2 Sansiarnak 3 - Zanniat Bible

¹ Kumpibawi Solomon in Bawipa Biakinn khiah Jerusalem khua, a pa kumpibawi David hnenah Bawipa a larhnak Moriah Tlang ah sa pan i. Ciami hmun tu Jebus mi Araunah in fangcil hmun an a hmang awnghnak i ai David in ciang liang in sel zo sio i.

² Solomon kumpibawi a canghnak kum li le hla hnihhnak ah Biakinn sa a hampan tlang i.

³ Solomon kumpibawi ai a sahnak Biakinn tu pi sawm kua sau ai pi sawmthum kau i.

⁴ Biakinn hmai donsuk tu Biakinn tia in pi sawmthum kau ai pi za le sawmriat sang i. Ciami donsuk bangkhang a songlam tu sui in khut i.

⁵ A laiteng khan tu cedar thing in coih ai sui in khut ai tuumkung le cikcin zuk cuangruai i.

⁶ Kumpibawi in Biakinn heh lungmankhung le Parviam ram an laihnak sui in par i.

⁷ Biakinn bangkhangte, innbo le luanglute, le dawngkhamte tu sui in khut i. A bangkhang ah zungthiamte in Cherubim limte cuangruai i.

⁸ A songtaber khan tu Hmun Thianghlim Ber tihnak i ai pi sawmthum sau ai Biakinn tia in pi sawmthum kau i. Hmun Thianghlim Ber bangkhangte khuthnak ah sui pawng thawng sawmli le thawng nga hmang tlang i;

⁹ tlawngkhen a hmanghnak tu sui in bawn ai tlawngkhen hrangah sui pawng khat zolo rit i. Vumta khan bangkhangte khai sui ciang in khut i.

¹⁰ Kumpibawi in a napertute khiah thir in Cherubim limte pahnih bawnruai ai Hmun Thianghlim Ber ah dah i.

^11-13 Ciami Cherubim limte tu dawngkham lam hoi in dah ai artlang in dingruai i. Cherubim pakhat in kote pahnih nai ai ko pakhat tu pi sarih le a hrek sau i; ciamanin a kote pharh fangin a khan laiteng ah tawk dun ai khatta lam ko inkhai bangkhang khing veve i; ciatihin a khan kaulam pi sawmthum khiah a kote in khing i.

¹⁴ Ponzar pakhat bawn ai ciami ponzar tu rifem ai takhnak le mepian, sannum, le a san ai nimhnak i; ciami ponzar khiah Cherubim limte cuangin coih i.

Dar Khuamte Khuam Hnih

¹⁵ Kumpibawi in pi sawmnga le pi hnih sang dar khuam khuam hnih bawn ai Biakinn hmaiah bir i. Khuam ai lubol tu pi sarih le a hrek veve sang i.

¹⁶ Khuam hmur tu khi kual a peh dun sio le dar ai bawnhnak tale thai zakhat in par liang i.

¹⁷ Khuamte pahnih tu Biakinn luthnak sak lam le hlang lamah bir i; hlangta lam tu Jakhin ti ai sak lam tu Boaz ti i.