2 Sansiarnak 16 - Zanniat Bible

Israel Thawn Tawngdunhnak

¹ Kumpibawi Asa in Judah ram a ukhnak kum sawmthum le kum rukhnak ah Israel kumpibawi Baasha in Judah ram tawng ai, Judah ram lutsuakhnak kham tuh sio in Ramah khuapui heh ving in kulh i.

² Ciafangin Asa in Bawipa ai Biakinn le kumpibawi inn ai a dahhnak sui le ngun heh lang ai Damascus ah Syria kumpibawi Benhadad hnenah kuat i. Ciahlaiah,

³ “Kin pate a ṭangkhat bangin kin khai ṭang kawm tuh ising. Hemi sui le ngun heh lehsawng in na sum ing. Israel kumpibawi Baasha in i ram songin ralkapte letpui tuhin amah thawn ning ṭangkawmhnak com tuhang,” tiin thucah i.

⁴ Benhadad in Asa ai thucahhnak heh lungkhim ai Israel khuapuite tawng tuhin a ralbawite le amahte hohnak ralkapte hlat i. Israel heh tawng ai Ijon, Dan, Abel Beth Maacah le Naphtali ramte ai khuapuite lang sio i.

⁵ Ciami thu Baasha in a za fangin Ramah khua kulhhnak ving bawn nawn loin tlan i.

⁶ Cen kumpibawi Asa in Judah ram song nuamhmuncang in a minung khawm ai Baahsa in Ramah khua kulhhnak ai hmanghnak lungto le thingte tu phurruai sio ai Geba le Mizpah khuapuite kulhhnak tuhin hmang i.

Prophet Hanani

⁷ Cialai ah prophet Hanani tu Judah kumpibawi Asa hnenah kawi ai, “Bawipa na Pathian rinsan loin Syria kumpibawi na rinsan sawn manin Israel ralkapte tu na kut songin luat tlang zo sio i.

⁸ Ethiopia le Lybia ralkapte tu siphuhleng le siphuh vumto ralkapte tam ngai nai ilo im? Ciatluk tam napuikhaw Bawipa na rinsan awng manin Bawipa in nehhnak na pe i.

⁹ Bawipa in amah rinsanhnak thinlung a naitu hnenah thazang hathnak pe tuhin laivum pumpuhluk heh sik ngio i. Voithu in thil na bawn zo manin tunai panin raltawng tuh thliahthlo ihang si,” tiin ti i.

¹⁰ Ciami thu a za fangin Asa tu prophet Hanani vumah a thinraw ngai ai thawng ah toh ai thir cikcin in pen i. Ciami can dungah Asa in a ramsong mi hrekkhatte heh ninghiohnak nai loin cawh awng i.

Asa Ukhnak Bo I

¹¹ Asa in Judah ram a uk song thil canghnak hmuahhmuah a hampan in a tawp tian, Judah Le Israel Kumpibawite Tluanthu Laibu songah ngan tlang i.

¹² Asa tu Judah kumpibawi a canghnak kum sawmthum le kum kua kum ah a ke ah a roh ngai in masia tuar i. Ikhalselai Pathian rinsan loin sibawite rinsan sawn i.

¹³ Kumpibawi a canghnak kum sawmli le kum khat kum ah thi i.

¹⁴ David khuapui ah amah ca tuhin a ret cia awnghnak lung hlan ah phum tlang i. A luang phumhnak ah rimhmui le siti rimur pawl hmang ai amah upathnak ah maipual lianpui sep tlang i.