2 Sansiarnak 2 - Zanniat Bible

Biakinn Sahnak Tawlrel Tlang I

¹ Solomon in Bawipa ai Biakinn sa tuhin le amah ca kumpibawi inn pakhat sa tuhin relcat ai tawlrel i.

² Inn sahnak thing phurtu tuhin minung thawng sawmsarih lang ai lungto solhtu tuhin minung thawng sawmriat lang i. A naperhnak siktu le hotu tuhin minung thawng thum le zaruk dah i.

³ Solomon in Tyre kumpibawi Hiram hnenah hetihin thucah i: “I pa kumpibawi David na bawm ai a kumpibawi innsahnak tuhin cedar thing na pe bangin kai khai i bawm tuh ve in ninghio na ngen ing.

⁴ Bawipa i Pathian hmingthanghnak tuhin biakinn pakhat sa tum ing. Bawipa i Pathian hmingthanghnak tuhin le upathnak ah kaimah le i minungte, zingsiar zansiar sabbath nia le Hla Thar puai can le a dang ni thianghlim nia ah maitai hibawlhnak kin sel hmun tuh i ai catloin Bawipa hnenah sang cianghlim kin selhnak hmun le rimhmui a phunphun tai in Bawipa kin bia hmun tuh i. A kumzangza hetihin bawn tuhin Bawipa in Israel mite hnenah thupe cia zo i.

⁵ Kin Pathian tu khuavang dangdang tahin thawmlian ai huthawm lianber imanin Biakinn lianpui pakhat sa tum hrimhrim ing.

⁶ Ikhalselai van lian ngai le a kau ngai ah rin a thual lomi Pathian imanin Pathian umhnak hrangah ti ngaingai incen aisu inkhai Biakinn sa thil tuh lo i. Pathian hnenah rimhmui taihnak Biakinn fangfang ah ti siarlo kai in zaitin sa thil tuh ing?

⁷ Ciamanin i pa David in a rilciahnak Judah ram song le Jerusalem khua ai zungthiamte thawn naper tlang tuhin mi pakhat, lung coihthiam, sui le ngun, dar le thir parthiam, mepian pon, pon sannum le pon san pawl tak thiamtu i kuat tu hram law.

⁸ Na minungte thingat a thiamdan ling manin Lebanon in cedar thing, mirang farthing le hual thingte i kuat tu hram law. Biakinn i sa tumhnak tu a lian ngai le a mawi ngai tuh imanin,

⁹ thingah tampui i kul ai na minungte in i tawlrel sah hek selai anite bawmtu tuhin i minungte khai hlat tuh ing.

¹⁰ Na minungte aih tuhin sangvut han thawng kul, barley sangvut han thawng kul, cabitti lang thawng za li le thawng sawmli, olive thau lang thawng za li le thawng sawmli kuat tuh ing,” tiin ti i.

¹¹ Cen Tyre kumpibawi Hiram in Solomon hnenah a thucahhnak lai in khirh i. A lai songah, “Bawipa in minungte a it manin amahte kumpibawi tuhin na bawn zo i.

¹² Lai le van a bawntu Bawipa Israel ai Pathian tu thangphat in um tuseh. Amah in kumpibawi David hnenah linghnak le thiamthilhnak in a dimmi Bawipa ca Biakinn le a inn hrangah kumpibawi inn a sa tumtu fapa pakhat pe i.

¹³ Tun in mifim ngai le kutzungthiam ngai Huram hlat ing.

¹⁴ A nu tu Dan hin i ai a pa tu Tyre khuate i. Huram tu sui, ngun, dar, thir, lungto le thing in zai nahmuah per thiammi i. Pon mepian, pon sannum, pon san le pon fangfem khai tak thiam sio i. A coihdan phunphun khai thiam ai a pianzia na rel hnua lamin bawn thiam lohnak nai lo i. Na pa David kumpibawi napertute le na napertu zungthiamte thawn per tlang tuseh.

¹⁵ Cen kuat tuhin na tiamhnak sangvut, barley sangvut, cabitti le olive thaute i kuat tu.

¹⁶ Lebanon tlang ah na kulzah in cedar thingte vawng tlang tuhai pakhat le pakhat pencih in pumpen in bawn tuhai Joppa tian tifingriat vuman kuat tlang tuh i ing. Ciata in Jerusalem ah nang in thiar tu,” tiin ngan i.

Biakinn Sa Pan Tlang I

¹⁷ Kumpibawi Solomon in Israel ram songai a ummi ramdang mite khai, a pa David ai a bawn bangin mipumsiarhnak bawn i. Amahte veksen in ramdang mite tu ting khat le sawmnga le thawng thum zaruk um tlang i.

¹⁸ Ciami songin thawng sawmsarih tu thing phurtu, thawng sawmriat tu tlang vumai lungto laitu le solhtu ah bawn ai a dang thawng thum le zaruk tu napertu sik le khawngtute i.