltu Israel mite hmuahhmuah in Kansuak Puai le Col tello Sang Puai heh ni sarih song bawn tlang i.

¹⁸ Prophet Samuel san hnuaah Kansuak Puai khiah hetih bangin bawn tlang awng lo i. Israel a dang kumpibawite inkhai Kansuak Puai heh kumpibawi Josiah in suangbawite, Levi mite, Judah mite, Israel mite le Jerusalem mite thawn a bawn bangin bawn tlang awng lo i.

¹⁹ Josiah kumpibawi a cang kum hlairiat kum ah hemi Kansuak Puai heh bawn tlang i.

Kumpibawi Josiah Ram Uk Tawphnak

²⁰ Kumpibawi Josiah in Bawipa ai Biakinn hrangah hebang a bawn ben hnuaah, Egypt kumpibawi Neko in Euphrates Runpui kamai umhnak Carchemish ah raltawng tuhin a ralkapte thawn suak tlang i. Ciami heh Josiah in kham tum i.

²¹ Ciafangin Neko in Josiah hnenah thucah ai, “Aw Judah kumpibawi hemi ral i tawng tuhhnak heh hnai i hnok mah, nang thawn zaikhai seng dun lo i; nangmah na tawng tuhin kawi lo ing. I ralte tawng tuh lekin kawi ai Pathian in a rang ngai in i fehruai i. Pathian tu i hnenah ṭang ai Ani tu tawng nuam mah; tawng lesikhaw siat na suah tuh sawn i,” ti i.

²² Ikhalselai Josiah in ngai lo ai tawng tum thotho i; ciamanin lingthiam thai loin bawn dun ai raltawnghnak hmunah feh i. Kumpibawi Neko hmangin Pathian ai thurelhnak ngai nuam lo ai Megiddo phairawn ah raltawng tuhin feh i.

²³ A tawng dun fangin Egypt conkiang in kumpibawi Josiah heh kha i. Ciafangin a cengpa hnenah, “I tlanpui tu! A roh ngai in maliam ing,” ti i.

²⁴ A siphuhleng in cawi ai siphuhleng pahnihhnak ah dah tlang ai Jerusalem ah letpui i. Ciata ah thi ai kumpibawi hlanmual ah phum tlang i. Judah mi le Jerusalem mite in a thi fangin ul ai kah tlang i.

²⁵ Prophet Jeremiah in kumpibawi Josiah caah kahla puah ai amahte kumpibawi a kah tlang fangin lasatute in nupang ituseh pasal ituseh, ciami la in kah tlang de i. Ciatihin mithi kahhnak tu Israel mite dan ah cang ai ciami la heh kahla labu songah um i.

²⁶ Josiah in Bawipa a rinsanhnak, Dan a hlundan,

²⁷ a ukhnak hampan in a tawp tian, a thil bawnhnak hmuahhmuah le amah ai tluanthu heh Israel le Judah Kumpibawite Tluanthu Laibu songah a khim ngai in ngan i.