2 Sansiarnak 33 - Zanniat Bible

Judah Kumpibawi Manasseh

¹ Manasseh tu kum hlaihnih a khim fangin Judah kumpibawi cang ai Jerusalem an kum sawmnga le kum nga song uk i.

² Bawipa hmaiah thilpha bawn lo ai sual i. Israel mite Canaan ram a lut awng laiah a um cia, Bawipa in a hnawt mite ai thil bawnhnak hlun in ningdulkul thilte bawn i.

³ Manasseh in a pa Hezekiah ai bal cia khuavang bia awnghnak hmunte heh sa lehsal i. Cialek zolo in khuavang biahnak ah pulengte tiang i; Asherah khuazingnu lim bawn ai hlaiah arsite khai bia i.

⁴ Bawipa ai biakinn song ‘Kumzangza in kaimah biahnak hmun tuhin,’ tiin Bawipa amah in a ti awnghnak ah khuavang pulengte tiang i.

⁵ Biakinn tualvan pahnih ah arsite biahnak pulengte tiang i.

⁶ Hinnom phairawn ah a fapate maitai hibawlhnak tuhin pe i, dawi hmang i, kutrin sik i, tlahsan i. Bawipa ai hmaiah a siava roh ze thil bawn ai Bawipa thinrawtiar i.

⁷ Bawipa ai Biakinn songah milim dah i. Bawipa in David le a fapa Solomon hnenah, “Hemi Jerusalem khua, he Biakinn hmun heh kaimah i biahnak tuhin Israel miphunte hlaihnih ai ram songin i rilhnak hmun i.

⁸ Israel mite in i thukham le i thupehnak hmuahhmuah hlun tlang ai i cengfa Moses in amahte hnenah a pehnak Dante a khim in bawn tlang lekhaw amahte pupate hnenah i pe awnghnak hemi ram an aisu inkhai hnawt tuh lo i,” tiin a relhnak leklo ciami Biakinn song rori ah milim dah i.

⁹ Bawipa ai minung Israel mite Canaan ram a lut tlang awng laiah Bawipa in a hnawtmi miphunte ai sualhnak tahin a roh deuhmi sualhnak songah Judah mite heh Manasseh in lutpui i.

Manasseh Sirhnak

¹⁰ Bawipa in Manasseh le a minungte tu ralringhnak pe napui ngai tlang cuang lo i.

¹¹ Ciamanin Bawipa in Assyria ralbawite heh Judah ram tawngruai i. Ciafangin Manasseh heh pom tlang ai a hnar ah sio khaih i; thir cikcin thawn hrengkhen ai Babylon ah fehpui i.

¹² Ciatihin vansang in a um manin a lungnem in Bawipa a Pathian hnenah let ai sawngen in Bawipa ai bawmhnak ngen i.

¹³ Manasseh ai sawngenhnak tu Pathian in ngai sah ai Jerusalem ah letruai leh in Judah ram heh ukruai leh i. Ciatihin Manasseh in Bawipa tu Pathian ngaingai i ti ling i.

¹⁴ Cia hnuaah Manasseh in Jerusalem khua kulhhnak vingpui heh nisuah lamai umhnak Gihon Cirh in sak lam Nga kotka le Ophel tihnak khua tian tiang ai sang amam in bawn i. Judah ramsong ving ai kulhhnak khua cangcang ah ralbawi pakhat le a kuthnia ralkapte dah betbo i.

¹⁵ Cen Biakinn ah a dah awnghnak ramdang khuasiate le milimte heh lang sio ai hlaiah Biakinn a sahnak tlangtluan le Jerusalem khua songai umhnak khuasia puleng hmuahhmuah bal sek i. Ciamite heh lang sio ai Jerusalem khua pualam ah lon sek i.

¹⁶ Bawipa biahnak ai puleng tu remm liang ai rualrem hibawlhnak le lungawi hibawlhnakte sel i. Judah mi zongzong Bawipa Israel ai Pathian bia tlang tuhin forh dekdo i.

¹⁷ Mizapui in hmun dangdang ahkhai hibawlhnak bawn tlang i; ikhalselai a selhnak ngaingai tu Bawipa hnen lek ah i.

Manasseh Ai Ram Ukhnak Bo I

¹⁸ Manasseh ai bawnhnak dangdang, Pathian hnenai a sawngenhnak le Bawipa, Israel ai Pathian hming in prophette in a hnenah thu a phuanghnakte tu a khimliang in Israel Kumpibawite Tluanthu Laibu songah ngan i.

¹⁹ Kumpibawi Manasseh ai sawngenhnak le Pathian in a sawnhnak, sualhnak le phatlohnak a bawnhnak tepawl, khuavang biahnak le Asherah khuazingnu lim a bawnhnak tepawl le milim a biahnak thute tu a khimliang in Prophette Tluanthu Laibu songah ngan tlang i.

²⁰ Manasseh tu thi ai kumpibawi inn ah phum i; cen a fapa Amon in a tumrul in kumpibawi tuhin sawng i.

Judah Kumpibawi Ammon

²¹ Ammon tu Judah kumpibawi a cang fangin kum kul hluanhnih khim ai Jerusalem an kum hnih song uk i.

²² A pa Manasseh bangin Bawipa ai hmaiah sual ai a pa ai bia awnghnak milimte bia ve i.

²³ Ikhalselai a pa bang ilo i; a thinlung nem lo ai Bawipa hnen ahkhai let lo i; a pa tahin a sualhnak roh deuh i.

²⁴ Cen a kuthnia ai tlangsuakte in a thupniu in sawm dun ai kumpibawi inn songah Amon heh rek tlang i.

²⁵ Ikhalselai Ammon rektute tu Judah mite in rek thun ve lala ai Amon ai fapa Josiah khiah kumpibawi tuhin bawn i.