2 Sansiarnak 18 - Zanniat Bible

Mikaiah In Ahab Ralringhnak Pe I

¹ Judah kumpibawi Jehoshaphat tu milian le mihmingthang a cang fangin a songkhatte hrekkhat le Israel kumpibawi Ahab ai songkhatte thawn hoidunhnak in pehzomhnak tawlrel i.

² Ciahnua kum raipui hnuaah Jehoshaphat tu Ahab tlawng tuhin Samaria khua ah feh i. Jehoshaphat le a hluntute upathnak tuhin Ahab in puai lianpui bawn ai kawlpaw le tuu tampui ro i. Cen Ahab in Gilead ramai Ramoth khua tawng tuhin Jehoshaphat sawm i.

³ Ahab in, “Ramoth khua tawng tuhin tel ve ngasim?” tiin ti i. Jehoshaphat in, “Na ṭanpui tuh ing. Na man fangin i rel tulai kai le i ralkapte suak tlang tuh i ing.

⁴ Ikhalselai hmasaber ah Bawipa ron tuh ising,” tiin ti i.

⁵ Ciamanin Ahab in prophette za li tluk ko ai, “Ramoth tawng tuh ing maw tawng tuh lo ing?” tiin zawt i. Prophette in, “Tawng tu. Pathian in nehhnak na pe tuh i,” ti tlang i.

⁶ Ikhalselai Jehoshaphat in, “Bawipa kin ron thil tuhin prophet pakhat tal um lo im?” tiin zawt i.

⁷ Ciafangin Ahab in, “A dang pakhat um lai i. Imlah ai fapa Mikaiah i. Ikhalselai Mikaiah tu i hua i; zaimantifangin zaikom inkhai kaimah ca thupha phuang awng kel lo i; a relhnak tu thupha lo ṭio i,” tiin ti i. Jehoshaphat in, “Ciabang ponkam tu kumpibawi na ka in suakruai hram malaw,” tiin ti i.

⁸ Ciamanin kumpibawi Ahab in a kuthnia ai tlangsuak pakhat ko ai Mikaiah rang ngai in ko tuhin ruai i.

⁹ Cen Ahab le Jehoshaphat tu kumpibawi thuam in thuam kawm ai Samaria khuapui kotka pua fangrialhnak hmunah kumpibawi tohkham veve ah to kawm ai anite hmaiah prophette tu prophet pon in thu rel tlang thliahthlo i.

¹⁰ Prophette lakai pakhat Chenaanah ai fapa Zedekiah thir tuuki tampui bawn ai Ahab hnenah, “Bawipa in, ‘Hemi bang kite thawn Syria mite tawng tulai neh tuh isi,’ ti i,” tiin rel i.

¹¹ A dang prophette inkhai ciatihin rel ṭen ve i. “Ramoth tawng tuhin feh tulai neh tuh isi,” ti tlang i.

¹² Cialak ah Mikaiah koruai mipa in Mikaiah hnenah, “Prophet dang hmuahhmuah in neh tuhin rel tlang ṭen i. Nang inkhai amahte relhnak bangin rel silai pha tuh i,” ti i.

¹³ Ikhalselai Mikaiah in, “Bawipa ai hming sal in thu na rel ing: I Bawipa ai relruaihnak lek rel tuh ing,” ti i.

¹⁴ Mikaiah tu Ahab kumpibawi hmai a hleng fangin kumpibawi in, “Mikaiah kumpibawi Jehoshaphat le kaimah in Ramoth tawng tuh maw, tawng tuh lo i ing, i rel tu?” tiin ti i. Ciafangin Mikaiah in, “Tawng hlah i sim! Neh thai pang isi! Bawipa in nehhnak ning pe tuh i,” tiin sawn i.

¹⁵ Ciafangin Ahab in, “Bawipa hming in i hnenah na pong fangin thudik pong tuh isi tiin vel zai na rel tuh ing?” tiin ti i.

¹⁶ Cen Mikaiah in, “Israel ralkapte tu fing le tlang vumah khaltu nai lo tuute bangin suk le so ah vakvai tlang in hmu ing. Cen Bawipa in, “Hemite tu hotu nai tlang lo i; dap niu in amahte inn ah tlung tlang tuseh,’ ti i,” tiin rel i.

¹⁷ Ciafangin Ahab in Jehoshaphat hnenah, “Hemi pa in kaimah ca thupha rel awng lo i, na ti tho lo ing maw? Zaikom inkhai thusia lek rel i,” tiin ti i.

¹⁸ Cen Mikaiah in, “Bawipa ai ponkam heh ngai rih tu ih. Bawipa tu vancungmite in a cingkim in kil tlang ai vancung a tohkham vumah a to hmu ing.

¹⁹ Bawipa in, “Ahab tu Ramoth khua ah feh in rek tuar tuhin aisu in zawl tuh i si? tiin a zawt fangin vancungmi hrekkhat in phunkhat rel i; a dang in phundang rel i.

²⁰ Ciafangin rauhla pakhat heh hmaiah suak in Bawipa hnenah nong ai, kaimah in ‘Kaimah in zawl tuh ing?’ tiin ti i. Bawipa in, ‘Akontih in zawl tuh isi?’ tiin a zawt fangin,

²¹ ciami rauhla in, “Feh tuhai Ahab ai prophet hmuahhmuah thudon relruai tuh ing,’ tiin sawn i. Bawipa in, ‘Feh tulai zawl tu. Zawl ben tuh isi,’ ti i,” tiin rel i.

²² Cen Mikaiah in, “Ciabang cekci in cang ngaingai i. Bawipa in na prophette hmuahhmuah heh na hnenah thudon relruai sio i. Ikhalselai Bawipa amah in bawngsiahnak heh na tawk tuhin lairel cia zo i,” tiin ti i.

²³ Ciafangin prophet Zedekiah tu Mikaiah hnenah kawi ai Mikaiah heh a biangbil beng ai, “Zaifangin Bawipa rauhla in i zam ai na hnenah thu na rel i?” tiin zawt i.

²⁴ Mikaiah in, “A thuk ber khan songah na relh fangin ling leh tuh isi,” tiin sawn i.

²⁵ Cen kumpibawi Ahab in a kuthnia bawi pakhat hnenah, “Mikaiah heh pom tulai Khuapui uktu bawi Amon le kumpibawi fapa Joash hnenah fehpui tu.

²⁶ Cak niu in i hleng leh hlanlo thawng toh tu selai thawngtlate rong, ti le sang pe tuseh,” tiin ruai i.

²⁷ Ciafangin Mikaiah in, “Cak niu in tlung leh thil lesikhaw Bawipa in i hnenah pong lo i tuh i. I relhnak heh mi zongzong in ling tlang tuseh,” tiin cawm ngai in au i.

Ahab Thi I

²⁸ Cen Israel kumpibawi Ahab le Judah kumpibawi Jehoshaphat tu Gilead ramai Ramoth khua tawng tuhin feh kawm i.

²⁹ Cen Ahab in Jehoshaphat hnenah, “Ral kin tawng fangin nang tu na kumpibawi thuam sil tulai kai tu mi menma bangin thuam tuh ing,” tiin ti i. Ciatihin Israel kumpibawi tu midang bangin thuam ai raltawng i.

³⁰ Syria kumpibawi in a siphuhleng ralkap hotu bawite heh Israel kumpibawi siarlo midang aisu khai tuahmawh tuh loin thupe i.

³¹ Cen kumpibawi Jehoshaphat a hmu fangin Israel kumpibawi vuah tlang ai tawng dekdo i. Ikhalselai Jehoshaphat tu au dekdo ai Bawipa Pathian in hup ai a hualtute tu let tlang sio i.

³² Siphuhleng hotu bawite in Israel kumpibawi ilo lam khiah a ling fangin hnawh tlang nawn lo i.

³³ Ikhalselai Syria ralkap pakhat pa in hmuisunghnak nai cuca loin a conkiang sai ai kumpibawi Ahab khiah a sohnar phaw le ralthuam pehdunhnak kualak in kha lio i. Ciafangin Ahab in, “I kha i! tiin au ai a siphuhleng mawngtu heh raltawnghnak hmun an tlanpui tuhin thupe i.

³⁴ Ciami nia ai tawngdunhnak tu a roh ze ai Ahab khiah a siphuhleng vumah do fawm in Syria ralkapte lam hoi in zau ai nitla fangin thi i.