2 Sansiarnak 10 - Zanniat Bible

Sak lam Hinte Raltho I

¹ Sak lam hin Israel mite Rehoboam kumpibawi cangruai tuhin Shechem ah feh ciazo manin Rehoboam tu Shechem ah feh i.

² Nebat ai fapa Jeroboam tu kumpibawi Solomon lau in Egypt ramah tlan i; ikhalselai Rehoboam thu a za fangin Egypt ram an let i.

³ Sak lam Israel mite in Jeroboam heh sawm tlang ai amahte veksen in hmunkhat ah Rehoboam hnenah feh tlang ai a hnenah,

⁴ “Na pa in kin thil kin ritruai ze i. Kin thilrit heh zangruai ai nunnuam deuh in kin bawn tuh ilesikhaw na ruaih tuh i ing,” tiin ti tlang i.

⁵ Rehoboam in, “Nithum hnuaah kawi leh tu ih,” ti i. Ciamanin mizapui tu tlung tlang i.

⁶ Kumpibawi Rehoboam tu a pa Solomon ruathnak petute deuhdeuh hnenah kawi ai, “Hetihin anite ai i tihnak heh akontih in ti tuh ing?” tiin thu zawt i.

⁷ Cen ani in, “Amahte vumah ninghiohnak nai ai ponghlum le pongmawi in a lungawiruai lesikhaw rinsantlak in na ruaih tuh i ing,” ti tlang i.

⁸ Ikhalselai ciami thuruathnak heh pom lo ai, amah ai khukrun a lailengpui dehnak minote ai ruathnak ling nuam ai ciamite hnenah,

⁹ “Akontih in ti tuh ing? Amahte thilrit zangruai tuhin i ruaihtute hnenah akontih in thu sawn tuh ing?” tiin thu ron i.

¹⁰ Ciafangin anite in, “I zungnge tu i pa ai el tahin lian sawn i.

¹¹ I pa in ning phur ning ritruai i; kai inkhai ritruai tuh amam ing. I pa in tingfung in ning vit i; kai in fung kaikuam thawn ning cawh tuh ing,” tiin anite hnenah ti tu, tiin ti tlang i.

¹² Nithum hnuaah a thucahhnak bangin, Jeroboam le mizapui tu Rehoboam hnenah kawi tlang i.

¹³ Kumpibawi in upate thuruat pehnak khiah hnawl ai mino deuh pawl ai ruathnak sawn lang in,

¹⁴ Mizapuite hnenah, “I pa in ning phur ning ritruai i, kai inkhai ritruai tuh amam ing. I pa in tingfung in ning vit i, kai in fung kaikuam thawn ning vit tuh ing!” tiin awhrang roh in ti i.

¹⁵ Bawipa in prophet Ahijah hmangin Nebat ai fapa Jeroboam hnenah a relhnak khimruai tuhin Bawipa Pathian ai tumhnak i. Ciamanin kumpibawi Rehoboam in mizapui daihhnak heh hlun lo i.

¹⁶ Mizapui in kumpibawi in kin daihhnak kin hlun nuam lo i ti hmu fangin, “David le a hinte kin daih lo i. Kin ca ziang kin bawt awng i? Israel mite tlung tu ih. Rehoboam tu amah hlanlam cai tuseh!” tiin kumpibawi Rehoboam heh sawn tlang ai amahte inn ah tlung tlang sio i. Ciatihin Israel mite tu raltho tlang ai,

¹⁷ Rehoboam zam tlang ai Judah peng lek uktu ah cang i.

¹⁸ Cen kumpibawi Rehoboam in salte ai naper hotu Adoniram heh Israel mite hnenah hlat i; ikhalselai Adoniram heh a thi hlanlo lungto in sep tlang i. Ciafangin Rehoboam tu rang ngai in a siphuhleng to ai Jerusalem ah tlan i.

¹⁹ Ciami ai panin tunnia tian sak lam Israel ram tu David ai tesinfa ukhnak tawngtu ṭio ah cang i.