2 Sansiarnak 22 - Zanniat Bible

Judah Kumpibawi Ahaziah

¹ Arab mite in Jerusalem a tawng tlang laiah mi hrekkhat in kumpibawi Jehoram ai fapa hmuahhmuah, a nauta ber Ahaziah siar lo, rek berh i. Ciamanin Jerusalem mite in a pa tumrul in Ahaziah heh kumpibawi tuhin bawn tlang i.

² Ahaziah kumpibawi a cang fangin a kum kul hluanhnih i ai Jerusalem an kum khat song uk i. A nu tu Israel kumpibawi Omri ai tunu, Ahab ai fanu Athaliah i.

³ A nu in thusia a forh manin Ahaziah in kumpibawi Ahab ai innsang nundan cung ai thil pha bawn lo i.

⁴ A pa thi hnuaah kumpibawi Ahab innsangte tu kumpibawi Ahaziah ruathnak petute i ai ruathnak pha lo pe tlang manin Bawipa vumah sual ai amah duk ai tlokruaitu ah cang tlang i.

⁵ Amahte thu hlun ai Israel kumpibawi Joram hnenah ṭang in Syria kumpibawi Hazael tawng i. Gilead ram Ramoth ah a ralte thawn tawng dun ai Joram heh ma liam i.

⁶ A hmaihma tuamhlawm tuhin Joram tu Jezreel khua ah let ai ciata ah Ahaziah in fan i.

⁷ Ahaziah in Joram a fan heh Bawipa in Ahaziah boruai tuhin can pha i, ti i. Zaimantifangin ciata ah Ahaziah a cam laitak ah Ahab ai a panhnak ukhnak siatsuah tuhin Bawipa in a rilhnak Jehu, Nimshi ai fapa, in Ahaziah le Joram zuam i.

⁸ Pathian ai thurelcathnak a bawnsuaktu heh Jehu a imanin Ahaziah hluntu Judah ram hotute le Ahaziah ai tupate thawn tawk dun tlang i. Ciafangin Jehu in amahte veksen in rek berh i.

⁹ Ahaziah heh si tlang ai Samaria ai a relh hmunah pom tlang i. Jehu hnenah fehpui ai Jehu in rek i. Cen Bawipa ai na ruaih a ben tawk in a bawntu ve a pu Jehoshaphat a upat tlang manin Ahaziah luang heh phatak ngai in phum tlang i. Ahaziah ai songkhat songin ram a ukthaitu pakhat bang khai um lo i.

Judah Kumpibawinu Athaliah

¹⁰ Kumpibawi Ahaziah ai nu Athaliah in a fapa rekhnak thu a za sawng fangin Judah ram kumpibawi songkhatte hmuahhmuah rek tuhin thupe i.

¹¹ Ahaziah in farnu khatta pakhat Jehosheba nai ai a pasal tu suangbawi Jehoiada i. Jehosheba in a thupruk in Ahaziah ai fapa pakhat Joash tihnak lang i; rek tuhhnak a unaute hnenin tlanpui ai a lentu nu pakhat thawn Bawipa ai Biakinn ai ithmun khan pakhat songah thup i. Ciatihin humsuak manin Athaliah kut ai thihhnak in Joash heh luat i.

¹² Athaliah kumpibawinu a cang kum ruk song ciata ah relh ngio i.