2 Sansiarnak 28 - Zanniat Bible

Judah Kumpibawi Ahaz

¹ Ahaz tu kum kul a khim fangin kumpibawi cang ai Jerusalem an kum hlairuk song uk i. A sentu David ai nun zia heh cung lo i; Bawipa ai lungawi lohnak thil sawn bawn i;

² Israel kumpibawite ai nundan hlun i. Thir in Baal khuavang limte bur ai bawn i;

³ Hinnom phairawn ah rimhmui tai ai, Israel mite Canaan ram a lut awng laiah Bawipa ai a hnawthnak miphunte ai ningdulkul thil bawnhnak tepawl a cung manin a fapate tianin milim hnenah hibawlhnak tuhin pe i.

⁴ Khuavang biahnak le khuavang umhnak hmuncang ah le tlang vum cangah le thing nihlim hnia cangah Ahaz in hibawlhnak pe ai rimhmui tai betbo i.

Judah In Syria Le Israel Tawng i

^5-6 Ahaz a sual manin Bawipa a Pathian in Syria kumpibawi hnenah nehhnak pe ai Judah mi tampui pom in Damascus ah thawngtoh i. Bawipa ai bawmhnak thotho in Israel kumpibawi Remaliah ai fapa Pekah in Ahaz heh neh ai ni khat ah Judah ralkap ralpha ber pawl ting khat le thawng kul rek tlang i. Bawipa a zam tlang manin Bawipa, amahte pupate ai Pathian in hetih bangin cang tuhin thupe i.

⁷ Cen ralkap pakhat Zichri tihnak pa kumpibawi Ahaz ai fapa Manasseh le kumpibawi inn uktu Azrikam le thunaihnak lamah kumpibawi kasang Elkanah khai rek berh i.

⁸ Judah mite tu amahte unau inapui Israel ralkapte in Judah nupang le naupang ting hnih pom in Samaria ah fehpui ai thawngtoh tlang i. Hlawnthil sumsaw tampui sut ai Samaria ah tlunpui i.

Prophet Obed Ai Ponghnak

⁹ Cialai ah Bawipa ai prophet pakhat, Obed tihnak Samaria khua ah um i. Raltawnghnak in a tlungtu Israel ralkapte heh khuasong a lut dawn fangin tawk ai anite hnenah, “Bawipa, ning pupate ai Pathian tu Judah mite vumah a thinraw manin Judah mite in ning nehruai i; ikhalselai ning thinraw ze manin sup ben loin minung tam roh ning rekhnak heh van ah hleng i.

¹⁰ Cen tunah Jerusalem le Judah in pasal nupang ti loin ning sal tuhin bawn tum tlang fawn i si. Bawipa ning Pathian hmaiah sualhnak ning bawn ve heh ling lo i sim?

¹¹ Ngai tu ih! Hemi ning pom mite heh ning unau le ning farnute i. Hlat leh tusek ih; ciahlahle Bawipa a thinraw in ning cawh tuh i,” tiin ti i.

¹² Sak lam ramai hmingthang ngai minungte pali Jehohanan ai fapa Azariah, Meshillemoth ai fapa Berechiah, Shallum ai fapa Jehizkiah le Hadlai ai fapa Amasa in ralkapte ai thil bawnhnak heh lungkhim tlang lo ai,

¹³ ralkapte hnenah, “Ning pom mite tu heta ah koih mah ih. Bawipa hnenah kin sual zo ai kinmah cawh nuam tianin a thinrawtiar tlang zo ising. Ciahlaiah kin sualhnak tam tuh amam in hebang thil bawn ning nuam lai i,” ti tlang i.

¹⁴ Ciamanin ralkapte in amahte pom mite le suthnak hlawnthil sumsawte mizapui le amahte hotute hnenah pe tlang ai,

¹⁵ amahte suthnak hlawnthil le hnikponte a zemtu tuhin amahte pom mite songin upate pali ril tlang i. Ciami palite in sil tuhin hnikpon nai lo mite hnikpon le kezep pe tlang i; ti le rong phaniu in pe tlang ai a hmaihmate heh olive thau mat sah i. A vak ben nawn lo mite laak vumah toruai ai amahte pommi veksen Judah ram, tuumkung khua tihnak Jericho khua tian kuat tlang i. Cen Israel mite tu Samaria ah tlung tlang i.

Ahaz In Assyria Bawmhnak Ngen I

^16-17 Cen Edom mite in Judah ram heh tun le tunin sim tlang ai mi tampui pom in sal cang tuhin fehpui de i. Ciamanin kumpibawi Ahaz in Assyria Kumpimangbawi Tiglath Pileser hnenah bawmhnak ngen i.

¹⁸ Cialai ah Filistin mite nitlak lam tlangram le Judah ram tlangramte sim tlang i. Beth Shemesh, Aijalon le Gederoth khuate lang hlaiah Soco, Timnah le Kimso khuate le amahte hiangai umhnak khuatenau khuate khai lang ai khur tlang tata i.

¹⁹ Judah kumpibawi Ahaz in a minungte vumah thil mawi lo le thil dik lo tampui bawn ai Bawipa a tawngcai manin Judah ramah Bawipa in harsahnak hlengruai i.

²⁰ Ciamanin Assyria Kumpimangbawi Tilgath Pilneser in Ahaz tu a bawm lam tum loin tawngcai ai harsahnak tampui pe i.

²¹ Ciafangin Ahaz in Biakinn paisa le thilrite, kumpibawi inn thilri le paisate le Judah ram hotu upate ai naihnak hmuahhmuah tianin lang tlang sio ai Assyria Kumpimangbawi pe tlang i; ikhalselai bawm nuam cuang lo i.

Ahaz Sualhnakte

²² Ahaz sualhnak tu a roh ngai i! A ram songah harsahnak a hleng deuhdeuh fangin Bawipa hmaiah sual amam ve i.

²³ Amah a nehtu Syria mite ai khuavang hnen tian ah hibawlhnak sel i. “Syria kumpibawi tu amahte khuavang in bawm manin kai khai hibawlhnak sel lengkhaw i bawm tuh ve i,” tiin ruat i. Ciami in amah le a ram minungte vumah siatsuahhnak hlengruai amam i.

²⁴ Ciahlaiah Biakinn belkheng hmuahhmuah lang ai seu sek i. Bawipa ai Biakinn tu kham ai Jerusalem khuasong hmun tampui ah puleng bawn dekdo i.

²⁵ Judah ram khuapui ah ituseh khuatenau ah ituseh, ramdang khuavangte hnenah rimhmui taihnak ah khuavang biahnak khuarum hmun bawn betbo i. Ciatihin amahte pupate ai Pathian Bawipa ai thinrawhnak tu amah vumah hlengruai amam i.

²⁶ Kumpibawi a cang songah thil a canghnak le a bawnhnak dangte tu a panin a tawp tian Judah le Israel Kumpibawite Tluanthu Laibu songah ngan tlang i.

²⁷ Kumpibawi Ahaz tu thi ai Jerusalem khua ah phum tlang i; ikhalselai kumpibawi hlanmual ahcen phum lo i. A fapa Hezekiah in a pa tumrul in kumpibawi tuhin sawng i.