2 Sansiarnak 23 - Zanniat Bible

Athaliah Engsan Tlang I

¹ Kum sarihhnak ah suangbawi Jehoiada in thil pakhatkhat bawn can khim i tiin ruat i. Ciamanin ralbawite panga: Jeroham ai fapa Azariah, Jehohanan ai fapa Ishmael, Obed ai fapa Azariah, Adaiah ai fapa Maasaiah le Zichri ai fapa Elishaphat thawn thusawmdunhnak pakhat bawn tlang i.

² Judah ram song khua hmuahhmuah ah feh tlang ai Levi mite le amahte hin ṭen ai luber pawl a veksen in Jerusalem ah ko liang i.

³ Mizapui tu Biakinn ah pumkhawm tlang ai kumpibawi ai fapa Joash thawn thutiamhnak bawn tlang i. Cen Jehoiada in anite hnenah, “Kin thihsan zomi kin kumpibawi ai fapa heta ah um i. Bawipa in David ai tesinfate heh kumpibawi tuh ngio i tiin thu a thukhamhnak bangin tun tu ani tu kumpibawi cang tuh ihang.

⁴ Kumpibawi a canghnak tuhin hetihin bawn tlang ngasing. Suangbawi le Levi mite, Sabbath nia naper tuhin ning kawi tlang fangin seuthum seu khat in Biakinn kotka kil tu ih;

⁵ a dang seuthum seukhat in kumpibawi inn kil tu ih; a dang seuthum seukhat in hamtohhnak kotka kil tu ih. Mizapui in Biakinn tualvan ah khawm tu ih.

⁶ Naper naitu suangbawi le Levi mite siarlo aisu khai Biakinn songah lut tuh lo i si. Suangbawi le Levi mite tu cianghlimruai mi ning imanin lut thil tuh i si; ikhalselai midangte tu Bawipa ai thupeciahnak bangin a pualam ah um tlang tuh i si.

⁷ Levi mite in ning ralvang phok cia in kumpibawi kil tu ilai a feh hmuncang ah hlun tu ih. Biakinn song lut a tumtu heh aisu ita inkhai rek tu ih,” tiin thupe i.

⁸ Levi mite le Judah mizapui in Jehoiada ai thuhluphnak ngai tlang ai a relhnak bangin bawn tlang sio i. Naper a nai nawn lo mite khai amahte inn ah tlungruai lo manin naper hotu bawite in naper a pantu tuh khai ituseh, naper a ben zo mite khai ituseh, ho tuhin minung catloin nai ngio i.

⁹ Suangbawi Jehoiada in Biakinn songai a dah ngiohnak kumpibawi David ai faipui le lumte heh bawite hnenah pe i.

¹⁰ Kumpibawi humhim tlang tuhin minung tampui tu ralvang phok cia in Biakinn hmai lam cingkim ah dah i.

¹¹ Cen Jehoiada in Joash heh suakpui ai a lu ah kumpibawi lukhuk khuruai i. Kumpibawi ai hlun tuhhnak dan laibupui pe ai ciatihin kumpibawi tuhin bawn i. Suangbawi Jehoiada le a fapate in Joash heh thau pawh tlang ai mi zongzong in, “Kumpibawi a nunkhua sau tuseh!” tiin au tlang dekdo i.

¹² Mizapui in kumpibawi thangphat ai a songlawi pehnak thawmvang heh Athaliah in a za fangin mizapui a pumkhawm hmun Biakinn ah rang ngai in feh i.

¹³ Cen ciata ah kumpibawi thar heh kumpibawi ca tihnak Biakinn dawngkham khuam hiangah ralkap bawite le thirhlung tumtute in kulh ai ding tlang khiah hmu i. Mi zongzong lungawi aipuang ngai in au ai thirhlung tum ai, lasatute tu amahte thil tumhnak thawn ciami a cawimawihnak ah hotuber pawl i. Ciafangin Athaliah in a lungsia thinhar in a hnikpon zik sek ai, “Engsanhnak! engsanhnak!” tiin au dekdo i.

¹⁴ Biakinn nakah Athaliah rek tuh heh Jehoiada in nuam lo manin ralbawite hlat ai, “Ralkapte in a sir veve in kil tlang tu selai fehpui tuseh: aisu ita inkhai Athaliah hup a tumtu khiah rek tu ih,” tiin thupe i.

¹⁵ A tihnak bangin pom tlang ai kumpibawi inn ah fehpui ai Siphuh kotka tihnak hmunah rek i.

Jehoiada Ai Thil Tharthawhhnakte

¹⁶ Jehoiada ai tawlrelhnak thawmin kumpibawi Joash in mizapuite thawn Bawipa ai minung cang tuhin Bawipa hnenah thukhamhnak bawn tlang i.

¹⁷ Cen amahte veksen Baal khuavang biakinn ah feh tlang ai bal sek i. A pulengte le milimte heh kon sek in seu tlang ai puleng hmai rori ah Baal suangbawi Mattan khiah rek i.

¹⁸ Cen Jehoiada in suangbawi le Levi mite tu Bawipa ai Biakinn ai naruaihtu tuhin ṭuanvo pe i. Kumpibawi David ai ṭuanvo zem cia awnghnak bangin naruaihtu tuhin Moses ai dan pehnak bangin Bawipa hnenah a selhnak hibawlhnakte heh mai in tai tuh i. Biakinn ah la sa tuhin le lungawi puai bawnhnak tepawl khai anite ṭuanvo sio i.

¹⁹ Jahoiada in Biakinn songah a hnahpha lo aisu khai lut tuh loin khamtu tuhin Biakinn kotka ah kotka kiltu dah i.

²⁰ Ralbawite, a dang bawite le Khua upa hmingthang pawl in Jehoiada hlun tlang ai amahte veksen in kumpibawi heh Biakinn in kumpibawi inn ah fehpui tlang i. Vumta kotkapui in lut tlang ai kumpibawi tu kumpibawi tohkham ah to i.

²¹ Mi zongzong lungawi aipuang in um tlang ai, Athaliah thi zo hang manin khuapui song khai hnaihnokhnak zaikhai um nawn lo ihang.