2 Sansiarnak 19 - Zanniat Bible

Prophet In Jehoshaphat Nunthutiam I

¹ Judah kumpibawi Jehoshaphat tu cak niu in Jerusalem khua a inn ah tlung lehsal i.

² Cen Hanani ai fapa prophet Jehu tu kumpibawi Jehoshaphat tawk tuhin kawi ai a hnenah, “Miphalote bawm le Bawipa a huatute hnenah ṭan heh a pha tiin ruat isim? Hetihin na bawn manin nangmah vumah Bawipa ai thinrawhnak hlengruai isi.

³ Ikhalselai na phathnak khai um ve i: midang ai a biahnak khuazingnu Asherah limte lon ai Bawipa ai daihhnak si ṭio isi,” tiin nunthutiam i.

Jehoshaphat Ai Tharthawhhnak

⁴ Jehoshaphat tu Jerusalem khuapui ah um napui Judah ram songah a hlangta ber Beersheba in sakta ber Epharaim tlang vum ramri tian khualtlawng ṭiode ai a minungte heh amahte pupate ai Pathian Bawipa hnenah let tuhin forh betbo i.

⁵ Judah ram songai khuapui cangcang ah thukhantute dah ai,

⁶ anite hnenah, “Thu ning rel ai thukhanhnak ning bawn fangin ralring ngai in bawn tlang tuh i si; thu ning khan fangin ningmah ai thunaihnak in thukhan tuh lo i si; Bawipa ai thunaihnak sawn in kham tuh i si; cen thu ning khan fangin ani tu ning lakah um i.

⁷ Bawipa kihzah tu ilai ralring ngai in permer tu ih; zaimantifangin Bawipa in mi zawl, mi hlaihdan le nawhthuh ai pawl heh or thil hrimhrim lo i,” tiin thucah betbo i.

⁸ Jerusalem khua ahkhai kumpibawi Jehoshaphat in thukhantu tuhin Levi mite, suangbawite le khua upa hmingthang pawl dah ai Bawipa ai dan a bal fangin le khuasong mite tazacuai dun fangin thukhantute i.

⁹ Amahte hnenah, “Ning ṭuanvo heh Bawipa kihzah kongin fel ngai in hlaihdanhnak nai loin permer tlang tuh i si.

¹⁰ Khua dangdang in ning unaute, pakhat le pakhat rek dun ngah panghnak thu ah ituseh, Bawipa ai dan le thupehnak a bal thu ah ituseh, ning hnenah a hleng fangin Bawipa vumah sualhnak a nai lohnak tuhin ralring ngai in amahte ṭuanvo ṭen relfel tu ih. Ciami bawn hlah le i sikhaw ningmah le ning unaute in Bawipa ai thinrawhnak a roh ngai in tuar tlang tuh i si. Ikhalselai fel ngai in ning ṭuanvo bawn le i sikhaw mawhphur tuh lo i si.

¹¹ Biakhnak lam thu hmuahhmuah ah Suangbawi Sang Amariah tu thunaitu ber tuh i; khuasong mite ai thu ahcen Judah ram uktu bawi Ishmael ai fapa Zebadiah heh thunaitu ber tuh i. Thukhantute ai thukhanhnak bawn tuhin ṭuanvo a naitu heh Levi mite tuh i. Ralpha ngai in bawn tu ilai i cahhnak thu bangin bawn tu ih; Bawipa tu mi dikcangte vumah um tu hram seh,” tiin ti i.