2 Sansiarnak 12 - Zanniat Bible

Egypt Mite In Sim Tlang I

¹ Rehoboam tu a ram song fel ngai in uk ben ai kumpibawi hat ngai a cang sawng fangin a ukmi minungte thawn Bawipa ai dan heh zangtak tlang i.

² Kumpibawi a cang kum ngahnak ah Egypt kumpibawi Shishak in Jerusalem tawng i.

³ Siphuhlengte thawng khat le zahnih, siphuh vumto ralkapte thawng sawm ruk le ke ralkapte tu siar cawk lo thawn tawng i. A ralkapte songah Libya mi, Suk mi le Ethiopia mite khai tel tlang i.

⁴ Judah ram ving ai kulhhnak khuapuite lang ai Jerusalem khua hiang hleng i.

⁵ Shishak lau in Jerusalem khua songah a tlantu Judah hotute le kumpibawi Rehoboam hnenah prophet Shamaiah heh feh ai, “Bawipa in ‘Kaimah i zangtak manin Shishak kut songah ning hlengruai ing,’ ti i,” tiin rel i.

⁶ Ciafangin kumpibawi le Judah hotute in kin sual i ti ling tlang manin, “Bawipa tu dik i,” ti tlang i.

⁷ Ciami tu Bawipa in a hmu fangin prophet Shemaiah hnenah pong lehthio ai, “Kin sual i, ti a ling manin siatsuah tuh sek lo ing. Siatsuahhnak in a luat fangfang i tuhai Shishak in a tawng fangin Jerusalem an i thinrawhnak tawk tuh lo i.

⁸ Ikhalselai Shishak in neh tuhai a kuthnia ai a um hnuaah kaimah ai na ruaih le laivum ai kumpibawi ai na ruaih a dangdundan lingfiang tlang tuh i.

⁹ Kumpibawi Shishak tu Jerusalem khua songah hleng ngaingai ai Bawipa ai Biakinn le kumpibawi inn ai a umhnak sumsaw hmuahhmuah lang sio i. A langhnak lakah Kumpibawi Solomon ai bawnhnak sui lumte khai tel sio i.

¹⁰ Ciami sui lumte tumrul in Rehoboam in dar lumte bawn ai kumpibawi inn kotka kiltu ralkap hotute kut ah dah i.

¹¹ Kumpibawi Biakinn ah a feh cang fangin a kiltute in lum heh awh tlang ngiode i; cia hnuaah kotka kiltute ai umhnak inn ah dah leh de i.

¹² Rehoboam tu Bawipa hmaiah a lungnem manin Bawipa ai thinrawhnak in siatsuah sek lo ai Judah ram tu tluang ngai in feh thil leh i.

Rehoboam Ukhnak Thutlangpui

¹³ Rehoboam in Judah ram tu Jerusalem khua an uk ai hat amam i. Kumpibawi a cang fangin kum sawmli le kum khat i ai Israel ram pumpuhluk songah Bawipa in amah biakinn hrangah a rilhnak Jerusalem khuapui an kum hlaisarih song uk i. Rehoboam ai nu tu Ammon rammi Naamah i.

¹⁴ Bawipa ai daihhnak si tum de lo manin Bawipa ai hmaiah thil sual bawn i.

¹⁵ Rehoboam naperhnak a panin a tawp tian le a innsang ai tluanthute tu Prophet Shemaiah Tluanthu Laibu le Prophet Iddo Tluanthu Laibu songah ngan tlang i. Rehoboam le Jeroboam tu catloin tawng dun ṭiode i.

¹⁶ Rehoboam tu thi ai David khuapui, Jerusalem ai kumpibawi hlanmual ah phum i. Cen a fapa Abijah in kumpibawi tuhin sawng i.