2 Sansiarnak 21 - Zanniat Bible

¹ Jehoshaphat tu thi ai Jerusalem khuahlun, David khuapui, kumpibawi hlanmual ah phum tlang i. Cen a fapa Jehoram in a tumrul in kumpibawi cang i.

Judah Kumpibawi Jehoram

² Judah kumpibawi Jehoshaphat ai fapa Jeroham in unau suahpui paruk nai i: Azariah, Jehiel, Zechariah, Azariahu, Michael le Shephatiah i.

³ A pa in sui, ngun le thilri mankhung tampui pe ai Judah ram song ving kulhhnak khuapui pakhat ṭen ai hotu in dah tlang i. Ikhalselai Jehoram tu upa ber imanin amah roltu ah bawn i.

⁴ Jehoram in Judah ram a ukhnak a kho deuh fangin a naute heh rek berh ai Israel bawite hrekkhat khai rek i.

⁵ Jehoram tu kum sawmthum le kum hnih a khim fangin kumpibawi cang ai Jerusalem an kum riat song uk i.

⁶ Ahab ai fanu pakhat a hoi manin a nuncan ziaza a pha lomi kumpibawi Ahab le Israel a dang kumpibawite ai nuncan ziaza cung ve i. Ciatihin Bawipa ai hmaiah sualhnak bawn i.

⁷ Ikhalselai Bawipa in David hnenah thukhamhnak bawn awng ai a tesinfate in ram uk tuh ngio i, tiin thu a kham zo manin David ai panhnak ram ukhnak heh Bawipa in siatsuah siang lo i.

⁸ Jehoram in Judah ram a uk laiah Edom mite ral tho ai mahniu ukdunhnak lang i.

⁹ Ciafangin Jehoram le a ralbawite suak tlang ai siphuhleng thawn Edom ram tawng tlang i. Ciata ah Edom mite in kulh tlang sio i; ikhalselai zan fangin suak ai luat tlang i.

¹⁰ Ciami ai panin Edom ram tu mahniu ukdunhnak ramah cang ihang. Jehoram in a pupate Pathian Bawipa a zangtak manin ciami can thotho ah Libnah mite khai ral tho tlang ve i.

¹¹ Judah tlang vum ramah khuavang biahnak tianin sa diamdo ai ciatihin Judah le Jerusalem mite tu Bawipa ai hmaiah misual ah cangruai i.

¹² Cen prophet Elijah in Jehoram heh lai kuat ai a lai songah, “Na pa Jehoshaphat le na pu Asa bangin na nung lo manin ning sentu David ai Bawipa Pathian in na hnawl ihang.

¹³ Israel kumpibawite ai nuncan ziaza hlun ai, Ahab le amah ai roltute in Israel heh lampialruai bangin, Judah le Jerusalem mite lampialruai ve isi. Nangmah tahin mipha deuhmi na unaute rek berh isi.

¹⁴ Ciamanin Bawipa in na minungte le na fate le na nupuite a roh ngai in cawh tuhai na naihnak thilri hmuahhmuah pairal tuh sio i.

¹⁵ Nang tu songur nai tuhai na rilte a suak tianin ni khat hnua ni khat na roh tuh amam i,” tiin ngan i.

¹⁶ Cialak ah Filistin mite hrekkhat le Arab mite hrekkhat tu tipui kan ai a ummi Ethiopia mite hiangah um tlang i. Ciamite tu Jehoram tawng tuhin Bawipa in forh i.

¹⁷ Judah ram heh tawng tlang ai kumpibawi inn rok ai a fapa nauta ber Ahaziah siar lo kumpibawi nupuite le a fapa hmuahhmuah fehpui ai thawng ah toh i.

¹⁸ Cia hnuaah Bawipa in kumpibawi khiah a rilpum urruai i.

¹⁹ A ur luar deuhdeuh ai kum hnih hnuaah a tuar har ngai in thi i. A ukhnak minungte in amah hlanai kumpibawite ca maipual sem de napui a thi fangin maipual khai sem tlang lo i.

²⁰ Jehoram tu kum sawmthum le kum hnih a khim fangin kumpibawi cang ai Jerusalem an kum riat song uk i. A thi fangin aisu khai lungsia tlang lo i. David khuapui Jerusalem khuahlun ah phum tlang i; kumpibawi hlanmual ah phum lo i.